Nnipa​—Nea Enti A Wɔyɛ Ade Sɛnea Wɔyɛ

So wɔde wo wɔn? So efi faako a wɔte? So ahofadi a wɔwɔ ntia? anaa So yenim ankasa?

“EFI MOGYA a wɔde woo me no!” ebia obi bɛka eyi de ayi ne ho ano wɔ bɔne bi a wayɛ ho.Ɛyɛ ampa sɛ suban a wɔde wo obi no wɔ ne nneyɛe so tumi kɛse. Bible si eyi so dua sɛ: “Sɛnea ɛnam onipa biako so na bɔne baa wiase, na owu nam bɔne so bae no, saa na ɛyɛe na owu trɛw kaa nnipa nyinaa, efisɛ wɔn nyinaa ayɛ bɔne.”​—Rom. 5:12.

“Faako a mete ntia!” ne anoyi a ɔdebɔneyɛfo foforo de ma. Ɛno nso ka ho. Bible se: “Wo ne anyansafo mmɔ, na dan onyansafo, na nea ɔne nkwasea bɔ no hu amane.” Afei nso, “mommma wɔnnnaadaa mo! Nkɔmmɔ bɔne sɛe ɔbra pa.”​—Mmeb. 13:20; 1 Kor. 15:33.

Suban a wɔde wo obi ne faako a ɔte no tumi ka onii no nneyɛe kɛse. Nanso, ɔrentumi mfa ne nneyɛe ho asodi nkɔto mogya a wɔde woo no anaa faako a ɔte no so. Dɛn ntia? Efisɛ nnipa yɛ abɔde a wotumi yɛ nea wɔpɛ. Enti, “yɛn nyinaa bebubu yɛn ho akontaa mmiako mmiako akyerɛ Onyankopɔn.” Wɔanyɛ onipa te sɛ afiri, na mmom ɔno ankasa wɔ ne pɛ, na dwuma a ɔde di no ho asodi da no so.​—Rom. 14:12.

Onipa tumi nya nimdeɛ ne nyansa, otumi nya biribi ho dɔ na ɔwɔ atɛntrenee ho adwene. Otumi yɛ adwuma a atirimpɔw wɔ mu, a ɛma n’asetra ho ba mfaso. Nanso wɔ onipa a wahwe ase fam no, ontumi mfa su horow yi nni dwuma nkosi ase, na su horow no ne wɔn ho wɔn ho nkari pɛ nso. Ne saa nti, ontumi nnya nneɛma a ohia na ɔyɛ ade wɔ ɔkwan a ɛnyɛ pɛ so​—te sɛ afiri a ennya nneɛma a wɔahyehyɛ sɛ ɛsɛ sɛ enya no.

Sɛnea ɔbo ketewaa a ɛkɔhyɛ yɛn mpaboa mu anaa biribi ketewaa bi a ɛtɔ yɛn ani so gye yɛn adwene no, saa ara na nnebɔne a nkurɔfo yɛ no twetwe adwene. Ebia na hwee nhaw nipadua no fã a aka no, na ebia na nkurɔfo yɛ nneɛma pa pii, nanso nneɛma bɔne a ɛkɔ so no na ɛtwetwe adwene kɛse. Saa ara na ɛte wɔ sintɔ ahorow a enti wobisa sɛ, Dɛn nti na nkurɔfo yɛ ade sɛnea wɔyɛ? Dɛn na ɛma wɔyɛ saa? no ho.

Ebia na sintɔ ahorow yi susua. Ebia na obi annya biribi a ɛsɛ sɛ onya, wannya nea ɔpɛ, n’atirimpɔw anyɛ hɔ, na bere a n’ani nnye no ebia ɔbɛteɛteɛm agu afoforo so. Mpɛn pii no emu yɛ den kɛse. Ebia nyiyim a wɔyɛ remma wonnye obi anaasɛ n’adwuma ntom; ɛde ɔhaw ba; na ɛde abufuw ne basabasayɛ a ɛsɛe ade ba. Sika ne ahonyade fam adifudepɛ ma nnipa pii yɛ afoforo nneɛma a ɛmfata. Nnipa a wɔn ankasa ho nkutoo na wodwen kan, a wɔn ankasa akɔnnɔ anya wɔn so tumi, no bɔ korɔn anaasɛ wɔto mmɔnnãa na wokunkum nkurɔfo wɔ wɔn akɔnnɔ bɔne no ho dwumadi mu. Nnipa ne ahyehyɛde ahorow ne aman horow a wɔn ani bere ade pii fi basabasayɛ ne akodi ahorow ase, kunkum nnipa na wɔde nnubɔne sɛe asase yi, na ɛde ɔkɔm, ɔyaredɔm ne owu ba nnipa ɔpepem pii so.

