Nea Ɛbɛma Yɛatu Mpɔn Wɔ Asɛnka Mu​—Boa Bible Asuafo Ma Wonhyira Wɔn Ho So na Wɔmmɔ Asu

NEA ENTI A ƐHO HIA: Sɛ Bible asuafo bɛsɔ Yehowa ani a, ɛsɛ sɛ wohyira wɔn ho so ma Yehowa na wɔbɔ asu. (1Pe 3:21) Wɔn a wɔbɔ wɔn bra ma ɛne wɔn ahosohyira hyia no nya honhom fam ahobammɔ. (Dw 91: 1, 2) Kristoni hyira ne ho so ma Yehowa na ɛnyɛ onipa, adwuma, anaa ahyehyɛde biara. Enti, ɛsɛ sɛ Bible asuafo nya ɔdɔ ne anisɔ ma Onyankopɔn.​—Ro 14:7, 8.

ƆKWAN A WOBƐFA SO AYƐ:

• Sɛ moresua ade a, ma wonhu sɛnea adesua no fa Yehowa ho. Hyɛ no nkuran ma ɔnkenkan Bible no da biara, na ma onhu sɛ ɛnsɛ sɛ ogyae Yehowa “mpaebɔ da.”​—1Te 5:17; Yak 4:8

• Hyɛ wo Bible suani nkuran ma ɔmfa nyɛ ne botae sɛ obehyira ne ho so na wabɔ asu. Ansa na ɔbɛbɔ asu koraa no, boa no ma ɔmfa botae ahorow nsisi n’ani so. Ebi ne mmuae a ɔbɛma wɔ asafo nhyiam ase anaa n’afipamfo ne n’adwumamfo a obedi wɔn adanse. Kae sɛ Yehowa nhyɛ obiara sɛ ɔnsom no. Ahosohyira yɛ ankorankoro gyinaesi.​—De 30:19, 20

• Nsakrae biara a ɛsɛ sɛ wo Bible suani yɛ no, hyɛ no nkuran ma ɔnyɛ na ama wasɔ Yehowa ani. Ɛno bɛma watumi abɔ asu. (Mme 27:11) Esiane sɛ su ne nneyɛe tumi gye ntini wɔ koma mu nti, ebia ɛho behia sɛ yɛkɔ so boa Bible suani ma oyi nipasu dedaw no na ɔhyɛ nipasu foforo. (Efe 4:22-24) Asɛm a ɛba Ɔwɛn-Aban mu a ɛne “Bible Tumi Sesa Nnipa” no, wo ne no mmɔ ho nkɔmmɔ

• Ka anigye a wanya wɔ Yehowa a woresom no no ho asɛm kyerɛ no.​—Yes 48:17, 18