Mibehuu Sɛ Onyankopɔn Nko Ara Na Obetumi Ayi Nsisi Afi Hɔ
Ursula Menne anom asɛm
Mekae paa sɛ, na ɛyɛ me koma so ade sɛ mehu sɛ obiara nsisi obiara, na obiara nso mmu obiara atɛnkyea. Wei nti, bere a Komunis aban di East Germany so no, wɔde me kɔtoo afiase. Na mepɛ sɛ mihu nea enti a nnipa sisi nkurɔfo saa. Anwonwasɛm, mannya ho mmuae wɔ baabiara sɛ afiase hɔ. Ma menkyerɛ mu nkyerɛ wo.
YƐWOO me afe 1922 wɔ Germany kurow bi mu. Yɛfrɛ hɔ Halle. Kurow no adi boro mfe 1,200. Ɛwɔ Berlin anaafo fam atɔe. Wufi Berlin rekɔ hɔ a, ɛyɛ akwansin 120 anaa kilomita 200. Saa bere no, baabi a na Protestantfo dɔɔso paa no, na Halle ka ho. Yɛwoo me nuabea Käthe wɔ afe 1923 mu. Na me papa yɛ sogyani, na na me maame to nnwom.
Sɛnea na ɛwɔ me mu paa sɛ mɛko atia nsisi ne ntɛnkyea no, misua fii me papa hɔ. Bere a me papa fii sogya adwuma no mu no, ɔtɔɔ sotɔɔ bi. Nnipa a na wɔtɔ nneɛma wɔ ne nkyɛn no, na dodow no ara yɛ ahiafo, enti na ohu wɔn mmɔbɔ de firi wɔn. Nanso, ne papayɛ nti, ɔbɔɔ ka buruburoo. Nea ɛtoo me papa no, na anka ɛsɛ sɛ ɛma mihu sɛ ɛnyɛ mmerɛw sɛ metu ntɛnkyea ne nsisi ase sɛnea na m’adwene yɛ me no. Mmabaawasɛm nti, na ɛyɛ den sɛ saa adwene no befi me mu.
Me maame kyerɛɛ me nnwonto ne asa. Ɛno na ɔde tetee me ne Käthe nyinaa. Meyɛ akwadaa no, na m’ani gye me ho paa. Me ne Käthe nyinaa, na nneɛma kɔ yiye ma yɛn paa kosii afe 1939.
Amanehunu Bere
Miwiee mfitiase sukuu no, metoaa so kɔɔ sukuu a yɛkyerɛ asa. Ɛhɔ nso na mikosuaa asa a yɛde kasa. Yɛfrɛ no Ausdruckstanz. Mary Wigman na na ɔkyerɛ saa asa no. Wɔn a wɔde saa asa no bae no, ɔka ho. Afei nso, misuaa sɛnea yɛyɛ mfoni. Enti me mmabaawabere mu de, ahyɛase no, na misua nneɛma bebree, na na ɛyɛ anigye nko ara. Nanso afe 1939 na Wiase Ko II bae maa biribiara dan butuwii. Afe 1941 nso, asɛm foforo too yɛn; nsamanwaw kum me papa.
Ɔko yɛ adeɛ bi a ɛyɛ hu paa. Bere a ɔko no bae no, na madi mfe 17 pɛ, nanso mihui sɛ wiase adan abutuw. Ɔman no mu nnipa a na wɔmpɛ wɔn ho asɛm no, afei deɛ na wɔde wɔn ho agye Nasifo aturuturasɛm no mu. Ɛkɔfaa ahokyere, awuwuawuwu, ne adesɛe bae. Aturuturafo bi bebubuu yɛn fie, na m’abusuafo bebree wuwuu wɔ ɔko no mu.
Bere a aturuturasɛm no twae wɔ 1945 mu no, na me ne me maame ne Käthe nyinaa da so ara wɔ Halle. Saa bere no, na maware awo abaayewa, nanso na m’aware ayɛ basaa. Me ne me kunu no, obiara faa ne baabi. Nea ɛbɛyɛ a metumi ahwɛ me ho ne me ba nti, na mesa gye sika, na na meyɛ mfoni nso gye sika.
