Dɛn Nti Na Ɛsɛ Sɛ Wugye Nsusuwii Afoforo Tom?

BERE a kusukuukuu bi a ayɛ te sɛ mmɔhɔɔ retetew nkakrankakra no, Amerikani po so asraafo panyin Matthew C. Perry gyina n’akohyɛn a wɔfrɛ no Susquehanna no abrannaa so hwɛɛ Bepɔw Fuji. Ná ne kɔn adɔ akyɛ sɛ obehu Japan, na afei de wɔ bɛboro asram ason po so akwantu akyi no, wabedu hɔ July 8, 1853 mu. Na po so asraafo panyin no ahwehwɛ ɔman no ho amanneɛbɔ biara a ne nsa aka no mu. Dɛn ntia? Efisɛ na ɔwɔ anidaso sɛ obebue saa “ahemman a atew ne ho yi” ano kwan ama wiase.

Na atew ne ho ampa! Bɛboro mfirihyia 200 nen no, na Japan atwa ɛne aman nyinaa aguadi ne amammerɛ ho nkitahodi mu gye sɛ China, Korea, ne Holland. Afei ɔman no traa ne ho ase a obiara nhaw n’adwene. Wɔ saa tebea no mu no, na ɛte sɛ ankorankoro binom a wɔsɔre tia nsusuwii afoforo na wɔpow sɛ wobetie adwenkyerɛ ahorow a ɛne wɔn de bɔ abira biara no. Akwan bi so no, eyi betumi ayɛ ahotɔ efisɛ nsusuwii afoforo tumi ma obi yɛ basaa, ɛbɔ hu mpo. Nanso so nyansa wɔ gyinabea a ɛte saa mu? Wiɛ, susuw nea efii Japan ntewho no mu bae no ho.

Dɛn na Ɛde Japan Ntewho no Bae?

Japan antew ne ho kwa. Wɔ 1549 mu no, Jesuitni Francis Xavier beduu Japan sɛ ɔrebɛtrɛw ne som mu. Bere tiaa bi mu no, Roman Katolekfo gyidi no begyee ntini wɔ asase no so. Ná saa bere no mu sodifo no ahu Buddafo fekuw bi nyamesom mu atuatew pɛn na wohui sɛ Katolekfo no nso betumi ayɛ saa ara. Enti, wɔbaraa Katoleksom, ɛwom sɛ wɔanhyɛ bara a wɔabara no mu katee de.

Esiane sɛ na sodifo no ka sɛ Japan yɛ “ɔsoro ɔman” nti, na wɔnyɛɛ wɔn adwene sɛ wɔbɛma kwan ma “Kristofo” som bi abehunahuna wɔn nhyehyɛe no. Ɛnde dɛn nti na wɔanhyɛ Katoleksom a wɔbarae no mu katee? Efisɛ Katolek asɛmpatrɛwfo de Portuguesefo aguadi ahyɛn na ɛbae, na na nniso no pɛ mfaso a na saa ahyɛn no de bɛbrɛ wɔn no. Nanso, nkakrankakra no, suro a na sodifo no suro sɛ Katolekfo benya Japanfo so nkɛntɛnso no boroo aguadi ho akɔnnɔ a na wɔwɔ no so. Enti, wɔhyehyɛɛ mmara ahorow de yeree amannɔne aguadi, atutradi, ne “Kristofo” sodi mu.

Bere a “Kristofo” a wɔtaa wɔn na wɔn ho akyere wɔn no tew atua tiaa asase wura bi no, ɛsɛee asɛm no koraa. Esiane sɛ wobuu ɔsɔretia no sɛ ɛyɛ nea afi Katolekfo dwumadi mu aba no nti, Shogunate nniso titiriw no tuu Portuguesefo no na wɔhyɛɛ Japanfo sɛ mma wɔnnkɔ aburokyiri. Bere a wɔhyɛɛ saa mmara yi wɔ 1639 mu pɛ no, Japan ntewho no bɛyɛɛ ade paa ara.

Atɔe famfo a wɔmaa kwan ma wɔkɔɔ so ne Japan dii gua ne Dutchfo a wɔkaa wɔn hyɛɛ Dejima a saa bere no na ɛyɛ supɔw ketewaa bi wɔ Nagasaki hyɛn gyinabea so no nkutoo. Wɔ mfirihyia 200 mu no, Dejima a na wɔasan agye no so nkutoo na Atɔe famfo amammerɛ nam hyɛnee Japan. Afe biara no, na supɔw no so aguadibea no kwankyerɛfo de “Dutch Amanneɛbɔ” ma a ɛno na ɛmaa nniso no huu nea ɛrekɔ so wɔ wiase a aka no mu. Nanso Shogunate nniso no hwɛ hui sɛ obi foforo biara renhu amanneɛbɔ ahorow yi. Enti Japanfo no tew wɔn ho kosii sɛ Po so asraafo Panyin Perry bɛbɔɔ wɔn pon mu wɔ 1853 mu.

