Zina ra Djehovha—Rinoreyei Kamuri

1-2. Tinozviziya kudini kuti zina ra Djehovha rinokosha kuna Djesu?

ZINA RA DJEHOVHA rinokosha maningi kuna Djesu. Iyena ndiye akadziirira zina ra Djehovha kupinda munhu upi hake. Hingana zvataona mu fundo yadarika, Djesu ainga akatogadzirira kufa kuti apangidze kuti Djehovha i mucena uye kuti zvese zvinoizwa na Baba ake zvakakwana. (Mark 14:36; Aheb. 10:7-9) Uye mumasure me Kutonga ke Makore 1000, Djesu acadzikanda pasi pe utongi wa Baba ake ngekuti iyena anoda kuti Djehovha atambire rukudzo rese. (1 Ako. 15:26-28) Kukoshesa kunoita Djesu zina ra Baba ake, zvinopangidzawo rudo rakakura uye rubatano raanaro na Baba ake.

² Djesu akauya pa nyika kuti arekete mu zina ra Baba ake. (Juau 5:43; 12:13) Iyena akaziisa ateeri ake zina ra Baba ake. (Juau 17:6, 26) Uyewo Akaita zvishamiso uye akafundisa mu zina ra Baba ake. (Juau 10:25) Ecireketa ngezve afundi ake Djesu akakumbira kuna Djehovha kuti: “Baba, aonererei nge ndaa yo zina renyu.” (Juau 17:11) Zvinogara pamhene kuti kuna Djesu, zina ra Djehovha rinokosha maningi kudarika ciro cipi haco. Hino cimborangarirai kuti: Kodi munhu ungabhuya kudini kuti ndi Mukristu nepoo iyena asikazii uye asikaseenzesi zina ra Djehovha?

3. Ticaonei mu fundo ino?

³ Sezvo tiri Akristu ecokwadi, isusu tinoteedzera Djesu uye tinopangidza rudo uye rureremedzo ku zina ra Djehovha. (1 Ped. 2:21) Mu fundo ino, ticaona kuti ngei Djehovha akapasa zina rake ku aya anoparidzira “masoko akanaka?” (Mat. 24:14) Uyewo ticaona kuti tingapangidza kudini kuti zina ra Djehovha rinokosha maningi ku umwe na umwe wedu.

“ANHU E ZINA RAKE”

4. (a) Nguwa doko asati ahwirira kudenga, Djesu akabvunzei afundi ake? (b) Mibvunzo dzipi dzaticadaira zvino?

⁴ Nguwa doko asati ahwirira kudenga, Djesu akati ku afundi ake: “Mwiya mucena paucauya pamuri, mucatambira simba, uye mucagara apupuri angu mu Djerusarema, mu Djudhiya mwese no mu Samariya, uye dakara ku mbuto dziri kure dze nyika.” (Zvii. 1:8) Izvona zvaida kureya kuti afundi aidikana kuparidzira masoko akanaka ku mbuto yese, haiwa basi ku Israeri. No kuhamba ke nguwa, anhu e madzinza ese aizogara no mukana we kugara afundi a Djesu. (Mat. 28:19, 20) Asi imwimwi mazwisisa kuti Djesu abhuya kuti: “Mucagara apupuri angu?” Kodi afundi aizogara basi apupuri a Djesu here kana kuti awona aidikana kuziya zina ra Djehovha? Kapituro 15 ye bhuku ra Zviito rinotibetsera kugumira mhinduro.

5. Aphostori no akuru ku Djerusarema akaguma kudini pa danho rokuti zina ra Djehovha raidikana kuzikanwa? (Onaiwo mufanikiso.)

⁵ Mu gore ra 49 K.A., aphostori no akuru akaungana mu Djerusarema kuti aone ngezve anhu ainga asiripi Adjudha uye ainga asikazi kuita ucekeri kuti aidikana kuitei kuti agare Akristu. Pakupedzesera ke musangano uwona, Tiyago hama ye pakati ya Djesu wakati: “[Pedru] wanyasa kupanganidza kuti Mwari akatanga kudini kurangarira ngezve madzinza amweni kuti abvise pakati pawo anhu e zina rake.” Asi Tiyago waireketa ngezve zina rani? Ecireketa ngezve muphorofita Amosi, iyena wakaenderera mberi eciti: “Kuitira kuti anhu ainga asara apsvake Djehovha no mwoyo wese, pamwepo no anhu e madzinza ese, anhu anodainzwa no zina rangu, anodaro Djehovha.” (Zvii. 15:14-18) Afundi apsva aya, ainga asikazofundi basi ngezva Djehovha asiwo, ‘aizodainzwa nge zina rake.’ Izvona zvinoda kureya kuti iwona aizoiita kuti zina ra Djehovha rizikanwe nge anhu amweni uyewo aizozikanika nge zina irona.

