Asɛm A Wɔbɛka Akyerɛ—Denam Mmofra A Wɔbɛboa Wɔn Ma Wɔabɔ Asɛm No Dawuru So
1 Awofo fata nkamfo wɔ mmoa a wɔkɔ so de ma wɔn mma wɔ ɔsom kronn mu no ho. Mmofra pii tumi kɔ Kristofo nhyiam horow, na wɔde wɔn ho hyem nso. Wɔn nso wɔkɔ asɛnka na wobu bra pa. Enti, mmofra nso fata nkamfo wɔ ɔdɔ a ɛte sɛɛ a wɔwɔ ma Yehowa ne wɔn awofo akwankyerɛ a wogye tom no ho.
2 Ade foforo a mmofra fata nkamfo wɔ ho ne wɔn bo a wɔasi sɛ wɔde ahofama a edi mu bɛma Yehowa no. Mpɛn pii no wɔhyɛ wɔn wɔ sukuu sɛ wɔmfa wɔn ho nhyɛ guasodeyɛ a ebu wɔn Kristofo gyinabea so no mu, nanso wɔagyina pintinn. Ɛwom sɛ ebia wiase no bedi wɔn ho fɛw wɔ gyinabea a ɛte sɛɛ ho de, nanso edi Yehowa ni na ɛhyɛ no anuonyam.
3 Sɛ woyi mmofra adi fi sukuu mu wɔ guasodeyɛ ahorow a ɛte sɛɛ a wɔmfa wɔn ho nhyem ho a, mpanyimfo no taa hyehyɛ kratasin bi de brɛ Asafo ti no. Wɔahu wɔ amanneɛbɔ yi mu sɛ ɛwom sɛ mmofra no gyinaa pintinn ma enti woyii wɔn adi fii sukuu mu de, nanso wɔn mu pii nyɛ adawurubɔfo. Wɔn mu pii adi fi mfe 7 kosi 17. Eyi yɛ asɛm a ehia sɛ yedwen ho. Yɛrentumi nnye te a mmofra no te nokware no ase yiye no ho kyim. Ɔpɛ a wɔwɔ sɛ wobetie Yehowa akosi awiei no nso da adi pefee. Enti, nea wohia ne awofo mmoa a ɛbɛma wɔayɛ asɛmpa no ho adawurubɔfo a wɔyɛ nnam.
DƐN NA AWOFO BETUMI AYƐ?
4 Wɔhyɛ awofo nkuran sɛ wɔmfa wɔn mma nka wɔn ho nkɔ asɛnka ɛwom mpo sɛ ebia wosusuae yiye de. Sɛ mo ne anigyefo reyɛ Bible adesua a, momma mmofra a wɔwɔ hɔ no ho asɛm ntra mo adwenem. Mubetumi abisa mmofra no nsɛm ntiantiaa bi wɔ adesua no yɛ mu. Sɛ wotumi de wɔn ho hyem saa wɔ ofie Bible adesua mu a, ɛhyɛ wɔn nkuran.
5 Ade foforo a ɛsɛ sɛ moyɛ nso ne sɛ mobɛkyerɛ abofra no sɛnea ɔde nkratawa anaa nsɛmma nhoma bɛma, anaa ɔde kyerɛwsɛm biako bedi dwuma de aka asɛm anaasɛ mubegyina mfe a wadi so ma waka asɛm a kyerɛw nsɛm abien anaa abiɛsa wom akyerɛ. Mubetumi asua sɛnea ɔbɛka akyerɛ no wɔ mo abusua adesua mu, sɛnea ɛbɛyɛ na hu a obehu no bɛma wanya ahotoso. Sɛ ɛnyɛ afie afie adwuma na mo ne wɔn reyɛ a, mubetumi ama mmofra no kwan ma waka asɛm no akyerɛ wɔ sankɔhwɛ mu. Afei ɔwofo no betumi atoa nkɔmmɔbɔ no so, na sɛ ebetumi ayɛ yiye a, wama afa asɛmti koro no ara ho. Ɛwom sɛ ɔwofo no bɛkyerɛkyerɛ mu akɔ akyiri de, nanso ɛsɛ sɛ asɛm a abofra no bɛka akyerɛ no di mũ. Ebia ɔbɛka asɛmti no fã bi ho asɛm, na agya no aka ɔfã foforo nso ho asɛm.
6 Awofo pii ahu sɛ mfaso wɔ so sɛ wɔbɛkyerɛ wɔn mma no wɔn mpɔtam hɔ kasa akenkan, faako a mpɔtam hɔ kasa titiriw na wɔka wɔ asasesin no mu no. Saa kwan yi so no, mmofra no tumi bue Bible no kenkan kyerɛw nsɛm a ɛwɔ asɛm a yɛka kyerɛ no mu. Eyi hyɛ mmofra no den wɔ honhom mu, na enya afiewuranom pii so nkɛntɛnso pa.
7 Yehowa a wobeyi no ayɛ no nyɛ hokwan a wɔde ama mpanyimfo nkutoo. Yesu bisaa n’asɔretiafo bere bi sɛ: “Monkanee pɛn sɛ: Nkokoaa ne wɔn a wonum nufu anom na woasiesie ayeyi, anaa?” (Mat. 21:16) Sɛ yedwen akwan a yɛfa so wɔ asɛnka mu no ho a, ɛsɛ sɛ ɛyɛ mmerɛw ma mmofra nso sɛ wobefi asɛnka ase sɛnea mmofra afoforo reyɛ dedaw no. Awofo, monyɛ mo fam de mfa mmoa mo mma, na ama wɔabɛyɛ asɛmpa no ho adawurubɔfo, na wɔnam saayɛ so ama ɔbɔfo no nsɛm yi abam: “Munyi yɛn Nyankopɔn ayɛ, mo a moyɛ ne nkoa ne mo a musuro no nyinaa, akɛse ne nketewa.”—Adi. 19:5.