Yɛwɔ Nokware a Ɛsom Bo a Yɛbɛka Akyerɛ Afoforo
1 Yɛn ani sɔ nkyerɛkyerɛ pii a ɛsom bo a ɛwɔ Onyankopɔn Asɛm mu no. (Dw. 12:6; 119:11, 14) Bere bi, Yesu maa mfatoho ahorow de kyerɛkyerɛɛ Ahenni no afa ahorow mu, na obisaa n’asuafo no sɛ: “So motee eyinom nyinaa ase?” Bere a wɔkae sɛ wɔte ase no, ɔka kyerɛɛ wɔn sɛ: “Sɛ ɛte saa a, ɔkyerɛkyerɛfo biara a wɔakyerɛ no ɔsoro ahenni ho ade no te sɛ ofiewura bi a oyi nneɛma foforo ne dedaw adi fi n’akoradedan mu.”—Mat. 13:1-52.
2 Yebetumi abu Bible mu nokware a yehui bere a yefii ase suaa Bible no sɛ nneɛma dedaw. Bere a yɛkɔ so sua Onyankopɔn Asɛm mu nneɛma a emu dɔ ho ade no, yehu Bible mu nokware afoforo a yɛn fam no, ɛte sɛ nneɛma foforo. (1 Kor. 2:7) “Akoa nokwafo ne ɔbadwemma” no nso boa yɛn ma yɛte nneɛma foforo ase.—Mat. 24:45.
3 Yɛn ani sɔ nkyerɛkyerɛ dedaw ne foforo a ɛsom bo yi paa. Eyi ka yɛn ma yɛpere sɛ yebenya ntetee na ama yɛn ho akokwaw sɛ Onyankopɔn Asɛm ho akyerɛkyerɛfo, na yɛafi yɛn pɛ mu aka nokware a ɛsom bo no ho asɛm akyerɛ afoforo.
4 Sua Biribi Fi Yesu Nhwɛso Mu: Bere a Yesu reda sɛnea ɔte nka wɔ nkyerɛkyerɛ a ɛsom bo yi ho adi no, ɔbɔɔ mmɔden pii kaa ho asɛm kyerɛɛ afoforo. Bere a na wabrɛ mpo no, wannyae sɛ ɔbɛka nokware a ɛsom bo no ho asɛm akyerɛ afoforo.—Yoh. 4:6-14.
5 Ɔdɔ a na Yesu wɔ ma wɔn a na wɔnte Onyankopɔn ne n’atirimpɔw ase yiye no kaa no ma ɔkaa Onyankopɔn asɛm mu nokwasɛm a ɛsom bo a ɛma nkwa no ho asɛm kyerɛɛ wɔn. (Dw. 72:13) Ohuu wɔn a na wɔpɛ sɛ wosua Onyankopɔn ne n’atirimpɔw ho ade no mmɔbɔ, na ɛkaa no ma ‘ɔkyerɛkyerɛɛ wɔn nneɛma pii.’—Mar. 6:34.
6 Suasua Yesu: Sɛ yebu nneɛma a yɛwɔ no sɛ ɛsom bo paa a, yɛn ho bɛpere yɛn sɛ yɛbɛma afoforo ahu nokware a ɛsom bo no afi Bible mu tẽẽ sɛnea Yesu yɛe no. (Mmeb. 2:1-5) Ɛwom sɛ ɛtɔ mmere bi a ebia yɛbɛte nka sɛ yɛabrɛ de, nanso ɛsɛ sɛ yefi koma nyinaa mu de anigye ka Bible mu nokware ho asɛm. (Mar. 6:34) Sɛ yɛn ani sɔ nokware a ɛsom bo a yɛwɔ no paa a, ɛbɛka yɛn ma yɛayɛ nea yebetumi biara wɔ asɛnka mu, na yɛakɔ so aka asɛm no bere nyinaa.