Ɔko no akyi no, na Germany man no mu akyɛ nnan. Kurow a na yɛte mu no yɛ baabi a na Soviet Union di so. Enti, na ɛsɛ sɛ yɛn nyinaa sua sɛnea yɛbɛtena Komunis amammu ase. Afe 1949 no, baabi a na yɛte wɔ Germany, a na yɛtaa frɛ no East Germany no, ɛhɔ na ɛbɛyɛɛ German Democratic Republic (GDR) no.
Komunis Amammu
Saa bere no, me maame yaree, na na ɛsɛ sɛ mehwɛ no. Mekɔyɛɛ aban adwuma wɔ ɔfese. Saa bere no na mihyiaa sukuufo bi a wɔne aban no nyɛ adwene, enti wɔkaa ntɛnkyea a na ɛrekɔ so no bi ho asɛm. Sukuuni aberante bi sei, wɔkaa sɛ ne papa akɔdɔm Nasi amanyɔkuw no nti wɔremma no kwan mma no nkɔ suapɔn. Sukuuni no, na minim no paa, efisɛ me ne no nyinaa na na ɛbɔ nnwom. Nea mekaa no wɔ me tirim ne sɛ, ‘Adɛn nti na nea aberante no papa ayɛ nti, ɛsɛ sɛ ɔno aberante no hu amane?’ Nkakrankakra, mede me ho bɔɔ wɔn a wɔne aban nyɛ adwene no na afei deɛ, me ne wɔn te sii mmɔnten so yɛɛ ɔyɛkyerɛ. Ɛda bi deɛ, mede nkrataa kɔbobɔɔ kɔɔto dan bi stɛps ho.
Abaguakuw a ɛhwɛ ma asomdwoe ba no (Regional Peace Committee), me na na meyɛ wɔn kyerɛkyerɛwfo. Sɛnea na masi me bo sɛ mɛko atia nsisi ne ntɛnkyea no, nkrataa a na wɔma mekyerɛw no bi koraa na etutuu me. Bere bi nso, amanyɔsɛm nti, asomdwoe abaguakuw no yɛɛ sɛ wɔde Komunisfo ho nsɛm bi bɛkɔ akɔma papa bi a n’ani afi a ɔte West Germany. Na wɔn botae ne sɛ, wɔrekɔpɛ asɛm abrɛ no. Mihuu sɛ wɔpɛ sɛ wɔde asɛm to papa no so. Me bo fuwii paa, enti mesesaa saa nneɛma no de siee ɔfese hɔ. Enti nneɛma no ankɔ.
‘Onipabɔnefo a Ɔwɔ Dan Mu Hɔ’ Na Ɔmaa Minyaa Anidaso
June afe 1951 no, mmarima mmienu bi bɔ wuraa me ɔfese, na wɔka kyerɛɛ me sɛ: “Yɛakye wo.” Wɔde me kɔtoo afiase bi a yɛfrɛ no Roter Ochse anaa Red Ox. Afe akyi no, wɔbɔɔ me sobo sɛ meyɛ mammɔfo. Nkrataa bi a mede kɔbobɔɔ kɔɔto dan ho no, sɛɛ na sukuuni bi afa akyi akɔbɔ esum ase polisifo bi a yɛfrɛ wɔn Stasi amanneɛ. Sɛnea wodii m’asɛm no, na ɛyɛ serew kwa, efisɛ obiara antie m’ano asɛm. Enti wɔde me kɔtoo mu mfe nsia. Saa bere no, yare bi bɔɔ me, enti wɔde me kɔtoo ayaresabea wɔ afiase hɔ. Me ne mmea bɛyɛ 40 na na ɛda hɔ. Sɛnea mekɔtoo sɛ wɔayeyɛ bosabosaa no nti, me yam hyee me. Enti mituu mmirika, na mepomaa twɛdeɛ de kɔyeree ɔpon no mu.
