Bere Nyinaa Som Adwuma no Mu Anigye
1 Sɛ́ ɔbabun no, akyinnye biara nni ho sɛ woasusuw wo daakye ho kakra. Mmebusɛm 21:5 ka kyerɛ yɛn sɛ “nsiyɛfo adwene de adedodow ara na ɛba.” Ɛbɛyɛ papa sɛ wubesusuw w’asetra mu botae ahorow ho anibere so. Sɛ woreyɛ wo nhyehyɛe ama daakye a, susuw bere nyinaa som adwuma no ho. Dɛn ntia?
2 Bisa ebinom a wɔn mfe akɔ anim a wɔyɛɛ akwampae adwuma wɔ wɔn mmabunbere mu sɛnea wɔte nka, na mpɛn pii no wɔbɛka asɛnkoro yi ara. “Ɛne m’asetra mu bere a eye sen biara!” Onuabarima bi a onyaa bere nyinaa som adwuma no mu anigye fi ne mmeranteberem no kaa akyiri yi wɔ n’asetra mu sɛ: “Ɛyɛ abotɔyam kɛse sɛ mɛkaakae me mmeranteberem na matumi aka sɛ mitiee afotu a nyansa wom yi: ‘Kae wo bɔfo wo mmerantebere mu.’” (Ɔsɛnk. 12:1) Egye nhyehyɛe pa a wo ne w’awofo bɛyɛ nnɛ na ama woanya anigye yi bi wɔ wo mmabunbere mu.
3 Awofo, Monhyɛ Bere Nyinaa Som Adwuma Ho Nkuran: Sɛ́ Agya a odwen yɛn ho no, Yehowa kyerɛ yɛn ɔkwan pɔtee a yɛmfa so. (Yes. 30:21) Sɛ́ Kristofo a moyɛ awofo no, Yehowa akwankyerɛ a ɔdɔ wom saa a ɔde ma no yɛ nhwɛso pa ma mo. Sɛ́ anka mubegyaw ama mo mma sɛ wɔmpaw ɔkwan a eye ma wɔn no, mumfi nyansam ntete wɔn wɔ ɔkwan a wɔmfa so no so na ama wɔanya Yehowa nhyira. Afei sɛ wonyin a, mo ntetee no bɛboa wɔn ma wɔahu “papa ne bɔne mu nsonsonoe.” (Heb. 5:14) Mpanyimfo fi osuahu mu nim sɛ wontumi mfa wɔn ho nto wɔn nsusuwii so; ɛsɛ sɛ wɔde wɔn ho to Yehowa so na ama wɔateɛ wɔn akwan. (Mmeb. 3:5, 6) Eyi ho hia kɛse ma mmabun a wonni osuahu pii wɔ asetra mu no.
4 Awofo, bere a mo mma bɛn mpanyin afe so, anaasɛ wonnya nnuu hɔ mpo no, mumfi nokwaredi mu ne wɔn nsusuw adwuma a wɔbɛyɛ daakye ho. Sukuu afotufo, akyerɛkyerɛfo, ne wɔn mfɛfo sukuufo bɛbɔ mmɔden sɛ wɔbɛtwetwe wɔn adwene ma wɔadi wiase nneɛma akyi. Boa wo mma ma wɔmpaw sukuu adesua a ɛbɛma wɔanya ntetee pa a ebesiesie wɔn ma wɔanya wɔn honam fam ahiade a wɔremmu wɔn ani ngu Ahenni nneɛma so. (1 Tim. 6:6-11) Mpɛn pii no, ebia ntoaso sukuu adesua a nsaanodwuma ka ho anaa adwuma a wobesua ara ne nea wohia na ama wɔatumi anya wɔn asetrade a ɛfata bere a wɔreyɛ daa akwampae adwuma no.
5 Monhyɛ mmabun nkuran ma wɔmfa sigyadi nsi wɔn ani so. Sɛ akyiri yi wosi gyinae sɛ wɔbɛware a, ɛbɛboa wɔn ma wɔatumi adi aware mu asɛyɛde a emu yɛ duru ho dwuma. (Hwɛ May 15, 1992, Ɔwɛn-Aban no kratafa 14, nkyekyɛm 18.) Sɛ woreka akwampae adwuma, baabi a wohia mmoa kɛse a wɔbɛsom, Betel som adwuma, ne asɛmpatrɛw adwuma ho asɛm wɔ ɔkwan a ɛhyɛ nkuran so a, ma mmabun mfi wɔn mmofraase nnya ɔpɛ sɛ wɔbɛbɔ wɔn bra wɔ ɔkwan bi so a ɛbɛsɔ Yehowa ani, na afoforo anya so mfaso, na ɛde anigye abrɛ wɔn ankasa.
6 Mmabun, Momfa Bere Nyinaa Som Adwuma no Nni Kan: Mmabun, enhia sɛ mudwen sɛnea akwampae adwuma no te ho. Mubetumi asɔ ahwɛ nkakrankakra denam akwampaefo aboafo adwuma a mobɛyɛ bere biara a mubetumi, bere a mokɔ sukuu no ne akwamma bere. Ɛno ansa na mubehu sɛnea akwampae adwuma no ma obi nya abotɔyam ankasa! Efi nnɛ kosi akwamma bere a ɛware no, so wubetumi ayɛ nhyehyɛe a ɛbɛma woayɛ akwampaefo aboafo adwuma no bi?
7 Sɛ woyɛ onua aberantewaa wɔ Onyankopɔn ahyehyɛde no mu a, susuw sɛnea wobɛfata sɛ asafo mu ɔsomfo no nso ho anibere so. (1 Tim. 3:8-10, 12) Afei nso, si gyinae sɛ ebia wobɛpɛ sɛ wubisa Betel som ho kwan anaasɛ wobɛkɔ Asomfo Ntetee Sukuu no bi bere a wudi mfe a ɛma wofata sɛ wokɔ no. Osuahu a wubenya wɔ akwampae adwuma no mu no bɛma woanya asuade a mfaso wɔ so te sɛ sɛnea wodi bere nhyehyɛe so, sɛnea wubetumi atoto wo nneɛma yiye, sɛnea wubetumi ne afoforo abɔ, ne sɛnea wubetumi adi asɛyɛde ho dwuma. Eyi nyinaa besiesie wo ama ɔsom mu hokwan akɛse akyiri yi.
8 Ade titiriw a ɛbɛma woatumi ayɛ bere nyinaa som adwuma no ne sɛ wobɛyɛ nsi wɔ teokrase nnwuma mu. Ɔsomafo Paulo hyɛɛ su a ɛte saa ho nkuran, na ɔkyerɛɛ nhyira a ebefi mu aba sɛ: “Biribiara a moreyɛ no, mumfi ɔkra nyinaa mu nyɛ no sɛ moyɛ ma Yehowa, . . . efisɛ munim sɛ Yehowa nsam na mubenya akatua a ɛsɛ no sɛ apɛgyade.” (Kol. 3:23, 24) Ɛmmra sɛ Yehowa bɛma woanya anigye pii wɔ bere nyinaa som adwuma no mu!