Ɛbere no Ni

¹ Bere a ɔsomafo Paulo kyerɛw ne krataa a ɛto so abien kɔmaa Korintofo no, ɔkaee wɔn sɛ wosii gyinae sɛ wɔbɛyɛ adwuma pa bi de nneɛma akɔboa wɔn mfɛfo gyidifo wɔ Yerusalem. Nanso, na afe biako atwam a wonnya nwiee adwuma a wofii ase no. Enti ɔhyɛɛ wɔn sɛ: “Munwie ɔyɛ no nso, na, sɛnea mowɔ koma a ɛpɛ no, moafi ade a mowɔ no mu awie saa ara.”—2 Kor. 8:11.

² Yɛn nyinaa de botae horow bi asisi yɛn anim pɛn. Ebia yɛyɛɛ yɛn adwene sɛ yɛbɛma asɛnka adwuma a yɛyɛ no anya nkɔanim, yebehu yɛn nuanom yiye, yɛbɛfata ama ɔsom hokwan bi, anaa yebedi mmerɛwyɛ bi so. Ɛwom sɛ yɛde adwempa fii ase de, nanso ebia yɛammia yɛn ani annu yɛn botae no ho. Ebia yɛn ani baa yɛn ho so no na adapɛn, asram, anaa mfe bi mpo atwam a yennyaa nkɔanim biara. So ebetumi aba sɛ ehia sɛ yɛde afotu a ese ‘yenwie’ nea yefii ase no di dwuma?

³ Yɛn Botae Horow ho a Yebedu: Yɛn bo a yɛn ankasa besi sɛ yɛbɛyɛ biribi no yɛ ade biako, nanso ne yɛ nso yɛ ade foforo koraa. Mmɔtohɔ tumi siw nkɔso kwan. Ehia sɛ yesi gyinae na yɛwe hinam so sɛ yɛbɛkɔ yɛn anim a yɛntwentwɛn yɛn nan ase. W’ankasa nhyehyɛe a wobɛyɛ so wɔ mfaso. Ɛho hia sɛ wode bere a ehia ma adwuma no si hɔ, na wohwɛ hu sɛ wode bere no adi saa atirimpɔw no ho dwuma. Ɛyɛ papa sɛ wode bere a wode bewie si hɔ na afei wohyɛ wo ho so wie no saa bere no.

⁴ Sɛ botae horow bi a yɛpɛ sɛ yedu ho ma yɛn ho kyere yɛn a, ɛyɛ mmerɛw sɛ yebenya adwene sɛ: ‘Mɛba so akyiri yi.’ Nanso yennim nea ebesi daakye. Mmebusɛm 27:1 ka sɛ: “Mfa ɔkyena nhoahoa wo ho, na wunnim nea ɛda bɛwo.” Osuani Yakobo bɔɔ kɔkɔ sɛ ɛnsɛ sɛ yenya ahotoso mmoroso wɔ daakye mu efisɛ “munnim nea ɛbɛba ɔkyena. . . . Nea onim papa yɛ na ɔnyɛ no, ɛyɛ bɔne ma no.”—Yak. 4:13-17.

⁵ Esiane nneɛma pii a egye asabawmu ne pii a afoforo hwehwɛ fi yɛn hɔ nti, ɛnyɛ den sɛ yɛn ani bɛpa yɛn botae horow no so. Ɛsɛ sɛ yɛyere yɛn ho denneennen na akɔ so atra yɛn adwene mu daa. Mfaso wɔ so sɛ yɛde asɛm no bɛkɔ mpaebɔ mu. Afoforo a wɔbɛn yɛn a yɛbɛka akyerɛ wɔn sɛ wɔnkaakae yɛn na wɔnhyɛ yɛn nkuran no betumi aboa. Agyiraehyɛde bi a yɛbɛyɛ wɔ yɛn kalenda so no bɛkae yɛn ma yɛahwɛ sɛ yɛrenya nkɔso anaa. Ɛsɛ sɛ obi yɛ n’adwene sɛ ‘ɔbɛyɛ sɛnea wasusuw ho ne komam no.’—2 Kor. 9:7.

⁶ October ɔsram no ma yenya hokwan kɛse sɛ yɛde yɛn ani besi yɛn botae horow so. Yɛbɛma nkurɔfo akra Ɔwɛn-Aban ne Nyan! nsɛmma nhoma ahorow no. So yebetumi de botae a ntease wom bi asisi yɛn anim na yɛadu ho? So yentumi mfa nyɛ yɛn botae sɛ anyɛ yiye koraa no, yɛbɛma obi akra nsɛmma nhoma wɔ ɔsatu no mu? Ebetumi ayɛ botae horow a ntease wom ama nnipa pii sɛ wobesi gyinae sɛ wɔbɛyɛ sankɔhwɛ pii na wɔafi Bible adesua foforo ase.

⁷ Nyansa nnim sɛ yɛbɛbɔ nea ɛho hia ato hɔ, efisɛ ‘wiase yi retwam.’ (1 Yoh. 2:17) Mprempren, yebetumi anya hokwan ahorow a ɛyɛ soronko ne nhyira wɔ Yehowa som mu. Nya a yebenya no gyina yɛn so.

