Adwuma a Ɛma Abotɔyam
1 Wɔn a wotie Bible mu asɛm na wɔde di dwuma wɔ wɔn asetram no nyinaa nya abotɔyam. (Dw. 19:7, 8) Ɛboa wɔn ma wɔtwe wɔn ho fi atoro nkyerɛkyerɛ ne nneyɛe bɔne ho na ɛma wonya daakye ho anidaso a edi mũ. Nanso, ɛnyɛ wɔn a wotie asɛmpa no nkutoo na wonya so mfaso. Wɔn a wɔka Bible mu nokware a abotɔyam wom ho asɛm kyerɛ afoforo no ankasa nso nya abotɔyam.—Mmeb. 11:25.
2 Asɛnka Adwuma no Hyɛ Yɛn Den: Yesu kae sɛ wɔn a wogye Kristofo asuafoyɛ kɔndua no tom, a nea ɛka ho ne asɛnka ne asuafoyɛ adwuma no, ‘benya ɔhome ama wɔn kra.’ (Mat. 11:29) Ɔno ankasa hui sɛ afoforo a odi wɔn adanse no hyɛ no den. Ná ɛte sɛ aduan a odi. (Yoh.4:34) Bere a ɔsomaa asuafo 70 sɛ wɔnkɔka asɛm no, wɔn ani gyei bere a wohui sɛ Yehowa rehyira wɔn mmɔdenbɔ so no.—Luka 10:17.
3 Saa ara na asɛnka adwuma no a Kristofo pii de wɔn ho hyem no hyɛ wɔn den. Onuawa bi kae sɛ: “Asɛnka adwuma no ma minya abotɔyam efisɛ ɛma mihu atirimpɔw a mikura wɔ asetram. Sɛ minya asɛnka adwuma no mu kyɛfa a, ɛma me werɛ fi me haw ne da biara da mu dadwen ahorow.” Ɔsɛnkafo foforo a ɔyɛ nsi kae sɛ: “Asɛnka adwuma no . . . ma mihu bere nyinaa sɛ Yehowa wɔ hɔ paa na ɔma minya asomdwoe ne akomatɔyam bi a biribi foforo biara ntumi mma minnya.” Hwɛ hokwan ara a yɛanya sɛ yɛyɛ “Onyankopɔn adwumayɛboafo”!—1 Kor. 3:9.
4 Kristo Kɔndua Yɛ Hare: Bere a wotu Kristofo fo sɛ ‘wɔnyere wɔn ho’ no, Yesu nhwehwɛ sɛ yɛbɛyɛ nea ɛboro yɛn ahoɔden so. (Luka 13:24) Nokwarem no, ofi ɔdɔ mu to nsa frɛ yɛn sɛ ‘yɛmfa ne kɔndua nto yɛn ho so.’ (Mat. 11:29) Wɔn a wɔrehyia ɔhaw ahorow no betumi anya awerɛhyem sɛ wɔn som a efi ɔkra nyinaa mu no sɔ Onyankopɔn ani yiye, sɛ esua mpo a.—Marko 14:6-8; Kol. 3:23.
5 Hwɛ abotɔyam ara a ɛyɛ sɛ yɛbɛsom Onyankopɔn a n’ani sɔ nea yɛyɛ biara wɔ ne din ho no! (Heb. 6:10) Ɛmmra sɛ yɛbɛbɔ mmɔden bere nyinaa sɛ yɛbɛyɛ nea yebetumi nyinaa ama no.