MUSORO WE KUFUNDA 34
NGOMA 3 Djehovha Ndiye Simba ne Kariro Yangu
Tendai Rurekerero ra Djehovha
“Imwimwi makandirekerera zvishaishi zvangu.”—PIS. 32:5.
CINANGWA
Kuzwisisi kuti ngei zvinokosha kutenda rurekerero ra Djehovha uye kuona gondeso ye Bhaibheri yekuti Djehovha anorekerera aya acinyuka.
1-2. Mushaishi wacinyuka ungazwa kurerukirhwa kudini? (Onaiwo pakapa.)
MAMBO Dhavhidhi waizwisisa kuti cinyi cinozwi kuzwa ndaa nge ndaa ye zvishaishi zve kare. (Pis. 40:12; 51:3, musoro) Iyena wakaita zvishaishi zvakakura maningi mu upenyu. Asi, nge ndaa ye kucinyuka zvecibva pa mwoyo, Djehovha akamurekerera. (2 Sam. 12:13) Nge kudaro, Dhavhidhi waizwisisa kuti cinyi cinozwi kurerukirhwa nge kutambira rurekerero ra Djehovha.—Pis. 32:1.
2 Kuita hingana Dhavhidhi, isusu tingazwa takarerukirhwa nge kutambira usisi wa Djehovha. Zvinotinyaradza maningi kuziya kuti Djehovha anorekerera zvishaishi zvedu kunyazi zvakakura maningi. Iyena akagadzirira kurekerera paya patinocinyuka zvezvirokwazvo, patinobhuya zvishaishi zvedu uye patinopeta masimba kuti tisahwirirezve kuzviita! (Zvie. 28:13; Zvii. 26:20; 1 Juau 1:9) Zvakanaka kugara no rugondo rokuti Djehovha paanotirekerera, iyena anorekerera zvezvirokwazvo zvinotoita hinga kuti zvishaishi izvona azvizi kumboitika!—Ezek. 33:16.
Mambo Dhavhidhi akatara Mapisarema akawanda anoreketa ngezve rurekerero ra Djehovha (Onai mandima 1-2)
3-4. (a) Kunyazi mumasure me kubhabhatidzwa hanzvadzi imweni yaizwa kudini? (b) Zvinyi zvaticaona mu fundo ino?
3 Nguwa dzimweni, anganani anoona kuti zvinoshupha kutenda rurekerero ra Djehovha. Onai zvakaitika na Jennifer wakarerhwa mu cokwadi. Paainga ari mudjaha, iyena wakatanga kuita zviro zvakashata uye waifisira izvona ku abereki ake. Iyena unobhuya eciti: “Inini ndairarama upenyu we uhure, ndaimwa maningi, ndaireketedzana no anhu ese uye ndaigara ndeirangarira basi kugara no mare. Paapadarika makore manganani, iyena wakahwirira kuna Djehovha uye wakabhabhatidzwa. Uye iyena unopanganidza eciti: Inini ndaiziya kuti Bhaibheri rinobhuya kuti nge ndaa ye cibairo ca Djesu, Djehovha angakwanisa kurekerera zvitema zvedu. Asi, kunyazi mumasure me kucinyuka uye kukumbira rurekerero kuna Djehovha, ngo mukati me mwoyo inini ndainga ndecikana-kana kuti iyena wandirekereradi here.”
4 Imwimwi munozwawo kudaro here? Munoona zvecishupha kugara no rugondo rokuti Djehovha arekerera zvishaishi zvenyu zve kare? Kubhuya zvazviri, iyena anoda kuti imwimwi mugare no rugondo rimwero rainga rina Dhavhidhi rokuti Djehovha i Mwari ano usisi uye akarekerera zvishaishi zvake. Mu fundo ino, ticaona kuti ngei zvinokosha kutenda rurekerero ra Djehovha uye kuti cinyi cicatibetsera kuita izvona.
NGEI ZVECIKOSHA KUTENDA RUREKERERO RA DJEHOVHA?