Hwehwɛ Onyankopɔn Ahenni Kan—Denam Ayeyi Afɔre a Wobɛbɔ no Daa So

¹ Wɔn a wɔhwehwɛ Ahenni no kan no adwene wɔ so bere nyinaa sɛ wɔbɛka Yehowa ne n’Ahenni no ho asɛm akyerɛ. (Dw. 145:11-13) Yenya hokwan da biara sɛ yebehyira ne din na yɛaka asɛmpa no akyerɛ. (Dw. 96:2) Ná odwontofo no ani gye ho sɛ obeyi Yehowa ayɛ, na ɔkae sɛ: “Onyankopɔn mu na [yɛde ayeyi bɛma, NW] daa nyinaa.” (Dw. 44:8) Sɛ saa ara na yɛte nka a, yɛn ho bɛpere yɛn sɛ yebenya Ahenni som adwuma no mu kyɛfa daa.

² Yehowa mfaa nnɔnhwerew ahwehwɛde pɔtee bi nsii hɔ sɛ yɛmfa nyɛ ɔsom adwuma no, nanso ɔhyɛ yɛn nkuran sɛ yɛnkɔ so nyi no ayɛ “daa.” (Heb. 13:15) Sɛ yɛn nsɛm tebea ma yɛn kwan a, ɛsɛ sɛ yɛde yɛ yɛn botae sɛ yɛde bere bi besi hɔ de ayi Yehowa ayɛ dapɛn biara. Wɔn a wɔreyɛ saa dedaw no betumi ayɛ wɔn nhyehyɛe na wɔasom sɛ akwampaefo aboafo wɔ bere ne bere mu anaa wɔayɛ atoam mpo. Ebia ebinom a wɔrenya akwampaefo aboafo adwuma no mu kyɛfa no betumi abɛyɛ daa akwampaefo.

³ Sɛnea yɛn nsɛm tebea te biara no, so yebetumi ama yɛn ayeyi afɔre no anya nkɔanim? Anisɔ na ɛkanyan nsiyɛ. Onyankopɔn Asɛm a yɛn ankasa sua na ɛma yenya anisɔ. Asafo nhyiam horow kanyan yɛn ma yɛda saa anisɔ no adi wɔ akwan a mfaso wɔ so so. Ayeyifo afoforo a wɔyɛ nsi a yɛne wɔn benya fekubɔ a emu yɛ den betumi ‘atwetwe yɛn akɔ nnwuma pa mu.’ (Heb. 10:24) Yɛnam nsiesie a asafo no yɛ a yɛde bedi dwuma akosi ase no so betumi ama yɛn ayeyi afɔre no anya nkɔanim.

⁴ Odiyifo bea Hana yɛɛ nhwɛso fɛfɛ wɔ Yehowa som mu. Ɛwom sɛ na wadi mfe 84 de, nanso na “ɔmpa asɔrefi hɔ da, na ɔde [ɔsom kronn ma, NW] Nyankopɔn adesae ne adekyee.” (Luka 2:37) Ne kra nyinaa mu a ofi de ne ho hyɛɛ asafo dwumadi ahorow mu no ma onyaa akomatɔyam kɛse. Nokwaredi a ɔde somee ho asɛm a ɛwɔ Bible mu no hyɛ yɛn nkuran nnɛ.

⁵ Paulo kamfo kyerɛe sɛ ‘ɛsɛ sɛ wɔn a wɔyɛ den no soa wɔn a wɔnyɛ den no mmerɛwyɛ.’ (Rom. 15:1) Ebia ebinom wɔ w’asafo mu a wobetumi anya wo mmoa ne nkuranhyɛ a efi ayamye mu no so mfaso. Ebia wo nsa a wobɛto afrɛ wɔn ma wɔne wo ayɛ asɛnka adwuma no ara ne nea ehia. Ebia na ɔdawurubɔfo foforo bi hia mmoa na watumi asiesie ne ho ama asɛnka adwuma anaa ohia obi a ɔne no bɛnantew. Ebetumi aba sɛ abasamtu na ɛhaw onipa foforo no, na wo na ebia wubetumi ahyɛ onii no nkuran na akanyan Ahenni som adwuma no ho nsi a ɔwɔ no bio. (1 Tes. 5:14) Ɔpɛ a wubenya sɛ wobɛma ‘ahotefo hia ahia wo bi’ no da no adi sɛ wufi koma mu hwehwɛ sɛ wobɛma Yehowa din ho ayeyi anya nkɔanim.—Rom. 12:13.

⁶ Yentumi mmobɔ nneɛma a Yehowa ayɛ dedaw, ne nea ɔbɛyɛ ama yɛn daakye no nyinaa din. Ɔkwan biara nni hɔ a yebetumi afa so atua no ka wɔ saa nhyira yi ho. Hwɛ ntease a emu yɛ den ara a ɛwɔ hɔ a enti ɛsɛ sɛ ‘nea ɛhome nyinaa yi Yehowa ayɛ’!—Dw. 150:6.