So Onyankopɔn Bua Wo Mpaebɔ?
“ƆBEA bi a ɔte Hokkaido, Japan, kae sɛ: “Mentee nka da sɛ wɔabua me mpaebɔ da.” Ɛnyɛ ne nkutoo na ɔte nka saa. Nnipa pii te nka sɛ wommuaa wɔn mpaebɔ da. Nokwarem no, ebia worebisa sɛ Onyankopɔn bua wo mpaebɔ anaa.
Nnipa ɔpepem pii bɔ anyame pii mpae. Dɛn nti na ɛte sɛ nea wommua mpaebɔ pii? Nea ɛbɛyɛ na yɛahu no, ma yenni kan nhwehwɛ mpae ahorow a wɔbɔ no mu.
Dɛn na Ebinom Bɔ Mpae Bisa?
Japanfo nkyem abiɛsa mu abien, anaa nnipa bɛyɛ ɔpepem 80 bɔ mpae wɔ Shintofo abosonnan mu anaasɛ Budhafo asɔrefi wɔ Afe Foforo bere no mu. Wɔde sika pa ma sɛ ayɛyɛde, na wɔbɔ mpae bisa ahonyade ne abusua ahobammɔ.
January ne February mu—ansa na wɔbɛyɛ wɔn sɔhwɛ denneennen a wɔde hwehwɛ kwan akɔ kɔlege no—sukuufo pia wɔn ho kɔhyɛ abosonnan te sɛ nea ɛwɔ Tokyo a ne nhomasua nyame ama agye din no mu. Wɔkyerɛw nea wɔpɛ no wɔ mpaebɔ nnua tratraa bi so na wɔde sensɛn abosonnan no ho nnua adaban so. Anyɛ yiye koraa no, wɔde mpaebɔ nnua 100,000 sensɛn abosonnan bi a agye din yiye wɔ Tokyo no mu wɔ sɔhwɛ a wɔyɛe wɔ 1990 no mu.
Wɔde mpaebɔ pii bisa akwahosan. Nkurɔfo bɔ mpae de bisa AIDS ho ahobammɔ wɔ abosonnan mu wɔ Kawasaki, Japan. Abosonnan no sɔfo kyerɛkyerɛɛ mu sɛ: “Atirimpɔw nti a wɔbɔ mpae bisa AIDS ho ahobammɔ ne sɛ ɛbɛma nnipa ahwɛ yiye wɔ wɔn abrabɔ mu.” Nanso nea mpaebɔ kyerɛ nyinaa nen?
Wɔ asɔredan foforo mu no, aberewa bi bɔɔ mpae sɛ onhyia “ɔpatuwu.” Dɛn ntia? Efisɛ ɔmpɛ sɛ ɔbɛyare ada hɔ akyɛ, na ɔmpɛ sɛ ɔbɛyɛ adesoa ama n’abusua.
Wɔ ɔman bi a emufo kyerɛ sɛ wɔyɛ Kristofo mu no, bɔɔlbɔfo kuw bi panyin bɔɔ mpae sɛ ne kuw no nni nkonim na wɔmmɔ wɔn ho ban na wɔampira. Poland Katolekfo bɔ wɔn ankasa yiyedi ho mpae, na wogye di sɛ wɔatie wɔn mpaebɔ a, wɔde agude hyehyɛ wɔn Madonna no. Nnipa pii tu yuu kɔ asɔre adan te sɛ Guadalupe a agye din a ɛwɔ Mexico City, ne Lourdes a ɛwɔ France no mu kɔsrɛ anwonwa kwan so ayaresa.
Apuei ne Atɔe Famfo bɔ mpae de bisa nneɛma ahorow pii a wɔn ankasa hwehwɛ. Ɛda adi sɛ wɔpɛ sɛ wotie wɔn mpaebɔ na wobua. Nanso, so ntease wom sɛ yɛbɛhwɛ kwan sɛ wobetie yɛn mpaebɔ nyinaa? Na w’ankasa wo mpaebɔ nso ɛ? So woanya ho mmuae? Nokwarem no, so Onyankopɔn bua mpaebɔ ampa?