Nea Ɛbɛma Yɛatu Mpɔn wɔ Asɛnka Mu—Sɛnea Yebebua Wɔn a Wɔmpɛ sɛ Wotie Asɛm No

Nea Enti a Ɛho Hia: Fa no sɛ wonim paa sɛ atoyerɛnkyɛm bi rebesi na sɛ nkurɔfo anguan amfi baabi a wɔwɔ no a wobewuwu. Enti wokɔe sɛ worekɔbɔ wo fipamfo bi kɔkɔ, nanso wo maa w’ano so ara na ɔkae sɛ onni adagyew. Adagyew a ose onni nti, wobegyaw no hɔ akɔ a wonka hwee nkyerɛ no? Dabi! Nnipa pii wɔ yɛn asasesin mu a wɔmpɛ sɛ wotie yɛn, efisɛ wonnim sɛ asɛm a yɛka no yɛ nkwagye asɛm. Ebia bere a yɛkɔɔ hɔ no, na biribi foforo agye wɔn adwene. (Mat. 24:37-39) Ebetumi nso aba sɛ ebinom akeka atosɛm afa yɛn ho ma enti wonni yɛn ho adwempa. (Mat. 11:18, 19) Ebia ɛyɛ wɔn sɛ yɛte sɛ ɔsom afoforo a wɔnsow aba pa biara no. (2 Pet. 2:1, 2) Sɛ yɛkɔ obi nkyɛn na mfiase no wankyerɛ asɛm no ho anigye a, ɛnsɛ sɛ yɛpa abaw ntɛm.

Ɔkwan a Wobɛfa so Ayɛ:

Ansa na wobɛkɔ afie afie asɛnka no, gye bere kakra susuw nsɛm a nkurɔfo betumi aka de ayi wɔn ho ano ne sɛnea wobebua wɔn no ho.
Sɛ ofiewura no ka biribi a ɛkyerɛ sɛ n’ani nnye asɛm no ho a, nya ne ho abotare, na gyina ɛno so toa nkɔmmɔbɔ no so. Ebia wubetumi akamfo no. Sɛ nhwɛso no, sɛ ɔka sɛ ɔwɔ n’asɔre a ɔkɔ a, wobetumi aka sɛ, “Na merehwɛ kwan sɛ mɛto obi a n’ani gye nyamesom ho te sɛ wo.” Ɛtɔ mmere bi na wo ne ofiewura no yɛ adwene na woma ohu sɛ wote no ase a, ɛbɛma woatumi adi no adanse. Yɛmfa no sɛ, ofiewura no aka sɛ onni adagyew, wubetumi aka sɛ: “Mete wo ase, nanso ansa na mɛkɔ no, mepɛ sɛ migyaw biribi ma wo.” Sɛ ofiewura no ka sɛ n’ani nnye ho a, wubetumi nso abisa no sɛ: “Wokyerɛ sɛ w’ani nnye Bible no ho anaa nyamesom ankasa na w’ani nnye ho?”
Fa nhumu yɛ adwuma. Kae sɛ Yehowa nhyɛ nkurɔfo sɛ wontie no. (Deut. 30:19) Obiara bebu n’akontaa akyerɛ Onyankopɔn. (Gal. 6:5) Sɛ yehu sɛ ofiewura no ani nnye ho a, ɛyɛ papa sɛ yetwa so na yefi hɔ. Sɛ yɛda obu adi na yɛte no ase a, ebia daakye sɛ onua foforo kɔ ne nkyɛn a, obetie no.—1 Pet. 3:15.

Sɔ Eyi Hwɛ wɔ Ɔsram Yi Mu:

Sɛ muhyia obi na ɔka biribi de kyerɛ sɛ ɔmpɛ sɛ otie asɛm no a, bere a moafi ne nkyɛn no, wo ne nea ɔka wo ho no nsusuw ɔkwampa a anka mubetumi afa so ama no mmuae no ho.