5. Sathani unoda kuti titenderei? Pasai muezaniso.
5 Patinotenda rurekerero ra Djehovha tinogara takadziiririka pa imwe ye mirau ya Sathani. Musakanganwe kuti Sathani anoda kuti isusu tiime kuseenzera Djehovha uye ucaita zviri zvese kuti aite izvona. Iyena unoda kuti titendere kuti zvishaishi zvedu azvirekererhwi. Onai muezaniso we mwanarume umweni we ku Korinti wekuti wakabviswa mu ungano nge ndaa ye kuita uhure. (1 Ako. 5:1, 5, 13) Nokuhamba ke nguwa iyena wakazocinyuka. Sathani waida kuti ungano irambe kumurekerera uye itame kumutambira. Pa nguwa imweyo, Sathani waida kuti mwanarume uu azwe kuti aasisiri rurekerero ra Djehovha uye kuti ‘anyiswe ngo kutsukwara kakakura’ zvekuti agume pakusiya kuseenzera Djehovha.” Sathani aazi kucinja cinangwa cake uye mishobo yake. Asi isusu tinoziya kuti tingakwanisa kurhwisana naye “ngekuti mazano ake tinoaziya.”—2 Ako. 2:5-11.
6. Tingaita kudini kuti tirerukirhwe uye kubvisa mutoro wekudzipasa ndaa?
6 Patinotenda rurekerero ra Djehovha, isusu tinozwa takarerukirhwa uye tisikadzipasi ndaa. Patinoita citema, zviri nyore kudzipasa ndaa. (Pis. 51:17) Izvona zvakanaka ngekuti hana yedu ingatiitisa kuti ticinje maitiro edu uye toita zviro zvakanaka. (2 Ako. 7:10, 11) Asi kana tikarumbwa tecidzipasa ndaa kunyazi mumasure me kucinyuka tingapedzesera taora mwoyo uye tosiya kuseenzera Djehovha. Patinotendera rurekerero ra Djehovha, tinosiya kudzipasa ndaa uye ngekudaro ticaenderera mberi uye ticarumbwa teciseenzera Djehovha nge mushobo waanoda—no hana yakacena uye no mupfaro we zvirokwazvo. (Ako. 1:10, 11; 2 Ti. 1:3) Asi tingaita kudini kuti mwoyo wedu ugare no rugondo rokuti Djehovha atirekerera?
CINYI CINGATIBETSERA KUTEDA RUREKERERO RA DJEHOVHA?
7-8. (a) Djehovha akabhuyei nge zvake kamare kuna Mozesi? (b) Izvona zvinotipasa rugondo rei? (Ekisodho 34:6, 7)
7 Nyasai kurangarira zvakabhuya Djehovha nge zvake kamare. Ngo muezaniso, onai zvakabhuya Djehovha kuna Mozesi pa Dunhu re Sinai.a (Erengai Ekisodho 34:6, 7.) Pa zvese zvekuti Djehovha aizobvunza Mozesi nge zvake kamare uye mawara ake, Djehovha akasanangura kubhuya kuti iyena ndi “Mwari we usisi no nyasha.” Kodi Mwari wakadai waizoramba kurekerera museenzi wake wacinyuka zvezvirokwazvo pazvishaishi zvake here?
8 Djehovha paanobhuya kuti ndi Mwari uno usisi, tingagondadi kamare kuti ndicokwadi. Iyena aambonyepi uye ndi Mwari we zvirokwazvo. (Pis. 31:5) Hino tingagonda no zvaanobhuya kuti: ‘Kana zvecimushuphirai kutama kudzipasa ndaa nge ndaa ye zvishaishi zvakakura zvamakaita, dzibvunzisei kuti: Inini ndinotendera kuti Djehovha zvezvirokwazvo ano nyasha no usisi, uye kuti aazombosiyi kurekerera munhu upi hake unonga acinyuka here? Hino, andidikaniwo here kutenda kuti iyena andirekerera?’
