Ɛnanom Nnwuma Bebrebe No

Aanɔpa 4:50. Alex, akokoaa no, reda na ɔresu, ɔforo kɔda ne maame Helen nkyɛn. Mmofra baanu a wɔka ho​—Penny (5) ne Joanna (12)​—ne ne kunu Nick, ada. Helen pagya Alex to mpa so na ɔma no num nufu. Wantumi anna bio.

Anɔpa 5:45. Helen nantew brɛoo kɔ gyaade, ɔyɛ kafe nom, na ɔkenkan ade.

Anɔpa 6:15–​7:20. Nick sɔre. Helen nyan Penny ne Joanna, ɔyɛ anɔpaduan ne ofie nnwuma bi. Nick fi fie kɔ adwuma anɔpa 7:​15, na okosi Joanna wɔ sukuu. Helen maame ba bɛhwɛ Alex.

Anɔpa 7:30. Helen si Penny wɔ mmotafowa sukuu a ɔkɔ mu. Bere a Helen nam kwan so rekɔ adwuma no, onya hokwan susuw nea abaatanyɛ kyerɛ ankasa ho. Ɔka sɛ: “Ɛyɛ den sen adwuma biara a mayɛ pɛn.”

Anɔpa 8:10. Helen kɔto nnwuma pii a ɛretwɛn no wɔ adwumam. Nea odwen ho ne sɛ sɛ onyinsɛn bio a, ebetumi ama n’adwuma afi ne nsa. Akatua a ogye no ho hia abusua no.

Anɔpa 10:43. Bere a Helen de telefon no to so no—wɔfrɛ no ka ne mma ho asɛm kyerɛ no—ne yɔnko dwumayɛni, Nancy kyekye ne werɛ sɛ: “Worehwɛ wɔn yiye paa.” Ɛma nusu gu Helen.

Awia 12:05. Helen di paanoo a nneɛma hyem ntɛm so, na ɔkaakae bere a na onnya nwoo n’abakan no. Saa bere no na ɔhyehyɛ nneɛma a ɔbɛyɛ bere a “onni dwumadi biara” no to hɔ. Ɔde n’asɛm no ba awiei sɛ: ‘Anikasɛm ni!’

Anwummere 3:10. Bere a wɔafrɛ Helen aka nea Alex ayɛ wɔ fie nyinaa akyerɛ no wɔ telefon so akyi no, ɔka ɔne mmofra no ntam abusuabɔ titiriw no ho asɛm sɛ: “Minnyaa ɔdɔ a ɛte saa mmaa obiara pɛn.” Nkate a ɛte saa na aboa no ma wadi nsɛnnennen a ohyiae mfitiase no so.

Anwummere 5:10. Sɛ Helen kɔfa Joanna ba a, afei ɔkɔ mmeae a ɛsɛ sɛ ɔkɔ nyinaa. Ɔfrɛ Nick wɔ telefon so kae no sɛ adu no so sɛ ɔkɔfa Penny.

Anwummere 6:00–​7:30. Sɛ Helen du fie a, ogye ‘Alex ho adwuma’ no yɛ ma Nanabea no pɔn, na ɔyɛ ofie nnwuma, noa anwummeduan. Bere a wobisaa Helen nea nkokoaa hia ho asɛm no, oguu ahome kae sɛ: “Akokoaa hia ne maame biribiara: ne nsa, ne nipadua, ne nufusu, na ɔma ne nna tetew n’ani so.”

Anadwo 8:30–​10:00. Helen boa Joanna ma ɔyɛ sukuu dwumadi a ɔde aba fie, na ɔma Alex nufu. Bere a Nick de dɔnhwerew fã kenkan ade kyerɛ Penny no, Helen yɛ ofie nnwuma pii.

Anadwo 11:15. Bere a Penny ne Joanna akɔda no, Alex da so ara da ne maame nsa so a ɔnnae, nanso akyiri yi ɔda. Helen ka kyerɛ Nick a ɔretɔ nko no sɛ: “Ɛyɛ me sɛ afei de, ɔbɛda.”