Ntewho no Awiei

Bere a Perry ahyɛn akɛse tuntum no begyinagyinaa Edo Ɛpo Faka no mu no, epuw wusiw na ɛhɔfo apofofo a na wosusuw sɛ eyinom yɛ ogya mmepɔw a ɛnantew no ho dwiriw wɔn kɛse. Edo (mprempren Tokyo) kurow no mufo bɔɔ hu, na pii de wɔn ɔdan mu nneɛma guan fii kurow no mu. Na saa tukɔ yi so araa ma na ɛsɛ sɛ nniso no ka biribi de dwudwo nnipa no bo.

Ɛnyɛ suwusiw ahyɛn a ɛhyɛ Po so asraafo Panyin Perry ase no nkutoo na ɛmaa nkurɔfo a wɔatew wɔn ho no ho dwiriw wɔn na mmom akyɛde ahorow a ɔde bae no nso. Sɛnea wɔnam nhama so de nkrasɛm ma fi ɔdan biako mu kɔ foforo mu a wɔyɛ kyerɛɛ wɔn no nso yɛɛ wɔn nwonwa. Narrative of the Expedition of an American Squadron to the China Seas and Japan a wɔboaboaa ano wɔ Perry akwankyerɛ ase no ka Japanfo mpanyimfo bi a wɔantumi anhyɛ wɔn ho so na wohuru gyinaa keteke ketewa bi a “ɛyɛ den sɛ ebetumi afa abofra a wadi mfe asia” so no ho asɛm. Ɔpanyin onuonyamfo bi mpo to sinsɛn ne suhyɛ no so “a na ne ntade hugyaa no rehuw wɔ wim.”

Awiei koraa no wobuee Japan apon wiei denam Perry nsrahwɛ a ɛto so abien afe a edi hɔ no so. Bere a nniso no gyaee ne ho mu maa nhyɛso no, wobuee ɔman no ahye. Ntewhofo a wɔn asɛm yɛ den yiye a na wɔpɛ sɛ wɔkora Japan ho a watew no so no dan kɔɔ amumɔyɛ so, wokum nniso no soafo panyin, na wotuatuaa ahɔho. Ntewhofo akɛsefo bi totoo amannɔne ahyɛn tuo. Nanso, nkakrankakra no, wɔn ntua no ano brɛɛ ase, na ɔhempɔn no gyee nniso no fii Tokugawa Shogunatefo no nsam.

Ebeduu bere a Perry buee Japan apon no, na Atɔe fam aman no afa Mfiridwuma Anidan no mu dedaw. Esiane Japan ntewho no nti, na waka akyi. Na aman a wɔanya mfiridwuma mu nkɔanim no atumi de huhuw mu tumi adi dwuma. Ɛde bedu 1830 mfe no mu no, na wɔde wusihyɛn ne mfiri di dwuma pii. Na Japan ntewho no ama waka akyi wɔ mfiridwuma mu. Japanfo ananmusifo a wodii kan kɔɔ Europa no na wɔtee eyi mu nka kɛse. Wɔ oyikyerɛ bi a wɔyɛe wɔ London wɔ 1862 ase no, na wɔde nkrataa ne nnua na ayeyɛ Japanfo nneɛma a wɔde bɛkyerɛe a sɛnea ɔnanmusifo bi a na wayɛ basaa kae no, na “ɛte sɛ nea wɔde begu tete nneɛma aguadidan bi mu.”

Japan ananmusifo a wɔkɔɔ Europa ne United States tee nka kɛse sɛ ɛsɛ sɛ wɔde mfiridwuma kɔ wɔn man no mu na wɔde nneɛma a wɔayeyɛ no foforo ne nsusuwii afoforo kɔɔ hɔ. Perry nsrahwɛ no akyi mfe aduosia anan no, n’akwantufo kuw no muni biako pɛ a na ɔda so te ase no kɔsraa Japan na ɔkae sɛ: “Japan nkɔso wɔ mfe aduosia pɛ mu no yɛɛ me nwonwa.”

Enti, Japan ntewho no maa ne nkɔso so tewee kɛse. N’apon a ebuei na egyee nsusuwii afoforo toom no ho baa ɔman no mfaso wɔ akwan pii so. Nanso, ɛnnɛ, ebinom a wɔwɔ Japan no de nsa kyerɛ “adwene mu ntewho” a ɛwɔ ankorankoro bi mu so na wɔka sɛ eyi sɛ asɛnnennen a ɛsɛ sɛ wodi ho dwuma. Nokwarem no, nsusuwii afoforo a wɔsɔre tia ho su a wɔbɛko adi so no nyɛ nnɛyi Japanfo nkutoo de na mmom adesamma nyinaa. Na wo ne “adwene mu ntewho” no nso ɛ? So wubenya mfaso afi nsusuwii afoforo a wubegye atom no mu, sɛnea Japan yɛe wɔ 1850 mfe no mu no?