Djoshuwa
3 Djoshuwa wakamuka comacibesi-besi, uye iyena pamwepo no Aisraeri* ese akabva ku Sitimu uye akaguma ku murambo we Djorodhani. Akapedza usiku wese ipona asati abira murambo.
2 Mumasure me mazuwa matatu, atungamiriri e anhu akahamba mu musasa wese 3 ecibvunza anhu kuti: “Kana mukaona Areka yo Citenderano ya Djehovha Mwari wenyu yecithwarhwa no apristi e dzinza ra Revhi, imwimwi munodikana kubuda pa mbuto yamuri moiteera. 4 Asi munodikana kugara kure nayo ke mukuwo ungakwana makubhiti 2000;* amudikani kukhwedera padhuze nayo kudarika mukuwo uwona! Nge mushobo uwona mucaziya gwanza ramunodikana kuhamba naro, ngokuti amusati makambohamba no gwanza irona.”
5 Hino Djoshuwa wakati ku anhu: “Dzicenesei, ngokuti mangwana Djehovha acaita zviro zvinoshamisa pakati penyu.”
6 Mumasure mazvo, Djoshuwa wakati ku apristi: “Thwarai Areka yo Citenderano uye tungamirai mberi ke anhu.” Ngokudaro, awona akathwara Areka yo Citenderano uye akatungamira mberi ke anhu.
7 Djehovha akati kuna Djoshuwa: “Kubvira nyamasi, ndicakukwidziridza pamberi pe Aisraeri ese, kuitira kuti awona aziye kuti ndinonga ndinewe hingana mushobo wandainga ndina Mozesi. 8 Iwewe unodikana kupasa mutemo uu ku apristi acathwara Areka yo Citenderano: ‘Pamucaguma mu muceto me murambo we Djorodhani, munodikana kurumbwa makaima mu mvura ye murambo we Djorodhani.’”
9 Uye Djoshuwa wakati ku Aisraeri: “Uyai kuti mupurutane masoko a Djehovha Mwari wenyu.” 10 Hino Djoshuwa wakati: “Izvi ndizvo zvicaita kuti muziye kuti pakati penyu pano Mwari mupenyu, uye kuti zvezvirokwazvo iyena acadzingira pamberi penyu Akanani, Ahiti, Ahivhi, Aperezi, Ajirgazi, Aamori, uye Ajebhuzi. 11 Onai! Areka yo Citenderano ya Tenzi we nyika yese iri kutungamira mberi kenyu yecipinda mu murambo we Djorodhani. 12 Parizvino, sanangurai anarume 12 pa madzinza e Israeri, pa dzinza rimwe na rimwe mwanarume umwe. 13 Tsoka dzo apristi ari kuthwara Areka ya Djehovha, Tenzi we nyika yese, padzicatsika mvura yo murambo we Djorodhani, mvura yo murambo we Djorodhani inobva nge cekumusoro icaparadzaniswa uye icaima hingana muru.”
14 Ngokudaro, anhu paakabuda mu matenda awo, asati abira murambo we Djorodhani, apristi aithwara Areka yo Citenderano akatungamira mberi ke anhu. 15 Apristi aithwara Areka paakaguma ku murambo we Djorodhani uye paakandotsika mvura yo mu muceto (ngokuti murambo we Djorodhani waidzarisa maningi uye waipsvetekera kumatii ese mu mazuwa ese e kukorora), 16 mvura yaibva ngece kumusoro ke murambo yakaima. Mvura iyona yakaima hingana muru kure no ipona, ku Adhamu, thaundi riri dhuze no Zareta, asi nge ndii rimweni mvura yaierera yecienda ku Bahari ro Arabha kureya Bahari ro Munyu,* yakaerera yese yopera. Mvura yakaima, uye anhu akadarika dhuze no Djeriko. 17 Pa nguwa yekuti apristi aithwara Areka yo Citenderano ya Djehovha akarumbwa akaima pa mataka akaoma pakati pe murambo we Djorodhani, Aisraeri ese aidarika nge pa mataka akaoma dakara anhu ese abira Djorodhani.