6-7. (a) Ngei Djesu akauya pa nyika? (b) I nyaya ipi yakakura maningi yainga yakabatanidzwa?

⁶ Zina ra Djesu rinoreya kuti “Djehovha Muponesi.” Izvona zvino musoro ngokuti Djehovha akaseenzesa Djesu kuti aponese aya ano kutenda. Djesu akauya pa nyika kuti apase upenyu wake ku anhu. (Mat. 20:28) Nge kutisudzunura, Djesu akaita kuti anhu ese agare no mukana we kuponeswa uye kuti agare no upenyu usikaperi.—Juau 3:16.

⁷ Asi ngei anhu aidikana kusudzunurhwa? Nge ndaa ye zvakaitika mu munda we Edheni. Hingana zvataona mu fundo yadarika, kazado yekutanga Adhamu na Evha akapandukira Djehovha. Nge kudaro, iwona akaruza mukana we kurarama nokusikaperi. (Gen. 3:6, 24) Asi Djesu akauya pa nyika kuti aite ciro cinokosha maningi kudarika kuponesa anhu basi. Sathani wainga akapumha Djehovha pa zviro zvakashata maningi. (Gen. 3:4, 5) Ndiyo ndaa, kuponeswa ke anhu kainga kakabatana no nyaya yakakura maningi—kuceneswa ke zina ra Djehovha. Djesu ainga ari muimiriri wa Djehovha uye akaita kuda ka Baba ake nge mushobo wakakwana. Ndiyo ndaa, iyena ainga ari munhu akasisira kuti acenese zina ra Djehovha.

8. Ateeri ese akagondeka a Djesu anodikana kutendera cinyi?

⁸ Ese aida kugara ateeri a Djesu, Adjudha no asiripi Adjudha aidikana kuzwisisa kuti Djehovha Baba a Djesu ndiona ainga ari Manyuku e ruponeso rawo. (Juau 17:3) Kusiya izvona, kuita hingana Djesu, iwona aizoziikanwa ngo zina irona. Iwonawo, aidikana kuzwisisa kukosha ke kuceneswa ke zina irona. Kuponeswa kawo kaitsamira ipona. (Zvii. 2:21, 22) Hino, afundi ese akagondeka a Djesu aidikana kufunda ngezva Djehohva uye ngezva Djesu. Zvinoita kuti tizwisise kuti ngei Djesu akapedzesa munamato uri pana Juau 17 nge masoko ekuti: “Ndakaaziisa zina renyu uye ndicariziisa, kuti rudo ramakandida naro rigare maari uye inini ndigare mu rubatano nawo.”—Juau 17:26.

“IMWIMWI MURI APUPURI ANGU”

9. Tingapangidza kudini kuti zina ra Djehovha rinokosha maningi katiri?

⁹ Zvataona dakara zvino zvinopangidza pamhene kuti ateeri a Djesu anodikana kucenesa zina ra Djehovha. (Mat. 6:9, 10) Zina ra Djehovha rinodikana kugara ciro cinokosha mu upenyu wedu. Uye isusu tinodikana kupangidza izvona nge zviito mu upenyu wedu. Hino, tinodikana kuitei kuti ticenese zina ra Djehovha uye kupangidza kuti Sathani ndi munyepi?

10. Kutonga kupi kunobhuiwa pa makapituro 42-44 e bhuku ra Isaya? (Isaya 43:9; 44:7-9) (Onaiwo mufanikiso.)

¹⁰ Isaya 42-44 tafunda kuti mushobo upi watiri kubatanidzwa pakucenesa zina ra Djehovha. Mu makapituro awona, Djehovha ari kupika anhu ese kuti aungane kuita hingana ari pa mbuto yokutongwa mu tribhunari. Iyena ari kubvundza ese aya anodziti madzimwari kuti apangidze kuti ngee cokwadi. Djehovha anokumbirawo apupuri kuti apinde uye apangidze kuti madzimwari awo ariyo. Asi apana unozvikwanisa!—Erengai Isaya 43:9; 44:7-9.

