Teokrase Nsɛmmansɛmma

Albania: Adawurubɔfo 600 a wɔbɔɔ amanneɛ August mu no yɛ dodow a ɛsen biara a atoatoa so a ɛto so 28.

Angola: Wonyaa adawurubɔfo dodow a ɛsen biara 26,129 wɔ ɔsom afe no awiei. Wonyaa daa akwampaefo dodow a ɛsen biara 1,309 nso. Sɛ wɔkyekyem pɛpɛɛpɛ a, adawurubɔfo no mu biara nyaa nnɔnhwerew 15 ne Bible adesua abien wɔ August mu.

Britain: Yɛde anigye bɔ amanneɛ sɛ wonyaa adawurubɔfo dodow a ɛsen biara foforo 132,440 wɔ August mu. Eyi yɛ nkɔanim a ɛboro ɔsom afe a etwaam de so ɔha biara mu 2.

Chile: Wɔ August ɔsram mu no, wonyaa adawurubɔfo dodow nkɔanim a ɛsen biara foforo a na wɔyɛ 50,283! Eyi ne bere a edi kan a wɔaboro 50,000. Sɛ wɔkyekyem pɛpɛɛpɛ a, adawurubɔfo no mu biara de nnɔnhwerew 12 na ɛyɛɛ asɛnka adwuma. Wɔyɛɛ ofie Bible adesua ahorow 63,732.