ASƐM A ƐDA SO | HWANNOM NE YEHOWA ADANSEFO?
Dɛn Nti na Yɛka Asɛmpa No?
Ebia asɛmpaka adwuma a yɛyɛ no na ɛma yɛda nsow koraa wɔ ɔsom afoforo ho. Yɛka asɛm no wɔ afie afie, badwam, ne baabiara a yɛbɛhu nnipa. Dɛn nti na yɛka asɛm no?
Yehowa Adansefo ka asɛm no de hyɛ Onyankopɔn anuonyam, na yɛma nkurɔfo hu ne din no. (Hebrifoɔ 13:15) Afei nso, yɛpɛ sɛ yɛdi ahyɛde a Kristo Yesu de mae yi so: “Enti monkɔ nkɔyɛ aman nyinaa m’asuafoɔ, . . . monkyerɛkyerɛ wɔn mma wɔnni deɛ mahyɛ mo nyinaa so.”—Mateo 28:19, 20.
Bio nso, yɛdɔ yɛn yɔnko nipa. (Mateo 22:39) Yɛnim pefee sɛ nnipa dodow no ara wɔ wɔn som ne nea wɔgye di, enti ɛnyɛ obiara na n’ani bɛgye asɛm a yɛka no ho. Nanso, yɛgye di paa sɛ nea Bible kyerɛkyerɛ no yɛ nkwagye asɛm. Ɛno nti, yɛsuasua Kristofo a wɔdii kan no, na ‘yɛkɔ so kyerɛkyerɛ, na yɛka Kristo ho asɛmpa daa a yɛnnyaeɛ.’—Asomafoɔ Nnwuma 5:41, 42.
Antonio Cova Maduro yɛ nnipa asetena ho nimdefo na ɔkaa sɛ, ‘Yehowa Adansefo bɔ mmɔden fa ɔhaw mu, na mpo wɔbrɛ wɔn ho yɛ nea wɔbɛtumi biara sɛnea ɛbɛyɛ a obiara a ɔwɔ asase so bɛte kyerɛw kronkron no mu asɛm.’—El Universal atesɛm krataa, Venezuela
Nnipa a wɔkenkan yɛn nwoma no mu dodow no ara nyɛ Yehowa Adansefo. Nnipa mpempem pii a yɛne wɔn sua Bible no nso wɔ ɔsom afoforo mu. Nanso wɔn ani gye ho sɛ Yehowa Adansefo ba wɔn nkyɛn.
Ɛwom, ɛbɛtumi aba sɛ Yehowa Adansefo ho nsɛm bi wɔ hɔ a wonte ase. Sɛ wopɛ nsɛm a ɛte saa ho mmuaeɛ a, yɛsrɛ wo di akwankyerɛ yi so:
Bisa Yehowa Danseni bi.
Kɔ yɛn wɛbsaet, www.jw.org/tw.
Kɔ yɛn asafo nhyiam; obiara tumi ba bi, na worentua hwee.