11. Djehovha anobhuyei ku anhu ake pana Isaya 43:10-12?

¹¹ Erengai Isaya 43:10-12. Ecireketa no anhu ake, Djehovha anoti: “Imwimwi muri Apupuri angu, . . . inini ndini Mwari.” Pedzepo iyena anokumbira kuti adaire mubvunzo wokuti: “Kuno Mwari umweni kusiya inini?” (Isa. 44:8) Hino, makomborero akakura katiri kudaira mubvunzo uwona. Nge masoko edu uye zviito, tinopasa upupuri wekuti Djehovha ndiye ega Mwari we zvirokwazvo. Zina ra Djehovha rakakhwirira kudarika mazina amweni. Mushobo watinorarama unopangidza kuti tinoda Djehovha uye kuti takagondeka kaari, azvinei no kubambidzirhwa katingaizwa na Sathani. Nge mushobo uwona, tino mukana we kubetsera kucenesa zina ra Djehovha.

12. Uphorofita uri pana Isaya 40:3, 5 wakadzadzika kudini?

¹² Patinocenesa zina ra Djehovha tinonga teciteedzera Djesu Kristu. Pa uphorofita umweni, Isaya wakabuya kuti munhu “waizogadzirira Djehovha gwanza.” (Isa. 40:3) Izvona zvakadzadzika kudini? Juau Mubhabhatidzi wakagadzirira Djesu gwanza akauya muzina ra Djehovha uye akareketa muzina ra Djehovha. (Mat. 3:3; Mark. 1:2-4; Ruka 3:3-6) Isaya wakabhuyawo kuti: “Kukudzwa ka Djehovha kucapangidzwa.” (Isa. 40:5) Izvona zvakaitika kudini? Djesu paakauya pa nyika, iyena akaimirira Djehovha nge mushobo wakakwana kuita hingana kuti Djehovha kamare ainga atowiya pa nyika.—Juau 12:45.

13. Tingateedzera kudini Djesu?

¹³ Kuita hingana Djesu, isusu tiri apupuri anodziirira zina ra Djehovha. Isusu tinotora zina irona uye tinoreketa no anhu ngezve zviro zvakanaka zvaari kuita. Asi kuti tigare Apupuri akanaka, atidikani kusiya kureketa zvese zvakaizwa na Djesu kuti acenese zina ra Djehovha. (Zvii. 1:8) Djesu ainga ari Mupupuri wa Djehovha akapeta masimba kupinda munhu upi hake kuti adziirire zina ra Djehovha, uye isusu tinoteedzera muezaniso wake. (Zvak. 1:5) Asi cinyizve catinodikana kuita kuti tipangidze kuti zina ra Djehovha rinokosha maningi katiri?

TINGAPANGIDZA KUDINI KUTI ZINA RA DJEHOVHA RINOKOSHA MANINGI KATIRI

14. Munozwa kudini ngezve zina ra Djehovha? (Pisarema 105:3)

¹⁴ Isusu tinodada ngo zina ra Djehovha. (Erengai Pisarema 105:3.) Djehovha anopfara maningi patinopangidza mazwiro edu ekudada nge zina rake. (Djer. 9:23, 24; 1 Ako. 1:31; 2 Ako. 10:17) Katiri, “makomborero akakura maningi kureremedza zina ra Djehovha” uye kudziirira mbiri yake. Atidikani kupsveruka kureketa no adoni edu e kubasa, ekucikora, mavhizinyu uye no amweniwo kuti tiri Apupuri a Djehovha. Dhiyabhurosi unoda kuti isusu tiime kureketa ngezve zina ra Djehovha ku amweni. (Djer. 11:21; Zvak. 12:17) Izvirokwazvo kuti Sathani no ese aya anotsigira manyepo ake, anoda kuti anhu akanganwe zina ra Djehovha. (Djer. 23:26, 27) Asi nge ndaa ye rudo ratinaro ku zina ra Djehovha, isusu tinorumbwa tecimupasa rukudzo “zuwa rese.”—Pis. 5:11; 89:16.

