Ɔmansin Nhyiam Dwumadi Foforo

Wɔ wiase dedaw a aporɔw yi nna a edi akyiri mu no, ɛho hia sɛ yɛhwɛ yɛn honhom fam atade so yiye na yɛbɔ yɛn Kristofo nipasu ho ban. (Adi. 16:15) Ɛno nti, ɔmansin nhyiam dwumadi a yɛbɛyɛ no 2006 ɔsom afe mu no asɛmti “Monhyɛ Nipasu Foforo” no fata.—Kol. 3:10.

Da a Edi Kan: Ɔkasa a wɔakyekyɛm a edi kan, “Da Nipasu Foforo no Afã Nyinaa Adi” besi mfaso a yenya fi nipasu foforo no a yɛda no adi wɔ yɛn asetra afã nyinaa mu no so dua. Yɛyɛ dɛn nya nipasu foforo no? Yebesusuw eyi ho wɔ ɔkasa abien a etwa to wɔ da a edi kan no mu a ɛne “Teɛ Wo Ho So Fa Dwennwen Nneɛma Ho Yiye” ne “Ntetee a Ɛnwene Nipasu Foforo No.”

Da a Ɛto So Abien: Yebesusuw ɔkwan a nipasu foforo no nya sɛnea yɛde yɛn tɛkrɛma di dwuma so nkɛntɛnso ho wɔ ɔkasa a wɔakyekyɛm a ɛto so abien a ɛne “Nya Anyansafo Tɛkrɛma” no mu. Baguam ɔkasa a asɛmti ne, “So Woredi Ɔbɔnefo no So Nkonim?” no besi hia a ehia sɛ yɛma yɛn ani da hɔ wɔ Satan nnɛɛdɛɛ ho so dua. Ɔkasa abien a etwa to wɔ ɔmansin nhyiam no mu a ɛne “Twe Wo Ho Fi Wiase Nkekae Ho” ne “Sɛnea Yɛte Wɔ Yɛn Mu no Yɛ Ne Ho Foforo Daa” no bɛboa yɛn ma yɛapo su ne nneyɛe a ɛne Onyankopɔn trenee gyinapɛn nhyia no na yɛakɔ so agyina pintinn wɔ Yehowa som mu.

Hwɛ sɛnea yɛhwɛ kwan sɛ yɛn nsa bɛka nkuranhyɛsɛm yi a ɛbɛma yɛahyɛ nipasu foforo no na yɛahwɛ so yiye no!