Hwɛ Yiye Na Woannye Nsɛm Nyinaa Anni
Ɛnnɛ, ade kye biara a yɛte nsɛm. Nsɛm a ɛfa yɛn asom nyɛ asɛm ketewa. Ebi boa yɛn ma yehu nea yɛyɛ a yebenya apɔwmuden na yɛakwati asiane. Nanso nsɛm a wote no, hwɛ yiye na woannye ne nyinaa anni, efisɛ ɛtɔ da a, na ɛyɛ:
Amanneɛbɔ a yɛakyinkyim no
Amanneɛbɔ a ɛnyɛ nokware
Yɛhwɛ bere a COVID-19 nsanyare no tuu atese no sei a, panyin a ɔda Amanaman Nkabom no ano no de too gua sɛ, atosɛm bebree na nkurɔfo de nam, enti ɔmanfo nna wɔn ho so. Ɔkaa sɛ, “Nnansa yi, obiara sɔre a ose, ‘wonom aduru wei a ɛbɛboa wo; woyɛ wei a ɛbɛboa wo.’ Nanso nea wɔka no bi wɔ hɔ a, woyɛ a ebetumi apira wo.” Ɔde kaa ho sɛ, “Atosɛm a ɛnenam mframa mu nyɛ asɛm ketewa. Wokɔ Intanɛt so sei a, yese-yese abu so wɔ hɔ. Ebinom nso tumi twa asɛm to afoforo so sɛnea ɛbɛyɛ a nkurɔfo bɛfa wɔn ho tan.”
Yenim sɛ nnaadaa de, ɛbaa wiase nyɛ nnɛ. Nanso Bible ma yehu sɛ “nnipabɔnefo ne nnaadaafo bɛkɔ wɔn anim wɔ bɔne mu.” (2 Timoteo 3:1, 13) Seesei nso Intanɛt nti, ɛnyɛ den koraa sɛ atosɛm bɛtrɛw. Ɛreyɛ ara ni na obi de bi abrɛ wo; sɛ wo nso wunnim sɛ ɛyɛ atoro a, wobɛhwɛ na wo nso wode nam. Ɛno nti, nsɛm a yɛn nsa ka wɔ yɛn email mu, yɛn sohyia midia so, ne kaseɛbɔ a ɛba yɛn fon so no, wobɛhwɛ mu no, na dodow no ara yɛ nsɛm a yɛakyinkyim no, ne atoro a ɛne nokware sɛ.
Ɛnde, saa nsɛm a ɛnyɛ nokware ne yese-yese a ɛnenam baabiara yi, dɛn na ɛbɛboa wo na woannye anni? Hwɛ Bible mu afotusɛm bi a ɛbɛboa wo.
Ɛnyɛ nea wubehu anaa nea wobɛte biara na ɛsɛ sɛ wugye di
Nea Bible aka: “Ogyimifo gye asɛm biara di, na onyansafo de, anammɔn biara a obetu no, ɔhwɛ no yiye.”—Mmebusɛm 14:15.
Sɛ yɛamma yɛn ani anna hɔ a, ɛnyɛ den koraa sɛ obi bɛdaadaa yɛn. Wei ho nhwɛso ne sɛ, ɛtɔ da a nkurɔfo tumi fa mfoni bi, na wɔakyerɛw asɛm bi a obi aka anaa asɛm foforo bi agu ho, na wɔde nenam Intanɛt ne sohyia midia so. Etumi nso yɛ video ntiantiaa. Mfoni ne video a ɛte saa no, ɛtaa yɛ aseresɛm. Nanso mpɛn pii no, wɔtumi fra mfoni anaa video no mu. Sɛ ɛyɛ mfoni bi a wɔakyerɛw obi asɛm agu ho a, ɛtɔ da a, asɛm a nipa no kae no, na wɔatwa ne fã ketewaa bi abɛto hɔ. Ɛyɛ video nso a, ɛtɔ da a wobɛhwɛ mu no, na ɛyɛ video bi na wɔakotu mfinimfini baabi, enti ɛmma wunhu asɛm no nyinaa ani so. Ebi nso wɔ hɔ a, wɔtumi de obi mfoni yɛ video. Wobɛhwɛ video no, na nipa no reka biribi anaa ɔreyɛ biribi, nanso wobɛhwɛ mu no, na ɔnkaa saa asɛm no wɔ baabiara, anaa ɔnyɛɛ saa ade no.
“Atosɛm a nkurɔfo pue so wɔ sohyia midia so no, dodow no ara yɛ mfoni ne video a wɔatwa ne fã bi afi hɔ anaa wɔafra mu, enti ɛmma wunhu asɛm no nyinaa ani so yiye.”—Axios Media.
Bisa wo ho sɛ: ‘Wei yɛ asɛm a esii paa, anaa obi na wakotwa asɛm bi fã bi de abɛto hɔ?’
Hwɛ baabi a asɛm no fi, na hwehwɛ mu hwɛ sɛ ɛyɛ nokware anaa
Nea Bible aka: “Monhwehwɛ nneɛma nyinaa mu nhwɛ sɛ ɛyɛ nokware anaa.”—1 Tesalonikafo 5:21.
Wote asɛm bi a, ansa na wubegye adi anaa wode bɛsɛnde obi no, di kan hwehwɛ mu hwɛ sɛ ɛyɛ nokware anaa. Sɛ ɛyɛ asɛm bi a ɛda obiara ano anaa biribi a nkurɔfo reka ho asɛm bebree wɔ TV ne radio so mpo a, ɛsɛ sɛ wohwehwɛ mu. Wobɛyɛ no sɛn?