9. Pisarema 32:5 inotifundisei ngezve mushobo unorekerera Djehovha zvishaishi zvedu?
9 Rangarirai ngezvakafemera Djehovha ku atari e Bhaibheri ecibhuya ngezve rurekero rake. Nge muezaniso, onai zvakarekethwa nge mutari we Bhaibheri Dhavhidhi ngezve rurekerero ra Djehovha. (Erengai Pisarema 32:5.) Dhavhidhi wakati: “Imwimwi makarekerera zvishaishi zvangu uye zvitema zvangu.” Soko reci Hebheru rakaturikirhwa kuti “kurekerera” rinoda kureya kuti “kupurumutsa,” “kudusa” kana kuti “kutora.” Paakarekerera Dhavhidhi, Djehohva akaita hingana kuti apurumutsa zvishaishi zvake uye ozvitora. Dhavhidhi wakazwa akarerukirhwa ngekuti, wakakwanisa kusudzunuka pazvishaishi zvainga akathwara. (Pis. 32:2-4) Isusu tingazwawo kudaro. Patinocinyuka zvezvirokwazvo, atidikani kurumbwa takathwara mutoro we kudzipasa ndaa nge ndaa ye zvishaishi zvatakaita, pane kudaro, tinodikana kupfara zvezvirokwazvo ngekuti Djehovha atirekerera zvacose.
10-11. Masoko ekuti “akagadzirira kurekerera” anotifundisei ngezva Djehovha? (Pisarema 86:5)
10 Eregai Pisarema 86:5. Mu Pisarema ii Dhavhidhi unobhuya kuti Djehovha “akagadzirira kurekerera.” Panocokuita no masoko aya referensiya imweni yo Bhaibheri yakabhuya ngezva Djehovha yeciti: “[Iyena ] ndi ‘murekereri’—izvona zvinoita dii re ‘unhu wake.’” Ngei Djehovha akadaro? Pisarema imwe-imweyo inopanganidza kuti: “Rudo renyu risikacinji rakakura maningi ku ese aya anomudainzai.” Hinga zvataona mu fundo yadarika, i rudo rakagondeka rinoita kuti Djehovha arumbwe ecida maningi aseenzi ake akatendeka. Rudo rakagondeka ndiro rinoita kuti Djehovha “arekerere no mwoyo wese” ashaishi ese anocinyuka. (Isa. 55:7, masoko e pasi) Kana zvecimushuphirai kutendera rurekerero ra Mwari dzibvunzisei kuit: ‘Ndinotenda here kuti Djehovha ndi munhu Anorekerera—uye kuti iyena akagadzirira kurekerera ese aya anocinyuka uye anopsvaka usisi wake? Hino inini andidikaniwo here kutenda kuti Djehovha akandirekerera pandakapsvaka rurekerero rake?’
11 Zvinonyaradza maningi kuziya kuti Djehovha anonyasa kuzwisisa kuti isusu tino musambo we kuita zviro zvakashata. (Pis. 139:1, 2) Izvi zvinonyasa kudjeka kana tikaongorora Pisarema imweni yakatarhwa na Dhavhidhi, Pisarema ii inotibetserawo kutenda rurekerero ra Djehovha.
MUSAKANGANWE ZVIYA ZVINOEDZURIRHWA NA DJEHOVHA
12-13. Maererano na Pisarema 103:14, Djehovha anoedzurirei katiri uye izvona zvinotikohomedzesa kuti tiitei?
12 Erengai Pisarema 103:14. Dhavhidhi unobhuya kuti Djehovha “anoedzurira kuti isusu tiri mataka.” Dhavhidhi wakapanganidza cimwe ce cikonzero cekuti Djehovha akagadzirira kurekerera aseenzi ake akacinyuka: Djehovha anoedzurira kuti tiri anhu asikazi kukwana uye tinoshaisha kakawanda. Kuti tinyase kuzwisisa izvona, ngatinyase kurangarira zviya zvakabhuiwa na Dhavhidhi.