15. Zvinyi zvinoda kureya kubhuya zina ra Djehovha?

¹⁵ Isusu tinorumbwa tecidainza zina ra Djehovha. (Joe. 2:32; Aro. 10:13, 14) Kudainza zina ra Djehovha kunobatanidza zvakawanda kupinda basi kuziya uye kuseenzesa zina ra Mwari. Isusu tinoziya mushobo wakaita Mwari, tinomugonda uye tinopsvaka rubetso no nhungamiriro dzake. (Pis. 20:7; 99:6; 116:4; 145:18) Tinobhuya ngezve zina rake uye mawara ake ku amweni teciabetsera kuita cinjo, kumupfadza uye kuponeswa.—Isa. 12:4; Zvii. 2:21, 38.

16. Tingapangidza kudini kuti Sathani munyepi?

¹⁶ Isusu takagadzirira kushuphika nge ndaa ye zina ra Djehovha. (Tig. 5:10, 11) Patinobatana no matambudziko tinorumbwa takagondeka kuna Djehovha tecipangidza kuti Sathani munyepi. Mu nguwa ya Djobo, Sathani wakabhuya ngezve aya anoseenzera Djehovha kuti: “Ganda rinotsiiwa no ganda. Munhu acapa zvese zvaanazvo kuti adziponese.” (Djobo 2:4) Sathani wakabhuya kuti munhu unoseenzera Djehovha basi mugariro we zviro pa unonga uri nani uye kuti paanobatana no matambudziko iyena unosiya Djehovha. Djobo wakapangidza kuti masoko aya ngee kunyepa uye isusuwo tino makomborero ekupangidza kuti azvinei no zvatinoizirhwa na Sathani isusu atizosii kuseenzera Djehovha. Tingagara no rugondo rese rokuti Djehovha acarumbwa eciticengeta uye acationerera nge ndaa ye zina rake.—Juau 17:11.

17. Maererano na 1 Pedru 2:12 mushobo upi umweni watingakudza nawo zina ra Djehovha?

¹⁷ Isusu tinoreremedza zina ra Djehovha. (Zvie. 30:9; Djer. 7:8-11) Sezvo tiri kuimirira Djehovha uye tinoziikanwa nge zina rake, zviito zvedu zvingakwanisa kupasa rukudzo zina rake kana kuti kuripsvipisa. (Erengai 1 Pedru 2:12.) Hino, isusu tinoda kuita zvese zvatinokwanisa kuti tikudze Djehovha nge masoko edu uye no zviito. Nge mushobo uwona, kunyazi tiri anhu asikazi kukwana tingakwanisa kupasa rukudzo zina ra Djehovha.

18. Mushobo upi umweni watingapangidza kuti zina ra Djehovha rinokosha maningi katiri? (Onaiwo masoko e pasi.)

¹⁸ Isusu tinonetseka maningi ngezve zina ra Djehovha kudarika zvinorangarirhwa no anhu nge zvedu. (Pis. 138:2) Kuita kudini? Patinoita zviro kuti tipfadze Djehovha, anhu akawanda aazvipfariri uye anoreketa zvakashata nge zvedu.a Onai zvakaitika na Djesu. Iyena ainga akagadzirira kushuphika uye kufa nge mushobo unopsverusa, hingana zvinoizwa munhu waita ndaa yakakura maningi kuti akudze zina ra Djehovha. Djesu aazi kunetseka kuti anhu aizorangarirei ngezvake. (Aheb. 12:2-4) Cinangwa cake cainga cekuita kuda ka Djehovha.—Mat. 26:39.

19. Imwimwi munozwa kudini nge ndaa ye zina ra Djehovha uye ngei?

¹⁹ Isusu tinodada maningi nge ndaa ye zina ra Djehovha uye i makomborero akakura maningi kudainzwa kuti Apupuri a Djehovha. Ndiyo ndaa, takagadzirira kubatana no kushorhwa uye kusareremedzwa no anhu amweni. Katiri, zina ra Djehovha rinokosha maningi kudarika zviya zvinorangarirhwa no anhu nge zvedu. Hino, azvinei no zvicaizwa na Sathani kuti atipingaidze, takagadzirira kurumbwa tecipasa rukudzo redu ku zina ra Djehovha. Tikaita kudaro, tinopangidza hingana Djesu kuti zina ra Djehovha rinokosha maningi katiri.