Hwɛ baabi a asɛm no fi. Sɛ TV steehyin, radio steehyin, anaa nnwumakuw bi de asɛm bi reto gua a, ɛtɔ da a mfaso a wɔrepɛ nti, wɔtumi kyinkyim no. Wɔtumi nso ka asɛm no wɔ ɔkwan bi so a ɛbɛma amanyɔkuw bi asɛm ayɛ dɛ. Enti wote asɛm bi fi baabi a, tietie mu bi ka ho; hwɛ nea nsɛnkyerɛwfo afoforo aka afa ho. Ɛtɔ da nso a, wobɛhwɛ na w’adamfo bi de asɛm bi afa email so abrɛ wo, anaa ɔde ato sohyia midia so. Ebia na saa asɛm no nyɛ nokware, nso w’adamfo no nnim no saa. Enti nsɛm a ɛte saa no, ansa na wubegye adi no, di kan hwɛ sɛ hena koraa na odii kan de saa asɛm no too gua.
Hwɛ hu sɛ asɛm no nyinaa yɛ nokware, na ɛnsesae. Hwehwɛ mu hu da a asɛm no sii. Afei nso, hwɛ sɛ wubenya adanse a edi mu a ɛfoa asɛm a wɔreka no so. Ɛtɔ da nso a, nsɛm no bi wɔ hɔ a, wubehu sɛ wɔabɔ no mua ayiyi bi afi mu. Ebi nso a, na wɔahyɛ da aka no wɔ ɔkwan bi so a ɛbɛma wo werɛ ahow, ɛbɛhyɛ wo abufuw, anaa ɛbɛma woanya atenka foforo bi. Nsɛm a ɛtete saa nyinaa, ɛsɛ sɛ woyɛ ahwɛyiye paa wɔ ho.
“Sɛnea ɛho hia sɛ wotaa hohoro wo nsa no, saa ara na nnɛ nso ɛho abehia sɛ asɛm biara a wobɛte no, wobɛhwehwɛ mu yiye.”—Sridhar Dharmapuri; ɔyɛ ɔpanyin bi a ɔda Amanaman Nkabom no bagua a ɛhwɛ aduan ho nsɛm so no ano (Senior Food Safety and Nutrition Officer)
Bisa wo ho sɛ: ‘Mehwɛ saa amanneɛbɔ yi a, ɛyɛ asɛm paa a esii, anaa obi na wabɔ ne tirim reka biribi te sɛ nea ɛyɛ asɛm paa? Asɛm no nyinaa na wɔaka no, anaa wɔde bi asie?’
Wote asɛm bi na ɛyɛ w’asom dɛ a, ɛno ara kɛkɛ nkyerɛ sɛ ɛyɛ nokware
Nea Bible aka: “Obiara a ɔde ne ho to n’ankasa koma so yɛ ɔkwasea.”—Mmebusɛm 28:26.
Ade baako a ɛwɔ nnipa ho ne sɛ, sɛ yɛte asɛm bi na ɛyɛ yɛn asom dɛ a, wobɛhwɛ no, na yɛagye adi. Nnwumakuw a wɔyɛ Intanɛt ho adwuma no, ɛyɛ a wɔhu nneɛma a w’ani gye ho a wotaa kenkan ho ade anaa wohwɛ wɔ Intanɛt so. Enti wubehu sɛ amanneɛbɔ a ɛfa saa nneɛma no ho no, wɔbɛma aba wo fon so bebree. Nanso kae sɛ asɛm a ɛyɛ w’asom dɛ no, ɛnyɛ daa na ɛyɛ nokware.
“Nnipa ho ade baako ne sɛ, yetumi to yɛn bo ase dwen nneɛma ho yiye. Enti yɛte asɛm bi a, yetumi susuw ho hwɛ sɛ ɛyɛ nokware anaa. Nanso ɛtɔ da a, biribi a yɛn ani da so anaa biribi a yesuro nti, yɛte asɛm bi na ɛyɛ yɛn asom dɛ a, ɛhɔ ara na yɛagye adi.”—Peter Ditto, ɔyɛ ɔbenfo a osua nnipa suban ho ade.
Bisa wo ho sɛ: ‘Saa asɛm yi, yɛ a ɛyɛ m’asom dɛ ara nti na magye adi anaa?’
Ntrɛw atosɛm mu
Nea Bible aka: “Nkeka nkurɔfo ho nsɛm a ɛnyɛ nokware.”—Exodus 23:1.
Kae sɛ, sɛ wode asɛm bi sɛnde obi a, ebetumi atɔ ne tirim, na obetumi nso adi akyi akɔyɛ biribi. Enti sɛ woanhyɛ da mpo na wode asɛm bi a ɛnyɛ nokware sɛnde obi a, anhwɛ a nea ebefi mu aba nye.
“Ansa na wode asɛm bi bɛsɛnde obi koraa no, twɛn kakra, na bisa wo ho sɛ, ʻSaa asɛm a mede rebɛsɛnde yi, migye di paa sɛ ɛyɛ nokware?’ Wei ho hia paa. Sɛ obiara reyɛ saa a, anka atosɛm a ɛredi ahim wɔ Intanɛt so no, ɛso bɛtew koraa.”— Peter Adams; kuw bi a yɛfrɛ wɔn News Literacy Project no, ɔno na ɔyɛ ɔpanyin a ɔda ano no abadiakyiri.
Bisa wo ho sɛ: ‘Saa asɛm a mede rebɛsɛnde yi, metumi de me nsa asi me bo aka sɛ ɛyɛ nokware?’