Awofo, Biribiara a Ɛsɛ Sɛ Mo Mma Hu No, Monkyerɛ Wɔn

Wiase a yɛte mu no, nnipa de papa ayɛ bɔne na wɔde bɔne ayɛ papa. (Yes 5:20) Awerɛhosɛm ne sɛ, ebinom yɛ nneɛma a Yehowa kyi, te sɛ mmea a wɔne mmea da, ne mmarima a wɔne mmarima da. Wɔn a yɛn mma no ne wɔn kɔ sukuu ne afoforo betumi adaadaa wɔn ama wɔanya adwene sɛ mfomso biara nni abrabɔ bɔne a ɛte saa ho. Yɛbɛyɛ dɛn aboa yɛn mma a wɔda yɛn koma so yi, na sɛ wohyia tebea a ɛte saa a wɔatumi agyina ano?

Kyerɛkyerɛ wo mma no ma wonhu nneɛma a Yehowa pɛ ne nea okyi. (Le 18:3) Momma mmofra no nhu nea Bible ka fa ɔbarima ne ɔbea nna ho. Sɛ moreyɛ saa a, monhwɛ mfe a mmofra no adi, na munhu nsɛm a ɛfata a ɛsɛ sɛ moka kyerɛ wɔn. (De 6:7) Bisa wo ho sɛ: ‘Mewɔ ɔbabea a, makyerɛ no sɛnea ɛsɛ sɛ ɔne mmarima bɔ anaa? Sɛ mewɔ ɔbabarima nso a, makyerɛ no sɛnea ɛsɛ sɛ ɔne mmea bɔ anaa? Onim nea enti a ɛsɛ sɛ ɔhyɛ ntaade a ɛfata? Mama wahu ne nipadua no afã a ɛnsɛ sɛ obiara hu anaa? Sɛ obi pɛ sɛ ɔde ponografi kyerɛ no anaa ɔma no yɛ biribi a Yehowa mpɛ a, onim nea ɛsɛ sɛ ɔyɛ anaa?’ Sɛ wohu nea ɛsɛ sɛ wɔyɛ a, ebetumi aboa wɔn na wɔankɔtɔ asiane mu. (Mme 27:12; Ɔsɛ 7:12) Wo mma yɛ akyɛde a ɛsom bo a Yehowa de ahyɛ wo nsa, enti sɛ wokyerɛkyerɛ wɔn ma wohu nea ɛsɛ sɛ wohu a, ɛkyerɛ sɛ w’ani sɔ akyɛde no.​—Dw 127:3.

HWƐ VIDEO A YƐATO DIN SI OFIE A EBETUMI AGYINA​—BƆ WO MMA HO BAN FI “NNEBƆNE HO” NO. WUWIE A, BUA NSƐMMISA A EDIDI SO YI:

• 

  Adɛn nti na awofo binom twentwɛn wɔn nan ase sɛ wɔbɛka nna ho asɛm akyerɛ wɔn mma?

• 

  Adɛn nti na ɛsɛ sɛ awofo tete wɔn mma wɔ “Yehowa nteɛso ne nyansakyerɛ mu”?​—Efe 6:4

• 

  Dɛn na Yehowa ahyehyɛde no ayɛ a ebetumi aboa awofo ma wɔahu sɛnea wɔbɛka ɔbarima ne ɔbea nna ho asɛm akyerɛ wɔn mma?​—w19.05 12, adaka

• Sɛ awofo taa ne wɔn mma bɔ nkɔmmɔ a, ɛbɛboa wɔn sɛn?