Nea Ɛbɛma Yɛatu Mpɔn wɔ Asɛnka Mu—Fa Asɛmpa a Efi Onyankopɔn Hɔ! Yɛ Bible Adesua Wɔ Pon Ano

Nea Enti a Ɛho Hia: Sɛ yɛbɛtumi aboa nkurɔfo ma wɔabɛyɛ asuafo a, ɛsɛ sɛ yɛkyerɛkyerɛ wɔn Onyankopɔn Asɛm. (Mat. 28:19, 20) Sɛ yɛde nwoma ne nneɛma foforo a yɛn nsa ka no di dwuma yie a, yɛn nyinaa bɛtumi akyerɛkyerɛ ma aka nkurɔfo koma. Nwoma yi mu baako ne Asɛmpa a Efi Onyankopɔn Hɔ! Wɔahyɛ da ayɛ sɛ yɛmfa nkyerɛkyerɛ nkurɔfo ma wɔnhu nokware no. Nea ɛyɛ anika ne sɛ, nwomawa yi bɛtumi aboa yɛn ma yɛafi Bible adesua ase da a ɛdi kan koraa a yɛbɛkɔ obi nkyɛn no. Yɛbɛtumi ayɛ saa wɔ ne pon ano pɛɛ.

Sɔ Wei Hwɛ Bosome Yi Mu:

Bɔ mpae na woanya akokoduru ayɛ adesua no. Afei srɛ Yehowa sɛ ɔmmoa mma wonnya Bible adesua na wontumi nkyerɛkyerɛ nokware no yie.—Filip. 2:13.
Sɛ woresua ade anaa moreyɛ abusua som a, gye bere sua nea wobɛka no yie. Woyɛ saa a, ɛbɛma wode ahotoso akasa na woafi Bible adesua ase wɔ pon ano hɔ ara.