Ahenni Adawurubɔfo Bɔ Amanneɛ

India—“Biakoyɛ Wɔ Ɔman a Nneɛma Gu Ahorow Mu”

“BIAKOYƐ wɔ Ɔman a nneɛma gu ahorow mu” yɛ asɛm a wɔtaa ka de kyerɛkyerɛ sɛnea ɔmanfo adi afra wɔ India no mu. Biako a wɔayɛ wɔ ɔman a emu nneɛma gu ahorow yiye wɔ amammerɛ, kasa, nyamesom, mmusua, ntadehyɛ, ne aduan mu no nyɛ asɛm ketewa koraa. Nanso wohu biakoyɛ a ɛte saa wɔ Ɔwɛn Aban asafo no baa dwumadibea a ɛwɔ India no, ɛmfa ho sɛ nnipa a wɔatu wɔn ho ama a wɔte hɔ reyɛ adwuma no fi amantam ne amantam ahorow a wɔaka abom mu, na wɔka kasa horow pii no.

• Rajrani—ababaa a ofi Punjab, a ɛwɔ India atifi fam atɔe nohoa no asɛm ni. Bere a na Rajrani wɔ sukuu no, n’adesuakuw mufo biako fii ase ne Yehowa Adansefo suaa Bible no. Abeawa yi bɔɔ mmɔden sɛ ɔbɛma Rajrani ani agye Bible ho. Esiane sɛ na n’adesuakuw muni no nte Engiresi kasa papa na Ɔwɛn-Aban no bi nni Punjabi kasa mu saa bere no nti, ɔmaa Rajrani nso kyerɛɛ nsɛmma nhoma no mu nsɛm ase boaa no. Nea Rajrani kenkanee wɔ Ɔwɛn-Aban no mu no fii ase nyaa ne so nkɛntɛnso araa ma ɛmfa ho n’awofo ɔsɔretia no, onyaa nkɔanim koduu sɛ ohyiraa ne nkwa so maa Yehowa Nyankopɔn. Ɛnnɛ a ɔsom wɔ India Betel no, ɔyɛ adwuma koro no ara a ɛma ohuu nokware no. Ɔkyerɛ Kristofo nhoma ase kɔ Punjabi kasa mu!

• Susuw Bijoe a ofi India fã foforo—Kerala anafo fam atɔe—no nso ho hwɛ. Woyii Bijoe adi fii ntoaso sukuu mu esiane ɔfã biara a wannyina bere a na wɔreyɛ ɔmampɛ ho guasodeyɛ bi no nti. Bere a wɔde bere tenten dii ho asɛm wɔ asɛnnibea akyi maa nokware som dii nkonim no, Bijoe san kɔɔ sukuu.a Afei nso ɔtoaa so kɔɔ kɔlege. Nanso bra bɔne a na ɛrekɔ so wɔ hɔ no haw n’adwene, ma enti akwamma bere a edi kan mu no, ogyaee. Mprempren, wɔ mfe du a wadi wɔ Betel akyi no, ɔte nka sɛ wanya mfaso pii afi Betel abusua a emufo gu ahorow nanso wɔyɛ biako no mu sen sɛnea anka sɛ ɔkɔɔ sukuu kɔɔ akyiri a obenya no.

• Norma ne Lily nyinaa adi bɛboro mfe 70, na wɔde mfe pii atra ase sɛ akunafo. Wɔn mu biara de bɛboro mfirihyia 40 ayɛ bere nyinaa som adwuma no. Lily ayɛ adwuma wɔ baa dwumadibea hɔ sɛ obi a ɔkyerɛ nsɛm ase kɔ Tamil kasa mu bɛyɛ mfirihyia 20 ni. Norma baa Betel mfirihyia 13 ni bere a ne kunu wui no. Nhwɛso pa a wɔda no adi sɛ nkurɔfo a wɔyɛ nsi na wɔn ani ku wɔn adwuma ho akyi no, wonya Betel abusua no nyinaa biakoyɛ so nkɛntɛnso pa. Wɔn ani gye sɛ wɔbɛda ahɔhoyɛ adi akyerɛ ahɔho a wɔba Betel no na wonya wɔne abusua no mufo a wɔn mfe nkɔɔ anim no fekubɔ mu anigye, na wɔka anigye a wɔanya wɔ mfe pii a wɔde asom sɛ Kristofo no ho asɛm kyerɛ wɔn. Na wɔn a wɔn mfe nkɔɔ anim no nso to nsa frɛ wɔn ma wɔba wɔn dan mu ma wɔne wɔn nya fekubɔ, na wɔboa wɔn bere a wohia mmoa no. Nhwɛso pa bɛn ara ni!

Esiane sɛ wɔn a wɔatu wɔn ho ama no adi nsɛmnsɛm a ɛde mpaapaemu ne nitan ba wɔ mmeae pii so no nti, wɔde anigye yɛ adwuma bom sɛ Betel abusua mufo a wɔayɛ biako wɔ India.—Dwom 133: 1.

[Ase hɔ asɛm]

[Mfonini Fibea wɔ kratafa 8]

Background: Mountain High Maps® Copyright © 1997 Digital Wisdom, Inc.