Nea ɔhwɛ hɔ no bisaa me sɛ, “Dɛn na ɛhaw wo?”
Ɛnna meteɛɛ mu sɛ,“Munyi me mfi ha. Sɛ mode me nko ara bɛkɔ akɔto baabi a, momfa me nkɔ, anyɛ saa a, munyi me mfi ha!” Nanso, wammua me koraa. Ankyɛ na m’ani bɔɔ ɔbea bi so wɔ hɔ, na mihuu sɛ ɔno de, ɛsono sɛnea ɔte koraa. Wohwɛ n’anim a, wutumi hu sɛ ɔno de biribiara nhaw no. Enti mekɔtenaa ne nkyɛn.
Ɔkaa asɛm bi ma ɛyɛɛ me nwonwa. Ɔkaa sɛ: “Wuse wobɛtena me nkyɛn de a, ɛnde wowɔ asɛm bɔ no pɔ.” Ɔsan kaa sɛ, “Esiane sɛ meyɛ Yehowa Danseni nti, nkurɔfo adwene yɛ wɔn sɛ, mene onipabɔnefo a ɔwɔ dan mu ha.”
Saa bere no, na minnim sɛ Komunis Aban no de Yehowa Adansefo ato ɔtan kuruwa mu. Nea na minim fa wɔn ho ara ne sɛ, bere a meyɛ akwadaa no, na Bible Asuafo (saa na na wɔfrɛ Yehowa Adansefo saa bere no) mmienu bi taa ba me papa nkyɛn. Mekae sɛ, na me papa ka sɛ, “Bible Asuafo no asɛm no yɛ nokware!”
Bere a mihuu ɔbea yi a yɛfrɛ no Berta Brüggemeier no, m’ani gyei ara ma misui mpo. Meka kyerɛɛ no sɛ: “Mepa wo kyɛw, ka Yehowa ho asɛm kyerɛ me.” Efi saa bere no rekɔ no, na yegye bere bɔ nkɔmmɔ, na na yɛtaa sua Bible. Misuaa nneɛma pii faa nokware Nyankopɔn Yehowa ho. Ebi ne sɛ, ɔyɛ ɔdɔ Nyankopɔn, obu atɛntrenee, na ɔpɛ asomdwoe. Mesan nso suae sɛ, nneɛma bɔne a nnipa abɔnefo ne atirimɔdenfo ayɛ nyinaa, ɔbɛsan ayɛ ne nyinaa yiye. Dwom 37:10, 11 ka sɛ: “Aka kakraa bi na nnebɔneyɛfo nni hɔ bio; . . . Ahobrɛasefo na asaase no bɛyɛ wɔn dea, na wobegye wɔn ani wɔ asomdwoe bebree mu.”
Woyii Me, Na Miguan Kɔɔ West Germany
Midii mfe nnum ne kakra wɔ afiase hɔ, ɛnna woyii me afe 1956. Woyii me no, nnanum akyi na meguan fii GDR kɔtenaa West Germany. Saa bere no, na mawo mmaayewa mmienu. Yɛfrɛ wɔn Hannelore ne Sabine. Me ne wɔn nyinaa na ɛkɔe. Mekɔɔ hɔ no, me ne kunu gyaee aware, na mesan hyiaa Yehowa Adansefo no bio. Bere a migu so resua Bible no, mihui sɛ ehia sɛ meyɛ nsakrae pii wɔ m’abrabɔ mu sɛnea ɛbɛyɛ a m’abrabɔ bɛsɔ Yehowa ani. Meyɛɛ nsakrae no, ɛnna mebɔɔ asu afe 1958.
