Canada Asennibea Kunini no Hyɛ Hokwan a Awofo Wɔ Mu Den

EFI NYAN! KYERƐWFO A ƆWƆ CANADA HƆ

SƐ AWOFO a mowɔ ɔdɔ no, sɛ mo ba hyia aduruyɛ ho ɔhaw a emu yɛ den a, ɛnyɛ nwonwa sɛ mobɛhaw na ayɛ dadwen ama mo. Hwɛ awerɛhyem ne awerɛkyekye a munya bere a nnuruyɛfo a wɔntoto wɔn adwuma ase a wɔwɔ mmɔborohunu ma kwan ma mopaw ayaresa a mopɛ! Nanso, tebea horow sɔre ma wɔde kateeyɛ yɛ ade bu ani gu nea awofo pɛ so. Eyi taa ma wonya osuahu a ɛyɛ awerɛhow.

Wɔ Canada no, mmofra yiyedi ho mmara ma aban mpanyimfo tumi ma wogye mmofra hwɛ wɔn. Amantam anan ma kwan ma aban no bɔ nea awofo pɛ no gu a wɔmfa nkɔ asennibea. Eyi ma nsɛmpɔw a ɛho hia ma awofo ne mmofra nyinaa sɔre. Gyinae ahorow bɛn na awofo na ɛsɛ sɛ wosi? Sɛ aban no paw sɛ ɛde ne ho begye awofo gyinaesi mu a, ɔkwan bɛn na ɛsɛ sɛ wɔfa so na ama awofo ne mmofra anya atɛntrenee a ɛho hia? So Amanyɔ Mmara bɔ awofo gyinaesi ho ban?

Asɛm bi puei wɔ March 3, 1995 The Toronto Star no mu, na ɛbɔɔ nsɛm yi mua de kaa asɛm bi a ɛfa abeawa bi a n’awo bere annu na wɔwoo no 1983 mu ho. Na n’awofo yɛ Yehowa Adansefo. “Na [wobegye] ayaresa dodow no ara atom, nanso wɔpow mogya. Nnuruyɛfo no kobisaa tumi krataa fii asennibea bi hɔ. Ɔtemmufo no maa Mmofra Mmoa Ahyehyɛde no tumi sɛ ɛnhwɛ abofra no so. Wɔamma akokoaa no mogya biara kosii adapɛn abiɛsa akyi, na wɔyɛɛ eyi de siesiee no maa n’aniwa ho nhwehwɛmu a na ɛho nhyɛ da nhia sɛ wɔbɛyɛ no oprehyɛn. Awofo no ampene so kosii sɛ wɔde asɛm no kɔɔ Asennibea Kunini no anim.”

Wobuaa asɛm no wɔ January 27, 1995 mu, na ɛwom sɛ Asennibea Kunini no ammɔ nea wɔyɛe wɔ 1983 mu no angu de, nanso atemmufo baakron no mu baanum de akwankyerɛ ahorow mae na amma wɔamfa aban tumi anni dwuma wɔ ɔkwammɔne so. Asennibea no gyinaesi hyɛ hokwan a awofo wɔ sɛ wosi aduruyɛ ho gyinae ma wɔn mma no mu den.

Ne titiriw no, Asennibea no gyinaa ɔsom mu ahofadi a Canadian Charter of Rights and Freedoms de ma no so susuw awofo gyinaesi ho. Ɔtemmufo Gerard La Forest a ogyinaa wɔn a wɔdɔɔso no ananmu no kae sɛ: “Hokwan a awofo wɔ sɛ wɔbɛtete wɔn mma sɛnea wɔn nyamesom mu gyidi kyerɛ, a aduruyɛ ne ayaresa foforo a wɔbɛpaw ka ho, no nso yɛ ɔsom mu ahofadi fã titiriw.”

Eyi ne bere a edi kan a Canada asennibea a ɛkorɔn sen biara no abu ntɛn sɛ hokwan a awofo wɔ sɛ wɔpaw ayaresa ma wɔn mma ka ɔsom mu ahofadi a ɛwɔ Charter no mu ho. Ɔtemmufo La Forest maa nnyinasosɛm yi mu daa hɔ pefee bere a ɔkaa eyi no: “Eyi nkyerɛ sɛ sɛ aban no bu no sɛ ɛho hia sɛ wɔbɔ abofra no ahofadi anaa n’akwahosan ho ban a, entumi mfa ne ho nnye asɛm no mu. Nanso ɛsɛ sɛ ɛkyerɛ sɛ ɛteɛ sɛ ɛde ne ho gye mu. Ɔkwan foforo so no, ɛsɛ sɛ Charter no bɔ awofo gyinaesi ho ban na ama asennibea ahorow no atumi ahwɛ aban ho a ɛde gye mu no yiye, ama kwan bere a ɛne gyinapɛn ahorow a Charter no gyina so no hyia nkutoo.”

