Yɛbɛyɛ Dɛn Aboa?
1 Sɛ Yehowa Adansefo te sɛ asiane bi asi wɔ wiase fã baabi a, wɔtaa bisa sɛ: “Yɛbɛyɛ dɛn aboa?” Sɛnea asɛm a ɛwɔ Asomafo Nnwuma 11:27-30 kyerɛ no, esiane ɔkɔm a ɛbaa Yudea nti, afeha a edi kan Kristofo no de nneɛma kɔmaa anuanom a na wɔte hɔ no.
2 Ɛnnɛyi nso, yɛn ahyehyɛde no mu mmara ama yɛatumi de sika ayɛ adɔe na yɛnam so de mmoa ama nnipa a asiane ato wɔn ne wɔn a wɔakɔ ahokyere mu wɔ mmere ahorow mu.
3 Sɛ nhwɛso no, afe a etwaam no, anuanom yii ntoboa de boaa wɔn a tsunami asiane a esii Asia Anafo fam no kaa wɔn no. Yɛn ani sɔɔ komam a wofi yii ntoboa too ahyehyɛde no foto a wɔde boa wɔn a wɔwɔ ahokyere mu no paa. Nanso wɔ aman bi so no, sɛ obi kyerɛw sɛ wɔmfa ntoboa bi nkɔboa wɔn a asiane pɔtee bi ato wɔn no a, ɛho hia sɛ wɔde ntoboa no di saa atirimpɔw no nkutoo ho dwuma wɔ bere bi a wɔahyɛ mu, ɛmfa ho sɛ ebia wɔadi yɛn nuanom ahiade ho dwuma anaa wonnii no.
4 Ne saa nti, yɛhyɛ nyansa sɛ momfa ntoboa a mode rema ma wɔde aboa afoforo a ade ahia wɔn no nka ntoboa ma wiase nyinaa adwuma no ho. Wɔde saa sika yi boa wɔn a wɔakɔ asiane mu na wɔsan nso de boa ma anuanom Kristofo nya nneɛma a ehia wɔn honhom fam. Sɛ biribi nti obi pɛ sɛ oyi ntoboa soronko ma wɔde boa nnipa a ade ahia wɔn no nkutoo na ɛnsɛ sɛ yɛde ka ntoboa ma wiase nyinaa adwuma no ho a, yebegye de adi dwuma wɔ baabiara a ɛho behia sɛ yɛde mmoa a ɛte saa ma no. Nanso yɛn ani begye ho sɛ mode ntoboa yi bɛma a morenka sɛ yɛmfa nni tebea pɔtee bi ho dwuma.
5 Ntoboa a yebeyi aboa wiase nyinaa adwuma no ma yenya sika pii de di Ahenni adwuma no afã horow nyinaa ho dwuma sen sɛ yɛde bɛto hɔ ama asiane bi a ebesi daakye. Eyi ne su a wɔka ho asɛm wɔ Efesofo 4:16 no hyia, faako a ɛka sɛ ɛsɛ sɛ yɛyɛ adwuma bom de nea ehia ‘ma nipadua no nyin yɛ den wɔ ɔdɔ mu’ no.