Nea ɛwɔ soro, benkum so: Marek M. Berezowski/Anadolu Agency via Getty Images; nea ɛwɔ ase, benkum so: Halfpoint Images/Moment via Getty Images; nea ɛwɔ mfinimfini: Zhai Yujia/China News Service/VCG via Getty Images; nea ɛwɔ soro, nifa so: Ismail Sen/Anadolu Agency via Getty Images; nea ɛwɔ ase, nifa so: E+/taseffski/via Getty Images
MONKƆ SO NWƐN!
2023: Ahoyeraw Afe—Dɛn Na Bible Ka Fa Ho?
Wohwɛ nsɛm a esisii wiase nyinaa wɔ afe 2023 mu a, biribiara di adanse sɛ yɛte “awiei mmere” mu sɛnea Bible ka no. (2 Timoteo 3:1) Bible kaa sɛ nsɛm bi besisi wɔ yɛn bere yi so, na ɛno ara na ɛrekɔ so nnɛ no. Wo de, ma yɛnhwɛ bi.
Nsɛm a ɛresisi wiase no, Bible kaa ho asɛm too hɔ
“Ɔko, ne ɔko ho nsɛm.”—Mateo 24:6.
“Akokoakoko a ani yɛ nyan redɔɔso wɔ wiase.”a
Kenkan asɛm a yɛato din “Temanmufo—Hena Na Ɛbɛbɔ Wɔn Ho Ban?,” ne “Sika a Wiase No Sɛe No Wɔ Akode Ho No Atwam Dɔla Ɔpepepepem 2.”
“Asaasewosow bɛba mmeaemmeae.”—Marko 13:8.
“Asaasewosow akɛse a ɛyɛ hu a ɛsɛe nneɛma paa no, efi afe 2023 reba no, mmaako mmaako 13 na asisi. Efi bere a animdefo hyɛɛ ase de mfiri susuw sɛnea asaasewosow ano den te no, ɛmmaa da sɛ asaasewosow akɛseakɛse bebree saa asisi wɔ afe baako pɛ mu sei.”b
Kenkan asɛm a yɛato din “Asaasewosow Akɛse Asisi Wɔ Turkey Ne Syria.”
“Nneɛma a ɛyɛ hu.”—Luka 21:11.
“Wim ayɛ hye ara ma afei de, ɛrehuruw; ɛte sɛ nea yɛde asaase yi asi gya so.”—António Guterres, Amanaman Nkabom no kyerɛwfo panyin.c
Kenkan asɛm a yɛato din “Wim Ayɛ Hyehyeehyew Wɔ Wiase Nnansa Yi.”
‘Ɔkɔm bɛba.’—Mateo 24:7.
“Mmusua a ohia nti, na wɔdi kɔm no, yesii afe 2023 mu no, afei de wɔn asɛm yɛɛ mmɔbɔ paa; ɔkɔm hyɛɛ da posaa wɔn.”d
Kenkan asɛm a yɛato din “Akokoakoko Ne Wim Tebea a Ɛresɛe No Ama Aduan Ho Ayɛ Den Wɔ Wiase Baabiara.”
“Mmere a emu yɛ den.”—2 Timoteo 3:1.
“Nnipa a ɛwɔ wiase nyinaa, wuyi nwɔtwe biara a, baako wɔ adwene mu yare bi hyɛ ne ho.”e
Kenkan asɛm a yɛato din “Mmabun a Wɔrenya Adwene Mu Yare Nnansa Yi Adɔɔso Paa.”
Dɛn na ebesi afe 2024?
Obiara rentumi nkyerɛ nea afe 2024 de bɛba. Nanso nneɛma a ɛresisi wɔ wiase no kyerɛ sɛ, aka kakraa bi, Onyankopɔn Ahenni anaa Onyankopɔn aban a ɛwɔ soro no bɛba abeyi nnipa aban nyinaa afi hɔ, na adi yɛn so. Afei nneɛma a ɛkɔfa amanehunu ne abɛbrɛsɛ bɛto yɛn so nyinaa, Onyankopɔn Ahenni betu ase.—Daniel 2:44; Adiyisɛm 21:4.
Yegu so retwɛn yi, sɛ adwinnwen hyɛ yɛn so ma yɛbɔ hu a, yebetumi akɔ Onyankopɔn nkyɛn akɔhwehwɛ mmoa. Bible ka sɛ:
“Sɛ mebɔ hu a, mede me ho to wo so.”—Dwom 56:3.
Yɛbɛyɛ dɛn akyerɛ sɛ yɛde yɛn ho ato Onyankopɔn so? Daakye papa a ɛda yɛn anim a Bible de ahyɛ yɛn bɔ no, yɛhyɛ wo nkuran sɛ sua ho ade no bi ka ho. Yɛne nkurɔfo sua Bible a yennye sika biara. Sɛ wopɛ a, yebetumi ne wo asua bi. Ɛbɛboa wo ama woahu sɛnea nneɛma a Bible ahyɛ ho bɔ no betumi aboa wo ne w’abusua.
a Foreign Affairs, “A World at War: What Is Behind the Global Explosion of Violent Conflict?” Emma Beals ne Peter Salisbury na ɛkyerɛwee, October 30, 2023.
b Earthquake News, “Year 2023: Number of Major Earthquakes on Course for Record,” May, 2023.
c United Nations, “Secretary-General’s Opening Remarks at Press Conference on Climate,” July 27, 2023.
d World Food Programme, “A Global Food Crisis.”
e World Health Organization, “World Mental Health Day 2023,” October 10, 2023.