Akyiri yi, mesan waree. Saa bere yi deɛ, mewaree Yehowa Danseni bi a yɛfrɛ no Klaus Menne. Me ne Klaus aware no, na ɛyɛ fɛ paa. Yɛwoo mma mmienu. Yɛfrɛ wɔn Benjamin ne Tabia. Bɛyɛ mfe 20 ni na Klaus wuu yayaayaw wɔ akwanhyia bi mu. Efi saa bere no besi nnɛ nyinaa, mayɛ kunafo. Nanso owusɔre anidaso no kyekye me werɛ, efisɛ minim sɛ wobenyan awufo ama wɔabɛtena Paradise asaase so. (Luka 23:43; Asomafo Nnwuma 24:15) Me mma nnan no nyinaa resom Yehowa, na ɛno nso ma me awerɛkyekye paa.
Ɛyɛ me dɛ paa sɛ misuaa Bible. Mabehu sɛ Yehowa nko ara na obetumi ama atɛntrenee paa aba wiase. Yehowa deɛ, ɔnte sɛ nnipa. Ɔno deɛ, onim yɛn ho biribiara; onim sɛnea yɛte. Nneɛma a nnipa nhu mpo, ɔno deɛ, onim ne nyinaa. Saa ntease no ama manya asomdwoe ɛnnɛ yi mpo, ɛnkanka ne bere a mihu sɛ nsisi ne atɛnkyea rekɔ so, anaa bere a obi de bi adi me. Ɔsɛnkafo 5:8 ka sɛ: “Sɛ wuhu sɛ wɔhyɛ ohiani so, na wɔkyea atemmu, na wɔdan trenee ani wɔ mantam bi mu a, mma wo ho nnnwiriw wo saa asɛm no ho, na nea ɔso no, nea ɔso sen no hwɛ no, na nea ɔso koraa no rehwɛ wɔn nyinaa.” (The Revised English Bible) Akyinnye biara nni ho sɛ, nea “nea ɔso koraa no” ne Ɔbɔadeɛ no. Hebrifo 4:13 ka sɛ: “Nneɛma nyinaa ho da hɔ, na ɛso abue pefee wɔ nea ɛsɛ sɛ yebu akontaa kyerɛ no no anim.”
Nea Ɛkɔɔ So Bɛyɛ Mfe 90 Ni
Ɛyɛ a nkurɔfo bisa me sɛ, bere a na Nasifo ne Komunis aban di tumi no, sɛn na na asetena te? Nasi aban oo, Komunis aban oo, emu biara nni hɔ a na nnipa wɔ ahotɔ. Saa aban mmienu no, ne aban a aka nyinaa ma yehu sɛ, nnipa rentumi nni ne yɔnko nnipa so mma no nsi no yiye. Bible ka no turodoo sɛ: “Onipa di onipa so ma ewie no bɔne.”—Ɔsɛnkafo 8:9.
Bere a meyɛ akwadaa a na minnim hwee no, na minim sɛ nnipa ahenni bi de atɛntrenee bɛba. Nanso seesei deɛ, mahu sɛ nnipa ahenni biara nni hɔ saa. Mmom, Ɔbɔadeɛ no nko ara na obetumi de atɛntrenee ankasa aba wiase. Nea ɔbɛyɛ ama atɛntrenee aba ne sɛ, obetu abɔnefo nyinaa ase afi asaase so, na wama ne Ba Yesu Kristo adi asaase so hene. Yesu deɛ, odwen nnipa ho; ɔde nea ɔpɛ to nkyɛn yɛ nkurɔfo deɛ ma wɔn. Bible ka Yesu ho asɛm sɛ: “Wodɔɔ adetrenee, na wukyii mmarato.” (Hebrifo 1:9) Ɛyɛ me dɛ paa sɛ Onyankopɔn ama mahu Ɔhene nwonwafo a obu atɛntrenee yi. Mehwɛ kwan sɛ mɛtena ase daa wɔ n’ahenni ase!
[Mfoni]
Me ne me mma mmaayewa Hannelore ne Sabine; bere a yeduu West Germany no
[Mfoni]
Ɛnnɛ, me ne me ba barima Benjamin ne ne yere Sandra