13 Dhavhidhi wakabhuya kuti Djehovha “anonyasa kuziya mushobo watakaizwa.” Djehovha akaita Adhamu,“no mataka” uye nge ndaa yazvo, iyena anonyasa kuziya kuti kunyazi anhu akakwana ano paanogumira, ngo muezaniso, awona anodikana kurhya, kuwata uye kufema. (Gen. 2:7) Asi ngekuti Adhamu na Evha akaita citema, anhu akagara mataka nge mushobo umweni. Ngekuti tiri mubarirhwana wa Adhamu na Evha isusuwo tiri mataka, ngekuti takabarhwa tiri anhu asikazi kukwana tinogara no cido cekuda kuita zviro zvakashata. Uye Djehovha aandozii basi ngezve cido catinaco cekuda kuita zvakashata; Dhavhidhi wakabhuya kuti iyena “anoedzurira” kuti tiri mataka. Soko roci Hebheru rakaturikirhwa apa rinozwi kuedzurira, aribatanidzi basi kuedzurira ciro asiwo rinobatanidza kuita ciito cakanaka. Mucigwagwa masoko a Dhavhidhi anotifundisa kuti: Djehovha anozwisisa kuti nguwa dzimweni tinoita zvishaishi, uye patinoita zvishaishi tocinyuka no mwoyo wese, iyena anotizwira nyasha uye anotirekerera.—Pis. 78:38, 39.
14. (a) Dhavhidhi wakabhuyei ngezve panogumira rurekerero ra Djehovha? (Pisarema 103:12) (b) Tingafundei nge mushobo wakarekerera Djehovha Dhavhidhi? (Onai bhokisi rakazwi “Djehovha Anorekerera uye Anokanganwa.”)
14 Rurekerero ra Djehovha pano parinogumira here? (Erengai Pisarema 103:12.) Dhavhidhi unobhuya kuti Djehovha paanotirekerera, anokanda zvitema zvedu kure maningi katiri “hingana kure kakaita kumabvazuwa no kumadokera.” Kumabvazuwa no kumadokera, i matii akasiyana maningi kamare; awona aambosongani. Izvona zvinotifundisei ngezve rurekerero ra Djehovha? Bhuku rimweni rinobhuya kuti: “Kana citema cecibviswa ngo mushobo uwona, hino tingagara no rugondo rekuti munuhwi, zvipangidzo uye zviedzuriro zvakhona, zvinonga zvatopfudzwa zvacose.” Rangarirai zvinoteera: Munuhwi ungakwanisa kuita kuti munhu aedzurire ciro. Asi Djehovha paanorekerera, apana ciro cinosara kunyazi cidoko cingaita kuti iyena aedzurire citema cedu uye kuseenzesa icona katiri.—Ezek. 18:21, 22; Zvii. 3:19.
15. Cinyi catinodikana kuita, kana tecidzipasa ndaa ngezve zvishaishi zvatakaita kare?
15 Masoko a Dhavhidhi ari pana Pisarema 103 angatibetsera kudini kuti titende rurekerero ra Djehovha? Kana tecidzipasa ndaa, nge ndaa ye zvishaishi zve kare tingadzibvunzisa kuti: ‘Kodi ndiri kukanganwa zviya zvinoedzurirhwa na Djehovha—uye ndiri kuedzurira, zviya zvekuti Djehovha asanangura kukanganwa? Kana kuti ndiri kukanganwa kuti Djehovha anoedzurira kuti ndiri munhu usikazi kukwana, uye anorekerera mushaishi wacinyuka hingana inini here? Panguwa imweyo ndinogara ndeciedzurira ngezve zvishaishi zvekuti iyena andirekerera uye aazozviseenzesi kandiri here?’ Djehovha aarumbwi akaringira zvishaishi zvedu zvetakaita kare. Hino isusuwo atidikani kuita izvona. (Pis. 130:3) Kana tikatenda rurekerero ra Djehovha, tinokwanisa kudzirekerera isusu pacedu uye toenderera mberi.
