Kae Kristofo a Wɔrehyia Ɔtaa na Bɔ Mpae Ma Wɔn

Bible hyɛɛ nkɔm sɛ Satan bɛtaa yɛn sɛnea ɛbɛyɛ a yɛrentumi nyɛ yɛn som adwuma no. (Yoh 15:20; Adi 12:17) Yɛn nuanom Kristofo a wɔrehyia ɔtaa wɔ aman foforo so no, yɛbɛyɛ dɛn aboa wɔn? Yebetumi abɔ mpae ama wɔn. Bible ka sɛ: “Ɔtreneeni adesrɛ reyɛ adwuma a, ɛwɔ tumi kɛse.”—Yak 5:16.

Dɛn na yebetumi aka wɔ yɛn mpaebɔ mu? Yebetumi asrɛ Yehowa sɛ ɔmmoa yɛn nuanom mmea ne mmarima no, na ɔmma wɔn akokoduru na wɔn koma antu. (Yes 41:10-13) Yebetumi nso abɔ Yehowa mpae sɛ ɔmma atumfoɔ no nnya asɛnka adwuma no ho adwempa. “Ɛno bɛma yɛde asomdwoe ne kommyɛ abɔ yɛn bra.”—1Ti 2:1, 2.

Asomafo no bere so no, Paulo ne Petro hyiaa ɔtaa. Kristofo no bɔɔ wɔn din bɔɔ mpae maa wɔn. (Aso 12:5; Ro 15:30, 31) Ɛnnɛ nso, anuanom a wɔrehyia ɔtaa no, sɛ yennim wɔn nyinaa din mpo a, yebetumi abɔ wɔn asafo, wɔn man, anaa wɔn kurow din wɔ yɛn mpaebɔ mu.

Kristofo a wɔretaa wɔn a wopɛ sɛ wobɔ mpae ma wɔn no, kyerɛw aman a wɔwɔ so no din.