Wodii Wɔn Bɔhyɛ So!

ANTONIO, a ɔwɔ n’afe a etwa to wɔ ntoaso sukuu mu no pɛe sɛ odi n’adesuakuw no mufo adanse. Enti ɔsrɛɛ ɔkyerɛkyerɛfo a ɔkyerɛ wɔn abakɔsɛm ho nneɛma no sɛ wonyi Jehovah’s Witnesses Stand Firm Against Nazi Assault video no ma wɔnhwɛ. Ɛwom sɛ na ɔkyerɛkyerɛfo no ani nnye adwene a ɛte saa ho de, nanso ɔkae sɛ sɛ ade kye a, obeyi video no.

Antonio kyerɛkyerɛ mu sɛ: “Mfitiase no, na ɔkyerɛkyerɛfo no bu video no sɛ nea mfaso biara nni so; nanso bere a ohui sɛ abakɔsɛm ho animdefo a wɔagye din reka Yehowa Adansefo a wɔde wɔn kɔɔ nneduaban ahorow mu ho asɛm no, ɔkyerɛɛ ho anigye kɛse. Bere a woyii video no wiei no, ɔdaa me ase.”

Wɔ wɔn adesua a edi hɔ mu no, ɔkyerɛkyerɛfo no bɔɔ mmɔden sɛ ɔbɛkyerɛkyerɛ Yehowa Adansefo a na saa bere no wɔfrɛ wɔn Bibelforscher wɔ Germany no dwumadi mu; nanso ohui sɛ ɛyɛ papa sɛ ɔbɛma Antonio ayɛ saa. Antonio kyerɛkyerɛɛ Adansefo no adwuma a wɔyɛ wɔ ɔmanfo no mu ne wɔn nkyerɛkyerɛ binom mu. Ɔde n’asɛm no baa awiei sɛ: “Nokwarem no, sɛ nkurɔfo antie yɛn na wɔka wɔn apon hwe mu, anaasɛ wɔankenkan yɛn nhoma ahorow no a, yɛn asɛm a ɛsom bo no so remma wɔn mfaso biara.”

Wɔn a Antonio ne wɔn gyina no nyinaa gyee asɛm a ɔkae no toom, na ɔkyerɛkyerɛfo no de nyansahyɛ bi maa wɔn. Ɛne sɛ, sɛ Adansefo no ba wɔn nkyɛn a, ade a edi kan koraa a wɔbɛyɛ ne sɛ wobetie wɔn na wɔagye wɔn nhoma ahorow no bi. Adesuakuw no kaa video no ho asɛm kyɛe kakra. Hwɛ sɛnea Antonio ani gyei bere a akyiri yi ohui sɛ ne mfɛfo sukuufo no pii kurakura Ɔwɛn Aban Asafo no nhoma reba sukuu na wɔn mu biara de anigye reka akyerɛ no sɛ: “Woahu, madi me bɔhyɛ so!”