Dɛn ntia? Wonni Onyankopɔn suban so bio, na ne su horow no nkyerɛ wɔn kwan bio. Nsonoe a ɛda nnipa ne mmoa ntam no bɛyɛ kakraa bi, na tebea horow a emu yɛ den mu no, nnipa bɛyɛ te sɛ “mmoa a wonni adwene a wɔn su ne sɛ wɔawo wɔn sɛ wɔnkyere wɔn nsɛe wɔn.” (2 Pet. 2:12) Wɔsɛe Onyankopɔn su horow no. Wɔde nimdeɛ di dwuma wɔ ɔkwammɔne so de hwehwɛ tumi a ɛsɛe ade na edi awu. Nyansa dan wiase nkwaseasɛm. Atɛntrenee dan atirimɔden. Ɔdɔ dan pɛsɛmenkominya su. Su horow a ebetumi adi dwuma pa sɛe na ɛma nnipa yɛ nneɛma bɔne sen “mmoa a wonni adwene.”

Basabasayɛ atwa nnipa ho ahyia​—kurow mu, nhoma mu, agodi ne sini mu, wɔn mmɔnten so, ne wɔn asa so. Ɔhwɛtie-afiri (TV) de amumɔyɛ ne awudi ho adwene hyɛ nnipa adwenem fi mmofraase. Nhwehwɛmu bi a wɔyɛe kyerɛ sɛ ansa na Amerikani abofra bedi bɛyɛ mfirihyia 14 no na wahu nnipa bɛyɛ 11,000 a wɔakum wɔn wɔ TV so. Boayifo kuw bi a aban paw wɔn ma wɔhwehwɛɛ basabasayɛ a ɛkɔ so wɔ sukuu mu no de saa amanneɛbɔ a ɛsom bo wɔ abakɔsɛm mu yi bae: “Wokunkum mmofra pii wɔ sukuu, mpɛn pii no wɔ atuo a mmofra afoforo de di ako mu, wɔ 1970 ne 1973 ntam hɔ, sen asraafo dodow a wokum wɔn wɔ Vietnam akodi no mu no.”

Wiase nyansahufo a wogye adannandi tom no ka kyerɛ yɛn sɛ eyinom nyinaa yɛ nea ɛsɛ sɛ ɛba. Wɔkyerɛ sɛ akodi a ɛkɔ so wɔ nnipa ntam no yɛ nea yɛn nananom a wɔyɛ mmoa de gyaw yɛn. Nyansahufo afoforo nso ka sɛ ɛnyɛ nokware. Owura Ashley Montagu a ɔyɛ ɔdesani nipadua ho nimdefo kyerɛw nea edi so yi sɛ: “Nnipakuw ahorow bi wɔ hɔ a, sɛ anka wɔbɛyɛ ntɔkwapɛfo mmom no, wɔyɛ nnipa a wɔmpɛ basabasayɛ na wɔne afoforo bom di dwuma. Eyinom mu bi ne Tasadayfo a wɔwɔ Mindanao, Todafo a wɔwɔ India keseefam, Tahitiafo, Hadzafo a wɔwɔ Tanzania, Ifalukfo a wɔwɔ Pasifik mpɔtam bɔ, Yamifo a wɔwɔ Pasifik no atɔefam, Lappfo, Arapesfo ne Forefo a wɔwɔ New Guinea no. . . .

“Bere a wɔn a wosua nnipa ho ade sua nnipa a wɔtete sɛɛ a wɔmpɛ basabasayɛ ho ade no, yehu sɛ titiriw no ɛnam ɔkwan a wɔfa so tete wɔn mma no so na wotumi nya wɔn ma wɔne afoforo bom yɛ nneɛma na wokwati basabasayɛ. Woyi ɔdɔ kɛse adi kyerɛ wɔn mma. Efi wɔn mmofraase no, wɔde wɔn mma fonfam wɔn ho na wɔne wɔn di nkitaho bere nyinaa. . . .

“Sɛ́ obi pɛ ntɔkwaw anaasɛ ɔmpɛ ntɔkwaw no yɛ ade a osua. Abusua biara yɛ abrabɔ a wɔpɛ ho nhwɛso​—nhwɛso horow a nnipa nkorɛnkorɛ di akyi bere nyinaa. Amerika de basabasayɛ ne awudi ho nhwɛso si mmofra no anim, na afei ɛyɛ yɛn nwonwa sɛ awudi ne basabasayɛ kɔ so kɛse saa.”

Dr. John Lind hyɛ san a yɛbɛsan akɔ bere a na awofo ne mmofra di agoru na wɔto nnwom de deda wɔn so no ho nkuran, efisɛ eyi “boa ma wɔn adwene nyin ntɛmntɛm.” Nsɛmma nhoma a wɔfrɛ no Psychology Today, December 1979 de no, kae sɛ “bere a adwene no renyin no, nneɛma ahorow bi a abofra nnya​—te sɛ turu a ne nã nturu no na ɔne no nni agoru​—mma ne nkate ahorow nnyin sɛnea ɛsɛ anaasɛ ɛsɛe ne nkate ahorow wɔ afoforo ho.” Nsɛmma nhoma koro no ara kɔɔ so kae sɛ, “esiane sɛ adwene koro no ara na edi basabasayɛ nkate so nti, ɛyɛ den ma abofra a wannya ɔdɔ a ɛho hia no sɛ obedi basabasayɛ nkate ahorow so bere a wanyin.”

