Mpem Aduonum Awotwe!

Ɛno ne adawurubɔfo dodow a yɛpɛ sɛ wobu akontaa wɔ Ghana wɔ August 1998 mu. So yebetumi adu ho? Yiw, yebetumi! Sɛ yɛka asafo ahorow a ɛwɔ ɔman yi mu seesei mu adawurubɔfo dodow bom a, yehu sɛ yɛn nyinaa dodow yɛ 57,767. Nanso, adawurubɔfo dodow a ɛsen biara a wobuu akontaa wɔ ɔsram biako mu no yɛ 54,842 wɔ February 1998 mu. Yɛbɛyɛ dɛn atumi aboro saa dodow yi? Sɛ ɔdawurubɔfo biara yɛ nhyehyɛe pɔtee de ne ho hyɛ asɛnka adwuma mu wɔ August mu na ɔde ho akontaabu ba ntɛm a, yebetumi adu ho. Afei nso, ɛsɛ sɛ mpanyimfo nyinaa, titiriw asafo mu ɔkyerɛwfo no, bɔ mmɔden de akontaabu no mena ntɛm. Bere a nnanu a edi kan wɔ ɔsram no mu yɛ Memeneda ne Kwasida no, dɛn nti na wonyɛ nhyehyɛe mfa wo ho nhyɛ asɛnka adwuma mu saa dapɛn awiei no? Sɛ wobɛkɔ nhyiam bi a, wubetumi ayɛ bɔnnɔ so adansedi wɔ kurow a wobɛkɔ mu nhyiam no mu, na afei wo ne w’asafo ayɛ asɛnka adwuma wɔ dapɛn awiei a edi hɔ no. Sɛ yɛde yɛn ho hyɛ asɛnka adwuma mu ntɛm wɔ ɔsram no mu a, ɛremma sɛ yɛrenyɛ asɛnka adwuma no bi wɔ August mu. Sɛ yɛn nyinaa bɔ mmɔden a, yebenya adawurubɔfo dodow a ɛsen biara foforo a ɛbɛboro 58,000 anaa 60,000 mpo nea edi kan wɔ Ghana. Osebɔ a yɛde hyɛ Yehowa anuonyam bɛn ara na eyi bɛyɛ!—Dw. 47:1.