Adɛn Nti Na Nkurɔfo Nni Obu Mma Wɔn Abusuafo?

NEA ENTI A EHIA SƐ YENYA OBU MA YƐN ABUSUAFO

• Nhoma bi a wɔato din The Seven Principles for Making Marriage Work ka sɛ, sɛ obi bu ne hokafo a, ɔyɛ nneɛma bi de kyerɛ sɛ n’ani gye ne ho; “ɛnyɛ nneɛma akɛseakɛse a ɔbɛyɛ na ɛbɛkyerɛ, na mmom nneɛma nketenkete a ɔbɛyɛ no daa.”

• Nhwehwɛmu ama abɛda adi sɛ, sɛ mmofra sua sɛ wɔbenya obu ama afoforo a, ɛma wɔte nka sɛ wɔn so wɔ mfaso, wɔne wɔn awofo ntam yɛ papa, na adwinnwen ntaa nhyɛ wɔn so.

NEA WUBETUMI AYƐ

Wo ne w’abusua mmom nyɛ nhyehyɛe. Nea edi kan, sɛ yɛka “obu” a, hwɛ hu sɛ wo ne w’abusua nyinaa nim nea ɛkyerɛ. Nea ɛtɔ so mmienu, suban a mopɛ sɛ abusua no mufo da no adi, ne nea mompɛ sɛ wɔda no adi no, kyerɛw to hɔ. Nea ɛtɔ so mmiɛnsa, wo ne w’abusua mmom nsusuw nhyehyɛe a moayɛ no ho, na ama obiara ahu nea obetumi ayɛ de akyerɛ sɛ obu ade.

Di kan yɛ wei ho nhwɛso. Sɛ w’abusuafo di mfomso a, woteɛteɛm gu wɔn so anaa? Sɛ wɔrekyerɛ wɔn adwene a, wotweetwee wɔn? Anaa, sɛ wɔrekasa wo ho a, ɛyɛ a womfii wɔn anaa wutwa wɔn ano?

Nyansahyɛ: Bɔ mmɔden hu obu sɛ, ɛyɛ biribi a ɛsɛ sɛ wode ma wo hokafo ne wo mma, na ɛnyɛ sɛ, ehia sɛ wɔyɛ biribi ansa na woabu wɔn.

Sɛ wo ne obi nyɛ adwene mpo a, da obu adi kyerɛ no. Ɛyɛ a nka nsɛm bi te sɛ, “Wo de, daa . . . ” anaa, “Wo de, da koro koraa nni hɔ a . . . ” Sɛ yɛka nsɛm a ɛyɛ yaw saa kyerɛ yɛn abusuafo a, ebetumi ahye wɔn na ama asɛm a ɛnyɛ asɛm mpo adan asɛm kɛse.

NEA YƐREYƐ

Yehowa Adansefo hyɛ mmusua nkuran sɛ wɔnnya obu mma wɔn ho, na yɛtaa ka ho asɛm wɔ yɛn nhoma ne video ahorow mu. Obiara nsa betumi aka bi a ontua hwee.

NEA YƐDE BOA AWAREFO: Nsɛm a ɛba toatoa so a yɛato din Mmoa a Wɔde Ma Abusua No betumi aboa okununom ne ɔyerenom ama . . .

• wɔayɛ atiefo pa

• wɔagyae akayɛ

• wɔagyae akasakasa

(Hwehwɛ ɔfã a yɛato din “Mmoa a Wɔde Ma Abusua No” wɔ jw.org)

NEA YƐDE BOA AWOFO: Nsɛm a ɛba toatoa so a yɛato din Mmoa a Wɔde Ma Abusua No betumi aboa awofo ama wɔahu sɛnea wɔbɛtete wɔn mma ama . . .

• wɔayɛ osetie

• wɔaboa wɔ fie nnwuma mu

• wɔaka “mepaakyɛw” ne “medaase”

(Hwehwɛ afã a yɛato din “Mmofra Ntetee” ne “Mmabun Ntetee.” Ɛwɔ jw.org)

Hwɛ nkekaho a ɛwɔ nhoma a yɛato din Questions Young People Ask—Answers That Work, Volume 1 mu. Nkekaho no asɛmti ne “Questions Parents Ask” [Nsɛm a Awofo Bisa]. (Hwehwɛ “Questions Parents Ask” wɔ jw.org)

NEA YƐDE BOA MMABUN: Mmerante Ne Mmabaa afã a ɛwɔ jw.org no, wokɔ hɔ a wubenya nsɛm, video, ne dwumadi nkrataa a ebetumi aboa mmabun ama . . .

• wɔne wɔn nuanom ne wɔn awofo atena asomdwoe mu

• wɔahu sɛnea wɔne wɔn awofo bɛka mmara a wɔahyehyɛ ama wɔn no ho asɛm wɔ obu mu

• wɔahu nea wɔyɛ a ɛbɛma wɔn awofo agye wɔn adi

(Hwehwɛ ɔfã a yɛato din “Mmerante Ne Mmabaa” wɔ jw.org)

Wokɔ jw.org wɛbsaet so a worentua hwee. Afei nso, ɛho renhia sɛ wokyerɛw wo ho nsɛm wɔ wɛbsaet no so ansa na woatumi akɔ so.