16. Pasai muezaniso unopangidza kuti pano ngozi kugara tecidzipasa ndaa ngezve zvishaishi zvadarika. (Onaiwo mufanikiso.)
16 Rangarirai pa muezaniso unoteera. Kugara tecidzipasa ndaa nge ndaa ye zvishaishi zvatakaita kare, zvakaita hingana kutekenya karu teciringira nguwa dzese supeya inoita kuti tione zviri sure. Nguwa dzimweni zvakanaka kuringira pa supeya iyona ngekuti izvona zvingamubetserai kudzidziirira pa ngozi. Asi kuti mukwanise kutekenya ngo mushobo wakanaka, imwimwi munodikana kukanda ndangariro dzenyu mberi. Nge mushobo umwewo, nguwa dzimweni zvakanaka kuringira zvishaishi zvedu zvatakaita kare ngekuti tingakwanisa kufunda nazvo uye kubambisa rugondo redu rekutama kuzviphinda. Asi tikagara tecikanda ndangariro dzedu pa zviro izvona, kudzipasa ndaa katinoita kungatitorera mupfaro wedu uye kutipingaidza pa basa ratinoitira Djehovha. Hino zvinokosha maningi kurumbwa tecikanda ndangariro dzedu mberi, gwanza rinotiendesa ku upenyu usikaperi mu nyika ipsva yatakagondeswa na Mwari, mekuti “aticarangariri zviro zvakashata.”—Isa. 65:17; Zvie. 4:25.
Kuitawo hingana mutekenyi unodikana kukanda ndangariro dzake mberi haiwa sure, isusuwo tinodikana kukanda ndangariro dzedu pamakomborero e mune ramangwana haiwa pa zvishaishi zvedu zve kare (Onai ndima 16)
RUMBWAI MECIGONDESA MWOYO WENYU
17. Ngei tinodikana kurumbwa tecigondesa mwoyo wedu kuti Djehovha anotida uye anotirekerera?
17 Isusu tinodikana kurumbwa tecigondesa mwoyo wedu kuti Djehovha anotida uye anotirekerera. (1 Juau 3:19, masoko e pasi) Ngei? Ngekuti Sathani aazosii kutiitisa kuti tirangarire kuti atisisiri rudo ra Djehovha uye rurekerero rake. Azvinei no mushobo waacazviita, cinangwa cake ndicimwe basi—cokutiitisa kuti tisaseenzere Djehovha. Tingaetsera kuti Sathani unorumbwa ecipeta masimba ngekuti unoziya kuti wasarirhwa no nguwa doko. (Zvak. 12:12) Musasiye kuti Sathani awine!
18. Imwimwi munodikana kuitei kuti mugondese mwoyo wenyu ngezve rudo uye rurekerero ra Djehovha?
18 Kuti mubambise rugundo renyu kuna Djehovha teerai mazano atafunda pa fundo yakadarika. Kuti mugondese mwoyo wenyu ngezve rurekerero ra Djehovha, seenzesai zvataona mufundo ino. Nyasai kurangarira zvabhuiwa na Djehovha nge zvake kamare, uye nyasai kurangarira zvafemera Djehovha atari e Bhaibheri kuti abhuye ngezve rurekerero rake. Musakanganwe kuti Djehovha anonyasa kuziya kuti tiri anhu asikazi kukwana uye kuti iyena anotipangidzira usisi. Edzurirai kuti iyena paanotirekerera, anorekerera zvezvirokwazvo. Ngekudaro, imwimwi mucagara no rugondo rimwero rainga rina Dhavhidhi pa usisi wa Djehovha uye mucabhuya kuti: “Maita basa Djehovha nge ‘kurekerera cishaishi cangu uye citema cangu’!”—Pis. 32:5.
NGOMA 1 Mawara a Djehovha
a Onai fundo “Achegue-se a Deus—Jeová Descreve a si Mesmo”, mu Murindiri wa 1 ya Mayo, 2009 mu Cizungu.