ADESUA 18

Ma W’atiefo Nsua Biribi Foforo

1 Korintofo 9:19-23

NSƐNTITIRIW: Kanyan w’atiefo ma wonnwen asɛm a woreka no ho sɛnea ɛbɛyɛ a wɔbɛte nka sɛ wɔasua biribi a mfaso wɔ so.

Nea w’atiefo nim dedaw no, susuw ho. Sɛ wo ne w’atiefo resusuw asɛmti bi ho a, sɛ́ anka wubetĩ nsɛm a wonim no mu kɛkɛ no, boa wɔn ma wonsusuw asɛmti no ho wɔ ɔkwan foforo so.

Sɛ woreka nsɛm bi a w’atiefo nim dedaw a, nsɛe bere wɔ ho, nanso sɛ woreka asɛm bi a wɔnhyɛ da nnim a, tɔ wo bo ase kyerɛkyerɛ mu.
Yɛ asɛm no mu nhwehwɛmu na dwinnwen ho. Sɛ ɛbɛyɛ yiye a, fa nsɛm a w’atiefo nhyɛ da nnim, ne nsɛm bi a esisii nkyɛe kyerɛkyerɛ nsɛntitiriw mu. Dwinnwen asɛm a worekɔkyerɛkyerɛ mu no ho yiye, na hwɛ sɛnea ɛne nsɛm a wopɛ sɛ wode kyerɛkyerɛ mu no hyia.

Bere a woresiesie wo dwumadi no, bisa wo ho nsɛm bi te sɛ ‘ɛdɛn, adɛn nti, bere bɛn, ɛhefa, hena, ne ɔkwan bɛn so,’ na aboa wo ama woasusuw asɛm no ho yiye. Wo dwumadi no nyinaa mu nso, bisa nsɛm a ɛtete saa na ma ho mmuae. Ɛno bɛma wo nkyerɛkyerɛ no ayɛ anika.
Ma w’atiefo nhu mfaso a ɛwɔ asɛm a woreka no so. Sɛnea Bible mu nsɛm betumi aboa w’atiefo wɔ wɔn da biara da asetenam no, kyerɛkyerɛ mu. Hwɛ nneyɛe, suban ne tebea pɔtee bi a ɛfa w’atiefo ho, na wo ne wɔn nsusuw ho.