So Adwumadenyɛ De Anigye Ba?

BUNPEI Otsuki a ɔyɛ adwumawura kɛse bi wɔ Japan no bisae sɛ: “Ne nyinaa mu no, adwuma ne onipa biribiara, ɛnte saa?” Ná ɔrekyerɛkyerɛ nea enti a wampɛ sɛ ɔkɔ akwamma ahohuru bere mu no mu. Ne nsɛm no yɛ nea Japanfo a wɔsan hyehyɛɛ ɔman no fii ne ɔko akyi basabasayɛ no mu no taa ka. Wɔaka Japanfo ho asɛm sɛ nkurɔfo a wɔyɛ adwumaden fi bere a Po so Hyɛn mu panyin Perry a ofi United States no kobuee Japan wɔ ne ntewho bere tenten no mu no. Na wɔhoahoa wɔn ho sɛ wɔyɛ adwumadenyɛfo.

Nanso, mprempren wɔkasa tia Japanfo sɛ wɔyɛ adwuma dennen dodo, a wɔn na wɔde nnɔnhwerew pii yɛ adwuma wɔ afe no mu sen biara wɔ aman a wɔka sɛ wɔanya mfiridwuma mu nkɔanim no mu. Japan nniso no rebɔ mmɔden sɛ ebeyi adwuma a wɔyɛ pii su no afi hɔ. Atesɛm krataa bi asɛmti kenkan sɛ: “Adwumayɛ Asoɛe Se ‘Munnyae Adwumadenyɛ Pii No.’” Wɔ asoɛe no 1987 ahohuru bere mu akwamma ho ɔsatu fene mu no, ɛkɔɔ so kae sɛ, “Akwamma a wobɛkɔ no yɛ adwuma a wunim no ho adanse.” Ɔkwan foforo so no, nniso no rebisa ɔman no sɛ, “Dɛn nti na moyɛ adwuma dennen saa?”

Nokwarem no, ɛnyɛ Japanfo nyinaa na wɔyɛ adwumadenyɛfo a woyi wɔn yam. Nnansa yi Japan Productivity Center (dwumadibea a ɛhwɛ adwumayɛfo abasow so) no nhwehwɛmu bi a wɔyɛe wɔ adwumayɛfo bɛboro 7,000 mu no daa no adi sɛ wɔn mu ɔha biara mu 7 pɛ na wɔde wɔn adwuma di wɔn ankasa asetra kan. Wohu sɛnea eyi te saa no wɔ aman afoforo nso mu. Wɔ Germany no, Allensbacher Institut für Demoskopie no hui sɛ Germanfo a wɔadi mfe 18 kosi 29 no mu ɔha biara mu 19 pɛ na wɔkyerɛe sɛ woyi wɔn yam yɛ adwuma a wɔn akatua mfa ho.

Sɛ wɔde toto mmofra a wɔyɛ anihaw no ho a, adwumayɛfo a wɔyɛ ahɔho wɔ Japan no yɛ adwumaden koraa. Adwumawura bi a ɔwɔ Tokyo kamfo n’adwumayeni Algeriani bi a ɔyɛ adwuma a ɛhwehwɛ sɛ ɔde ne nsa yɛ no kɛse. Ose: “Japanfo renhwehwɛ adwuma a ɛte saa, na sɛ wɔhwehwɛ mpo a, wobegyae ntɛm ara.” Dabi, wɔamfa nsiyɛ anwo Japanfo a wɔyɛ adwumaden no mpo. Sɛ nkurɔfo bɛyɛ adwumaden a, ɛsɛ sɛ ɛyɛ nea nkanyan bi a emu yɛ den wɔ hɔ.

Nea Enti a Wɔyɛ Adwumaden

Germanfo atesɛm krataa Der Spiegel a ɛba dapɛn biara no bɔ amanneɛ sɛ: “Ahonya, asetra pa, agyapade, ne wiase no mu nkɔso a wobenya”​—eyinom ne nneɛma a Germanfo a wɔyɛ adwumaden no hwehwɛ. Yiw, pii yɛ adwuma dennen de pɛ ahonya sɛnea ɛbɛyɛ a wobetumi anya asetra pa bi. Afoforo yɛ adwuma dennen a botae no ne sɛ “wobenya wiase no mu nkɔso” anaasɛ adwumam panyin. Wɔn a nhomasua nhyehyɛe a akansi wom kanyan wɔn dennen ma wodi botae horow a ɛtete saa no akyi no mma mmɛyɛ wɔn a wɔsen afoforo no biara wɔ adwuma mu​—wɔbrɛ wɔn ho na wonnu baabiara. Nanso, ɛnyɛ sika ne dibea nkutoo nti na nkurɔfo yɛ adwumaden. Adwuma ara kwa nti na ebinom yɛ adwuma. Wɔ wɔn fam no, adwuma ne biribiara. Afoforo ani gye wɔn adwuma ho. Haruo gye tom sɛ: “M’ani gyee nea na meyɛ wɔ me nhwehwɛmu dan mu no ho araa ma ɛkaa honhom fam nneɛma akyi a medi no hyɛe.”

Afei wɔn a wɔatu wɔn ho ama nneɛma ahorow a ɛsom bo a wɔyɛ de som afoforo ma wonya yiyedi no nso wɔ hɔ. Wɔyɛ adwumaden de gye nkwa. Sɛ nhwɛso no, obi a odum gya yɛ adwumaden da biara de siesie ne mfiri ahorow.

Nanso so eyinom nyinaa yɛ ntease pa a enti ɛsɛ sɛ wɔyɛ adwuma dennen? So ɛde anigye bɛba? Nokwarem no, adwuma bɛn na ebetumi ama w’ani agye ankasa?