Kɔ So Ka Asɛm No!
1 Onyankopɔn ‘pɛ ne sɛ nnipa nyinaa benya nkwa na wɔanya nokware nimdeɛ.’ (1 Tim. 2:4) Eyi nti, ɔde ahyɛ yɛn nsa sɛ yɛnka asɛmpa no. (Mat. 24:14) Sɛ yehu nea enti a ɛsɛ sɛ yɛkɔ so ka asɛm no a, abasamtu anaa nsɛnnennen biara a ɛba yɛn akwan mu no remmu yɛn abam.
2 Dɛn Nti na Ɛsɛ sɛ Yɛkɔ So Ka Asɛm No? Wiase haw ne abɛberɛsɛ bebrebe no nti nkurɔfo werɛ fi asɛm a yɛka kyerɛ wɔn no anaasɛ wɔmfa nyɛ asɛm. Enti ɛsɛ sɛ yɛkɔ so ka Onyankopɔn nkwagye asɛm no kyerɛ wɔn daa. (Mat. 24:38, 39) Afei nso, nkurɔfo asetram nsɛm kɔ so sakra. Wiase tebea tumi sakra prɛko pɛ mpo. (1 Kor. 7:31) Asɛm anaa ɔhaw bi betumi ato nkurɔfo a yɛka asɛm no kyerɛ wɔn no ɔkyena, nnawɔtwe anaa ɔsram a ɛreba no ma enti ɛbɛma wɔafa asɛmpa a yɛka kyerɛ wɔn no aniberesɛm. So ɛnyɛ wo anigye sɛ Ɔdansefo a ɔma wuhuu nokware no kɔɔ so baa wo nkyɛn daa?
3 Yɛde Suasua Onyankopɔn Mmɔborɔhunu: Yehowa anya boasetɔ wɔ abɔnefo atemmu ho. Ɔma yɛkɔ so ka kyerɛ komapafo sɛ wɔmmra ne nkyɛn na wommenya nkwa. (2 Pet. 3:9) Sɛ yɛanka Onyankopɔn mmɔborɔhunu no ho asɛm ankyerɛ nkurɔfo na yɛammɔ atemmu a Onyankopɔn de bɛba wɔn a wɔnnan wɔn ho mfi wɔn akwammɔne ho so no ho kɔkɔ a, yebedi mogya ho fɔ. (Hes. 33:1-11) Ɛwom sɛ ɛnyɛ bere nyinaa na nkurɔfo tie asɛm a yɛka no de, nanso ɛnsɛ sɛ yɛgow yɛn ho a yɛrema komapafo nhu Onyankopɔn mmɔborɔhunu kɛse no.—Aso. 20:26, 27; Rom. 12:11.
4 Yɛde Da Yɛn Dɔ Adi: Yehowa Nyankopɔn na ɔnam Yesu Kristo so ahyɛ sɛ yɛnka asɛmpa no wɔ asase so nyinaa. (Mat. 28:19, 20) Sɛ nkurɔfo antie mpo a, yenya hokwan da yɛn dɔ ne yɛn mmɔdenbɔ ma Onyankopɔn adi bere a yɛkɔ so yɛ nea ɛteɛ no.—1 Yoh. 5:3.
5 Momma yensi yɛn bo sɛ yɛbɛkɔ so aka asɛm no daa! Momma yɛmfa nsi nka asɛm no daa efisɛ ‘ɛnnɛ ne Yehowa nkwagye da.’—2 Kor. 6:2.