Anigye A Ɛwɔ Nnomaahwɛ Mu

SƐ NNOMAA nni hɔ a, anka hwɛ sɛnea wiase no bɛyɛ soronko afa! Wɔn su, wɔn nnwonto, wɔn kɔla ne akwan a wɔfa so tu—eyinom nyinaa ma asetra yɛ anigye. Nanso mpɛn ahe na yegyina tie wɔn su hwɛ wɔn? Sɛ wote kuropɔn a adagyew nni da biara da asetra mu koraa na kar ahorow yɛ dede gu w’aso mu daa a, ebia wunhu nnomaa a wɔwɔ wo mpɔtam hɔ no mpo. Sɛ wonte kurow kɛse mu mpo a, ɛyɛ mmerɛw sɛ wubebu w’ani agu wɔn so. Na so wobɛpɛ sɛ wuhu wo mpɔtam hɔ nnomaa yiye?

Wubetumi ayɛ saa denam adekorade ketewa bi a wɔma nnomaa aduan wom a wode besi w’afikyiri wɔ wo mpomma akyi no so. Afei, nea wuhia ara ne ade a wɔde hwɛ ade wɔ akyirikyiri abien ne mfoninitwa afiri a ɛma wohu ade yiye ne boasetɔ kakra! Nya film a wɔde twa mfonini no pii ne nnomaa ho nhoma a wɔn mfonini wom a ɛbɛma woahu nnomaa ko a wɔyɛ. Afei hwɛ, tie, na ma w’ani nnye!