Ɔko Ho Nsunsuanso Ka Yɛn Nyinaa
“Efi bere a Wiase Ko a Ɛtɔ So Mmienu no bae besi seesei, ɔko nnɔɔso wɔ wiase sɛ nnɛ. Nnipa a ɔko ama wɔrehu amane no yɛ ɔpepepem 2, kyerɛ sɛ, nnipa nnan biara mu baako.”
Amanaman Nkabom Kyerɛwfo Panyin No Abadiakyiri Amina J. Mohammed, January 26, 2023.
Mmeae a seesei asomdwoe wɔ mpo, ɔko betumi asi wɔ hɔ prɛko pɛ. Esiane sɛ obi amane san obi nti, ɛnnɛ sɛ ɔko si wɔ ɔman bi so a, ɛho nsunsuanso tumi ka aman a ɛmmɛn hɔ mpo. Ɔko no ba awiei a, ɔhaw a ɛde ba no tumi tena hɔ kyɛ. Yɛnhwɛ ɛho nhwɛso bi:
Ɔkɔm. Boayikuw a Ɛhwɛ Aduan Ho Nsɛm So Wɔ Wiase ka sɛ, “ɛnnɛ yi nyinaa, ɔko ne ade titiriw a ɛde ɔkɔm ba. Nnipa a wɔredi kɔm wɔ wiase no, sɛ wuyi emu du a, emu nson wɔ mmeae a ɔko anaa basabasayɛ rekɔ so.”
Ebinom pirapira na ebinom nso nya adwenemhaw. Sɛ ɛkɔba sɛ ɔko bi repenpɛn so a, ennya mmae mpo no, ɛho hu tumi gyaw nkurɔfo adwinnwen ne kɔdaanna. Sɛ ɔko si baabi a, nea ɛtaa ba ne sɛ, nkurɔfo pirapira anaa wɔnya adwenemhaw. Wɔn nso na ɛyɛ a wɔntaa nnya ayaresa a wɔhia.
Ɔko ma nkurɔfo guan fi baabi a wɔte. Amanaman Nkabom Aguanfo Soafo Panyin no de too gua sɛ, eduu September 2023 no, na nnipa bɛboro ɔpepem 114 na aguan afi baabi a wɔte. Ade titiriw a ɛkɔfaa wei bae ne ɔko.
Ɛde sikasɛm mu ahokyere ba. Ɔko si a, ɛde sikasɛm mu ahokyere ba; ebi ne sɛ, ɛma nneɛma bo yɛ den. Ɔko ba a, ɔman sika a anka ɛsɛ sɛ wɔde boa ayaresa ne nhomasua no, wobɛhwɛ na wɔde akɔhyɛ ɔko no mu, na ɛba saa a, ɛma nkurɔfo ho kyere wɔn. Afei nso, sɛ ɔko sɛe kurow bi a, egye sika pii ansa na wɔatumi asiesie ama asi ne dedaw mu.
Ɛsɛe yɛn asaase so nneɛma. Nneɛma a yehia na yɛatumi atena ase no, ɔko nti sɛ nkurɔfo hyɛ da sɛe no a, ɛde ɔhaw na ɛba. Sɛ wɔde nneɛma fĩ sɛe nsu, mframa ne asaase a, etumi ma nkurɔfo yareyare mfe pii. Sɛ ɔko no ba awiei mpo a, mfe pii akyi no, atopae a wɔgyaw wɔ asaase mu no tumi pae pirapira nkurɔfo anaa ekunkum wɔn mpo.
Ɛda adi pefee sɛ, ɔko sɛe ade na ɛde ka kɛse nso ba.