Bra na Betie Baguam Asɛm No:

Atɛntrenee Ma Obiara Denam Onyankopɔn Temmufo A Wapaw No So

Nniso ahorow fi bere tenten ahwehwɛ sɛ wobenya ‘Atɛntrenee ama Obiara, te sɛ nea tete Helafo a wɔn atemmufo dii mmara mu nsɛm a emu yɛ den wɔ saa Areopago anaasɛ Mars Hill yi so no yɛe no. Wɔ saa asennibea yi wɔ bɛboro mfe 1,900 a atwam ni no mu no, ɔbarima bi kyerɛɛ sɛnea yɛn nyinaa benya nokware atɛntrenee. Wɔbɛpɛɛpɛɛ ne kasa no mu yiye wɔ Yehowa Adansefo “Ɔsoro Atɛntrenee” Ɔmantam Nhyiam ahorow a wɔbɛyɛ wɔ saa afe yi December mu no mu ɔkasa tititiw no mu.

Wubetumi atie saa ɔkasa yi wɔ nhyiam anan a wɔbɛyɛ wɔ Ghana ha no mu biako ase. Bible mu nkɔmmɔbɔ a eye a ɛfa asetra mu nsɛm ho ne Bible mu drama abien a wɔde kyerɛkyerɛ ka nhyiam no dwumadi ho.

Kɔ Yehowa Adansefo Ahenni Asa so kobisa bere ne beae a wɔbɛyɛ nhyiam a ɛbɛn wo no anaasɛ kyerɛw kɔma wɔn a wotintim saa nsɛmma nhoma yi no. Wɔ Ghana ha no, wɔbɛma ɔkasa no Kwasida 2:00 p.m.