Nnwom A Ɛgyigye Denneennen Ne Wo nipadua

WƆ KRATAA bi a wɔato din “Adwene No ne Nnyigyei” mu no, Martin Polon a ɔwɔ Sukuupɔn a ɛwɔ California, Los Angeles, bɔ kɔkɔ sɛ nnipa a wɔtaa hyia gyegyeegye, te sɛ wɔn a wotie nnwom a ano yɛ den no betumi apira wɔn asõ. Polon kyerɛ sɛ ahokyere a ɛba nkwammoa a wɔwɔ mogya mu so betumi abu abɔ ho abien bere a obi tie nnwom a egyigye pii akyi no. Afei nso ebetumi apira awode, nneɛma a ɛma mogya di dwuma ne amemene no. Nipadua mu ahokyere a nnwom a egyigye denneennen pii de ba betumi ama mogya dwumadi akɔ soro na ama ntini ahorow ne koma no dwumadi ano abrɛ ase.

Polon bobɔ nneɛma afoforo a enye a nnwom a egyigye pii dodo de ba din, a ɔbarima ne ɔbea awode no dwumadi a ɛhaw no, ade a ɛtɔ obi so anaasɛ abiribiriw a ɛwɔ nnipa a wɔte ade nka ntɛmntɛm so, ade a ɛma etumi tɔ obi so ne anisokyin ka ho. Ɛsɛ sɛ mmea awofo hyɛ no nsow sɛ wɔaka sɛ epira akokoaa a ɔrenyin wɔ awotwaa mu no. Ɛwom ebia nhwehwɛmu pii ho behia ma wɔde akyerɛ sɛ ebia Polon nsɛm a ɔka no te saa anaasɛ ɛnte saa, nanso ansa na wɔbɛyɛ saa no, ɛda adi sɛ nyansa kwan no ne sɛ, ɛnsɛ sɛ wutie nnwom a wɔkɔ so bɔ no denneennen a wubetumi akwati no.