Kucedza kakaita hinga bhirigi rinomubatanidza ne ana enyu
ABEREKI
5 Kucedzesana
ZVINOREYEI?
Kucedzesana ne ana enyu kunoreya kuabvunza zvamunorangarira uye mazwiro enyu, uye awona ecireketawo maonero awo.
NGEI ZVECIKOSHA?
Ana ari kukura zvinoashuphira kureketa no abereki awo. Bhuku rinozwi Decifrando o Código rinoti: “Ana paanonga aciri adoko, anonga akasudzunuka kubvunza abereki awo zvese. Asi paanokura anonga asingacadi kureketa zviro zvimweni ne abereki awo.” Ndiyo ndaa pa nguwa ii, abereki ndipo paanodikana kunyanya kureketa ne ana awo.
ZVAMUNGAITA
Garai makagadzirira kucedza ne ana. Cedzai nawo pa nguwa ipi hayo yaanonga akasudzunuka kureketa, kunyazi pakati pe usiko usiko.
“Mungarangarira kubvunza mwana wenyu kuti, Zvino waakuda kureketa neni pa nguwa ino, teciti taswera tese? Asi amuzozvireketi ngekuti hinga mubereki, munotodawo kuti mwana wenyu amubvunze zviri mu mwoyo make.”—Lisa.
“Inini hangu kuwata ndinokuda, asi nyaya dzimweni dzinokosha dzandakacedza ne ana angu takadzicedza pakati pe usiku kamare.”—Herbert.
ZVINOBHUYA BHAIBHERI: “Umwe na umwe ngaasiye kurumbwa ecipsvaka zvake ega, asi zvo munhu umweni.”—1 Akorinti 10:24.
Purutanai mwana wenyu. Baba amweni anoti: “Nguwa dzimweni ana angu paanonga ecireketa neni, ndinonga ndecitorangarirawo zviro zvimweni uye anoziya kuti ndangariro dzangu adziripopi!”
Dzimisai TV ne thurufunu pamunonga mecireketa ne mwana wenyu. Purutanai zvaanenge ecireketa, uye pangidzai kuti muno hanya ne zvaari kureketa, kunyazi zveciita hingana zvisina musoro.
“Tinodikana kupangidza ana edu kuti tinokoshesa zvaanoreketa uye mazwiro awo. Kana akaona kuti atiakoshesi, aazotibvunzi zviri kuanetsa kana kuti anopsvaka munhu umweni wekubvunza.”—Maranda.
“Purutanai mwana wenyu, kunyazi kana ecirangarira zvisirizvopi.”—Anthony.
ZVINOBHUYA BHAIBHERI: “Ngwarirai kupurutana kamunoita.”—Ruka 8:18.
Cedzai ne ana enyu pa nguwa yamunonga meciita zviro zvimweni. Nguwa dzimweni ana anosudzunuka kureketa pamunonga meciita nawo mabasa e panyumba.
“Tinoreketa ne ana patinonga tiri mu karu. Kugara katinonga takaita tiri pa dii ne dii kunoita kuti tinyase kucedza.”—Nicole.
Abereki anokwanisawo kucedza ne ana awo panguwa yekurhya.
“Manheru patinonga tecirhya, umwe na umwe wedu unoreketa zviro zvaitika zuwa rese, zvamupfadza ne zvisikazi kumupfadza. Kucedza pa nguwa ii kunoita kuti mhuri yedu ibatane uye tinotsigira kana pano ane zviri kumunetsa.”—Robin.
ZVINOBHUYA BHAIBHERI: “Kasikai kuzwa, mononoka kureketa.”—Tiyago 1:19.