Munamato Ungamubetserai Kudini?

Pamela paakaziya kuti wainga ano kanseri, iyena wakapsvaka rubetso ro mamedhiko. Asi iyena wakanamatawo kuna Mwari ecikumbira simba kuti akwanisane no mugariro uu waishupha. Kodi mumamato wakamubetsera here?

Pamela unopanganidza eciti: “Pandairaphwa nhenda yangu yo kanseri, kakawanda kakhona ndaiithya. Asi pandakanamata kuna Djehovha Mwari, ndakazwa runyararo re mukati uye ndaikwanisana no nyaya ii ndisikathyi. Ndiciri kuzwa marhwadzo akawanda, asi munamato unondibetsera kuti ndirumbwe ndino marangariro akanaka. Anhu paanosondibvunzisa kuti ndiri kuzwa kudini, ndinoti: ‘Andiripi kunyasa kuzwa zvakanaka, asi andiripi kunetseka nge zvazvo!’”

Izvirokwazvo kuti, isusu atidikani kuetsera kugumirhwa no matambudziko akakura kuti titange kuita munamato. Tese isusu tinosongana no matambudziko, azvinei kuti matambudzikoo akakura kana kuti haiwa, uye kakawanda kakhona tinoda rubetso kuti tikwanisane nawo. Kodi munamato ungatibetsera here?

Bhaibheri rinobhuya kuti: “Khandira mutoro wako kuna Djehovha, uye iyena acakunyaradza. Aazombotenderi kuti munatsi ambwere.” (Pisarema 55:22) Zvinopfadza maningi kuziya izvona! Hino, munamato ungamubetserai kudini? Kana imwimwi mukanamata kuna Djehovha nge mushobo unomupfadza, iyena acamupasai zvamunoda kuti mukwanisane no matambudziko enyu.—Onai bhokisi rakazwi “Makomborero Amungatambira Nge Ndaa ye Munamato.”

Makomborero Amungatambira Nge Ndaa ye Munamato

Runyararo mu ndangariro

“Zvikumbiro zvenyu ngazviziiswe Mwari; uye runyararo ra Mwari rinodarika kuzwisisa kese ricacengeta mwoyo yenyu no ndangariro dzenyu peciseenzeswa Kristu Djesu.” (Afiripi 4:6, 7) Kana imwimwi mukabvunza Mwari matambudziko enyu uye zvinomurhyai mwoyo, iyena acamubetserai kuti mugare makaterama uye muziye zvamunodikana kuita kunyazi mecisongana no mugariro unoshupha.

Ungwaru unobva kuna Mwari

“Kana umwe wenyu asina ungwaru, ngaarumbwe ecikumbira Mwari, ngokuti iyena anopasa munhu wese no mwoyo wese asikamushori, acaupaswa kamare.” (Tiyago 1:5) Patinonga tecisongana no mugariro unoshupha, anguwapi dzatinokwanisa kuita zvisananguro zvakanakisisa. Kana imwimwi mukanamata kuna Mwari mecikumbira ungwaru, iyena angamubetserai kuti muedzurire mazano akanakisisa ari mu Soko rake, Bhaibheri.

Simba uye kunyaradza

“Ndino simba rokuita zviro zvese ngokuti pane anondipasa simba.” (Afiripi 4:13) Djehovha ndi Mwari we Masimba Ese. Ndiyo ndaa, iyena angamupasai simba ramunoda kuti mukwanisane no zvinetso zvenyu kana kuti mukwanise kuzvishingirira. (Isaya 40:29) Bhaibheri rinobhuyawo kuti Djehovha ndi “Mwari we kunyaradza kese.” Iyena angatinyaradza “pa matambudziko edu ese.”—2 Akorinti 1:3, 4.

ITAI MUNAMATO KUNA MWARI!

Djehovha aabambidziri munhu kuti aite munamato kaari. Pane kudaro, iyena no rudo, anotipika kuti tiite munamato kaari. (Djeremiya 29:11, 12) Hino, kana imwimwi muri kuona hinga kuti minamato yenyu yamakamboita aizi kudairhwa? Musadzirhye mwoyo uyewo musarembe. Rangarirai zvinoteera: Abereki ano rudo pamweni aabetseri ana awo nge mushobo waanoda kana kuti pa nguwa yaanoda kubetserhwa. Pamweni abereki ano mushobo umweni we kuabetsera wakanakisisa maningi. Asi zvirokwazvo nge zvekuti, bereki ano rudo anobetsera ana awo.

Djehovha Mwari—ndi Baba ano rudo asikaezaniswi na baba api hawo uye iyena anoda kumubetserai. Kana imwimwi mukanyasa kuongorora zvinorekethwa no Bhaibheri uye mozviseenzesa, Mwari acadaira minamato yenyu nge mushobo wakanakisisa!—Pisarema 34:15; Mateu 7:7-11.