Betie Asɛm a Ɛma Wonya Anidaso Pa

BAGUAM kasa a wɔato din “Wɔyɛ Nneɛma Nyinaa Foforo—Sɛnea Wɔahyɛ Ho Nkɔm No,” a wɔbɛma wɔ Yehowa Adansefo “Onyankopɔn Nkɔmhyɛ Asɛm” Ɔmantam Nhyiam ase no bɛma wɔate saa asɛm yi. Nnipa pii wɔ anidaso sɛ adesamma benya nhyira wɔ afe 2000 a ɛreba no mu.

Sukuupɔn bi mu ɔbenfo bi kae sɛ, “mfirihyia apem a yerebɛhyɛn mu no bɛma yɛade yɛn ho afi afeha bi a ɔhaw ankasa wom ho.” Maclean’s nsɛmma nhoma no kae sɛ, “ɛwom sɛ afe 2000 no bɛyɛ kalanda so afe foforo kɛkɛ de, nanso ebetumi ayɛ mfe foforo a ɛyɛ anigye bi mfiase.” Nanso, osuahu a yɛanya no da no adi sɛ eyi rentumi nyɛ yiye.

Nnipa adi nkogu bere nyinaa wɔ mmɔden a wɔabɔ sɛ wɔbɛma yɛanya “asetra foforo” no mu. Ɛnde, yɛbɛyɛ dɛn atumi anya bɔhyɛ a Onyankopɔn de mae bɛboro mfe 1,900 a atwam ni a ɛse: “Hwɛ, meyɛ ade nyinaa foforo” no mu gyidi? (Adiyisɛm 21:5) Wɔde eyi ho ntease a edi mu bɛma wɔ baguam kasa a ɛyɛ anigye yi mu. Wubetumi akɔ beae a ɛbɛn wo akotie bi, efisɛ efi December mu no, wɔbɛma no wɔ nhyiam horow a wɔbɛyɛ wɔ Ghana nyinaa no ase.

Sɛ wopɛ sɛ wuhu baabi a wɔbɛyɛ nhyiam yi bi a ɛbɛn wo a, hu Yehowa Adansefo a wɔwɔ baabi a wote no, anaasɛ kyerɛw wɔn a wotintim nsɛmma nhoma yi no. Yɛn nsɛmma nhoma a ɛka eyi ho Ɔwɛn-Aban, no de mmeae a wɔbɛyɛ nhyiam no bi wɔ Ghana ne United States address ama wɔ February 15, 1999 de no mu.