3 Ɛboa Ma Yegyina Ɔhaw Ano

YARE KOANKORƆ

Ababaa bi a ɔde Rose kaa sɛ: “Minyaa me yare fii awo mu, na bere nyinaa ɛteetee me. Yare ama m’ahoɔden so atew, enti nea na mitumi yɛ no mintumi nyɛ bio.” Nea na ɛhaw Rose paa no, baako ne sɛ, sɛ ɔresua Bible anaa ɔreyɛ nneɛma foforo bi a ɛfa ne som ho a, ɛtɔ da bi a ontumi mfa n’adwene nsi so. Nanso Yesu nsɛm a ɛwɔ Mateo 19:26 no boaa no paa. Ɛhɔ ka sɛ: “Onyankopɔn fam de, ade nyinaa betumi ayɛ yiye.” Rose behui sɛ yɛwɔ akwan pii a yɛfa so sua ade. Ɛyaw a na ɔfa mu no nti, ɛtɔ mmere bi a na ontumi nkenkan ade. Wei nti ofii ase tiee Bible ne Bible ho nhoma a yɛakyere emu nsɛm agu afiri so.a Ɔkaa sɛ: “Sɛ mamfa saa kwan yi so a, anka minnim sɛnea mɛkɔ so ama me ne Onyankopɔn ntam ayɛ papa.”

Nneɛma a kan no na Rose yɛ no, ontumi nyɛ bio, enti ɛyɛ a ne werɛ how. Ɛba saa a, ɔma nsɛm a ɛwɔ 2 Korintofo 8:12 no kyekye ne werɛ. Ɛka sɛ: “Sɛ ɔpɛ no wɔ hɔ a, nea obi wɔ na ɛsɔ ani, na ɛnyɛ nea onni.” Saa asɛm no kae Rose sɛ, esiane sɛ ɔyɛ nea n’ahoɔden betumi biara nti, Onyankopɔn ani sɔ nea ɔyɛ no.

AWERƐHOW

Delphine a yɛaka ne ho asɛm no kaa sɛ: “Bere a me babea a wadi mfe 18 wui no, ɛyɛɛ me yaw paa. Ná ɛyɛ me sɛ mintumi ntena wiase mpo. Ɛsesaa me biribiara.” Nanso nsɛm a ɛwɔ Dwom 94:19 no kyekyee ne werɛ. Ɛhɔ se: “Sɛ me mu dadwen yɛ bebree a, w’awerɛkyekye na ɛma me kra ani gye.” Delphine kaa sɛ: “Mebɔɔ Yehowa mpae sɛ ɔmmoa me ma minhu nea ɛsɛ sɛ meyɛ de dwudwo me yaw no ano.”

Ɔde ne bere dodow no ara yɛɛ atuhoama adwuma bi a mfaso wɔ so. Akyiri yi ɔkaa sɛ, ɔte sɛ kɔla pɛnsere a ekura abofra, sɛ emu bu mpo a, abofra no betumi de adrɔ ade. Obehui sɛ ɔno nso, ɛwom sɛ ne haw no abubu no deɛ, nanso obetumi aboa afoforo. Ɔkaa sɛ: “Ankyɛ na mihui sɛ, sɛ mede Bible mu asɛm kyekye wɔn a me ne wɔn sua Bible no werɛ a, Yehowa nso bɛfa so akyekye me werɛ ama m’ani agye.” Ɔhwehwɛɛ Bible mu nnipa bi a wodii yaw kɛse, ɛnna ɔkyerɛw wɔn din too hɔ. Ohuu sɛ, “Ná wɔn nyinaa yɛ nnipa a wɔbɔ mpae.” Ɔsan behuu sɛ, “sɛ woankenkan Bible no a, wunnya wo haw no ano aduru.”

Bible a Delphine sua no ama wahu biribi foforo. Ɛne sɛ, ɛsɛ sɛ ɔde n’adwene si daakye so, na ɛnyɛ nea atwam. Anidaso asɛm a ɛwɔ Asomafo Nnwuma 24:15 no kyekye ne werɛ. Ɛka sɛ: “Bere bi bɛba a wɔn a wɔteɛ ne wɔn a wɔnteɛ bɛsɔre afi awufo mu.” Enti ɔwɔ awerɛhyem paa sɛ Yehowa benyan ne ba no anaa? Nea Delphine ankasa kae ni: “Sɛ mede m’ani bu daakye a, mihu me babea no. Mɛsan ahyia me ba no bio. Ɛte sɛ nea Onyankopɔn ahyɛ ɛda a yɛde behyia no ato ne kalenda so dedaadaw. Sɛ meto m’ani a, mihu sɛ me ne me babea no gyina yɛn turom hɔ. Ɛma mekae da mewoo no na medɔɔ no no.”