Ɔtemmufo La Forest sii so dua sɛ ɛho hia sɛ wɔkyerɛ sɛ ɛteɛ sɛ wɔde ho gye awofo gyinaesi mu bere a ɔrebua asɛm bi a ne mfɛfo atemmufo baanu kae no: “Ebia wɔbɛte nsɛm a wɔkae no bi ase sɛ ɛkyerɛ sɛ wɔpene so sɛ wɔbɛbɔ hokwan a awofo wɔ no agu, esiane sɛ oduruyɛfo bi susuw sɛ ɛho hia sɛ wɔyɛ saa ara kwa nti. Sɛ oduruyɛfo bi tumi bɔ ɔwofo no nsusuwii gu a ɔnkyerɛ nea enti a ɛho hia sɛ ɔyɛ saa no a, ɛbɛhaw me yiye.”

Wɔdaa no adi sɛ awofo gyinaesi wɔ ayaresa ho yɛ hokwan a amanyɔ mmara de ma wɔ Canadian Charter of Rights and Freedoms no mu. Enti, wɔdaa aniberesɛm bi adi kyerɛɛ mmofra akwahosan ho adwumayɛfo ne atemmufo. Ɛsɛ sɛ wɔde ahwɛyiye yɛ ade na wɔkyerɛ obu a ɛfata ma hokwan ahorow a awofo wɔ no. Nnuruyɛfo a wɔntoto wɔn adwuma ase nso begye akwankyerɛ ahorow yi atom, efisɛ ɛfoa hokwan a awofo wɔ sɛ wɔpaw ayaresa afoforo a ɛfata, a ayaresa a mogya nka ho ma mmofra ka ho so.

Esiane mprempren akyinnyegye a ɛfa mogya a wɔde ma ne emu asiane a wonim ho, a AIDS ka ho no nti, obi betumi ahu nea asɛm a Ɔtemmufo La Forest kae no kyerɛ bere a ɔde eyi kaa ho no: “Asɛm a ɛhaw adwene a wɔn a wɔde asɛm no bɛdan yɛn no kae wɔ asɛm a aba seesei yi mu no ma asɛm a wɔtaa bisa wɔ fata a ayaresa a wogye ɛso mfaso wɔ aduruyɛ mu ho kyim kɛse no fata ho sɔre . . . Nanso, aduruyɛ mu adanse a wɔde mae wɔ 1983 mu . . . mma kwan sɛ yebegye hia a mogya hia ho kyim, ɛwom sɛ ebia anka saa bere no ebinom bɛpɛ sɛ wɔyɛ saa de. Nanso, asɛm a wɔde abɛdan yɛn yi kae yɛn sɛ ɛho hia sɛ wɔyɛ ahwɛyiye bere a wɔrebɔ nea awofo mpene so agu no.”—Yɛn na yɛasi ɔfã bi so dua no.

Asɛm a ɛwɔ The Toronto Star mu a yɛaka dedaw no baa awiei sɛ: “Dɛn na Asennibea Kunini no gyinaesi no atumi ayɛ? Nea edi kan no, seesei nnuruyɛfo, awofo, ne asetra yiyedi ho adwumayɛfo ne atemmufo anya bere a awofo ne nnuruyɛfo adwene nhyia ho akwankyerɛ ahorow. Nea ɛto so abien ne sɛ ɛsɛ sɛ aduruyɛ a wotumi paw nea wɔpɛ a wosii so dua no ma wotumi yɛ fakaa kɛse wɔ mogya a wɔde ma sɛ aduru ho no mu bere a wɔreyɛ nnuru a wɔde si mogya ananmu pii ma nkurɔfo nsa ka bi no. Nea ɛto so abiɛsa ne sɛ sɛ wosi gyinae sɛ wɔbɛsakra awofo no gyinaesi a, ɛsɛ sɛ wodi asɛm no wɔ ɔkwan a ɛfata so wɔ asennibea, na ɛyɛ aban ne atemmufo no asɛyɛde sɛ wɔde adanse bɛma de akyerɛ sɛ ɛho hia sɛ wɔde wɔn ho gye asɛm no mu sɛnea wɔkyerɛ no.”

Akyinnye biara nni ho sɛ nsase foforo so nnuruyɛfo, atemmufo, ne awofo behu sɛ akwankyerɛ a Canada Asennibea Kunini no mufo dodow no ara gyinaesi daa no adi no boa na ɛma nkɔso. Yɛhwɛ kwan sɛ nnuruyɛfo a wɔwɔ baabiara bɛkɔ so ahwɛ ayarefo wɔ tema ne ayamhyehye mu na wɔadwen hokwan a mmofra ne awofo nyinaa wɔ ho.