Wɔ ne nhoma The Brain: the Last Frontier (1979) no mu no, Dr. Richard Restak daa no adi sɛ: Nhwehwɛmu ama “ada adi pefee sɛ biribi wɔ amemene no mu a edi nkate so titiriw,” na eyi a wɔbɛsɛe no anaa wɔbɛkanyan no no sakrae onii no nneyɛe. Kanyan a wɔkanyan no no tumi de anigye anaa abufuw ba. “Abofra adwene nam ne nkate ahorow a wokanyan no so na enyin,” na “sɛ wɔwosow abofra anaa wɔde no fonfam wɔn ho a, ɛkanyan n’adwene na ɛboa ma enyin.” Eyi ho hia, efisɛ sɛ abofra no annya nkate ahorow a ɛho hia yi a ontumi nnyin yiye. Nea ɛtaa de ba ne atutupɛ, abufuw ne basabasayɛ su.

Nkyekyem abien a ɛwɔ atifi ha no da no adi sɛ ɛnyɛ mogya a wɔde wo yɛn ne faako a yɛtra ne nhwɛso horow a ɔman ko a yɛte mu yɛ no nko na ɛka sɛnea yɛyɛ ade, na mmom sɛnea wɔyɛ yɛn bere a yɛyɛ mmofra nkumaa no nso ka sɛnea yɛn adwene ne yɛn nkate nyin ne sɛnea yɛyɛ ade no.

Nanso ade foforo nso redi dwuma.​—nea nnipa pii nnye ntom mpo sɛ ɛwɔ hɔ no. Nanso, The Wall Street Journal no gye tom. Emu asɛm titiriw bi a wɔkyerɛw no October 28, 1977, a ɔtoo din “Nsɛmmɔnedi Nkate No” mu no, ɛka basabasayɛ ne nneyɛe bɔne ho nkate a nnipa wɔ ho asɛm. Ɛtaa de ɛho asodi to nnipa so, nanso nsɛmma nhoma no mu asɛm titiriw yi bisaa “amumɔyɛ ne basabasayɛ ho nkate a emu yɛ den” a ɛwɔ nnipa mu ma “ɔtɔ kɔ bɔne so” no ho asɛm. Asɛm a ɛde wiei ne sɛ: “Sɛ wode asodi no to Satan so a na woabɛn nokware no sen sɛ wode bɛto nnipa so.”

Bible no frɛ Satan ‘nneɛma nhyehyɛe yi nyame,’ na ɛka “ahonhommɔne a ɛwɔ ɔsoro hɔnom” no ho asɛm sɛ atamfo ankasa, na ɛka sɛ asase sofo nnue “efisɛ ɔbonsam asian aba mo nkyɛn, na wafa abufuw kɛse, efisɛ onim sɛ ne bere a ɔwɔ no yɛ tiaa.” (2 Kor. 4:4; 6:12; Adi. 12:12) Satan na ofii ɔhaw no ase wɔ Eden bere a ɔdaadaa Hawa ma ɔworɔɔ Onyankopɔn ‘suban so a ɔbɔɔ no’ no guu hɔ no. Ɔda so ara ma nnipa yɛ nneɛma a ɛmfata nnɛ, bere a wɔn ani nni wɔn ho so.

Nneɛma pii a wonim kyerɛkyerɛ nea enti a nnipa yɛ ade sɛnea wɔyɛ no mu. Awosu, faako a wɔte, adeyɛ ho ahofadi a wɔwɔ, nneɛma bi a ɛho hia a wonnya​—eyinom nyinaa ka nnipa nneyɛe. Sɛnea adwene no nyin wɔ mmofraase no nso ka wɔn kɛse. Nanso, nimdeɛ a onipa wɔ wɔ amemene no ho no fa ne mmofraase ho. Wɔtaa frɛ no ade a ɛyɛ nwonwa sen biara wɔ yɛn amansan a ɛyɛ nwonwa yi mu. Na Satan nkɛntɛnso nso wɔ hɔ.

Enti so yenim nea enti a nnipa yɛ ade sɛnea wɔyɛ no ankasa? Yenim ɛho nsɛm ahorow no bi, na pii nso wɔ hɔ a yennim. Nanso yenim ade titiriw no: Yɛn mu biara nni hɔ a otumi da ‘Onyankopɔn su ne ne suban’ no adi pɛpɛɛpɛ.

[Asɛm a wɔafa aka wɔ kratafa 9]

Wokunkum mmofra pii wɔ sukuu mu basabasayɛ mu wɔ 1970 ne 1973 ntam hɔ sen asraafo dodow a wokum wɔn wɔ Vietnam akodi no mu no

[Kratafa 10 mfoni]

TV de amumɔyɛ ne awudi hyɛ nnipa adwene mu fi mmofraase

[Kratafa 10 mfoni]

Mmofra a woturu wɔn ne nnwom a wɔde deda wɔn boa ma amemene no nyin