Zvatinofunda no Uphorofita Wakaizwa na Djakobo Paainga aa Dhuze no Kufa—Dii re 1

1-2. Djakobo wakaitei paainga aa dhuze no kufa, uye ngei? (Onaiwo mufanikiso we pa )

DJAKOBO paainga acembera, iyena wakabva ku Kanani ne mhuri yake kuti aende koogara ku Edjipitu. Ikona, iyena wakarumbwa eciseenzera Djehovha ke makore 17. (Gen. 47:28) Ii yakagara nguwa inopfadza maningi mu upenyu wake. Pane kuona basi mwana wake anodiwa Zuzee, iyena wakaonazve ana ake ese pamwepo. Paakaona kuti wainga aa dhuze kuti afe, Djakobo wakaunganidza ana ake ese kuti aabvunze masoko anokosha.—Gen. 49:28.

² Panguwa iyona, baba paainga oda kufa, iwona aiunganidza ese e mhuri yawo kuti aapase nhungamiriro. (Isa. 38:1) Ngo muezaniso, iwona pamweni aizoabvunza kuti ndiani waizogara musoro we mhuri mumasure me kufa kawo.

3. Maererano na Genesi 49:1, 2, ngei masoko akareketa Djakobo aikosha maningi?

³ Erengai Genesi 49:1, 2. Asi musangano uya wainga wakasiyana. Djakobo wainga ari muphorofita. Uye Djehovha akamufemera kuti abhuye ngezve zviro zvaizoitika mune ramagwana zvaizobata-bata maningi abarirhwana ake. Ndiyo ndaa, tingatobhuya kuti masoko aya e kupedzesera a Djakobo ku ana ake, ainga ari uphorofita wakaizwa panguwa yokuti iyena wainga oda kufa.

4. Djakobo wakaphorofita ngezvei, uye masoko ake anotifundisei? (Onai bhokisi rakazwi “Mhuri ya Djakobo.”)

⁴ Mu fundo ino, ticaona zviro zvakabhuya Djakobo ku ana ake arongomuna: Rubheni, Simiyoni, Revhi, uye Djudha. Mu fundo inoteera, ticaongorora zviro zvaakabvunza ana ake amweni. Hingana zvaticaona, Djakobo wakaphorofita haiwa basi ngezve ana ake, asiwo ngezve abarirhwana ake kuti awona aizogara dzinza rakakura re Israeri. Patinoerenga ngezve ngano ye dzinza iri, zvinogara pamhene kuti masoko a Djakobo aya akadzadzikadi kamare. Uye zvaakareketa zvinotifundisa mafundo anokosha angatibetsera kupfadza Baba edu e kudenga Djehovha.

RUBHENI

5. Pamweni Rubheni waietsera kutambirei kuna baba ake?

⁵ Ecibhuya na Rubheni, Djakobo wakati: “Iwewe ndiwe dangwe rangu.” (Gen. 49:3) Nge kugara mwana wekutanga, pamweni Rubheni waietsera kuti waizopaswa nhaka yakakura. Kusiya izvona, pamweni iyena wakarangarira kuti ndiyena waizogara musoro we mhuri mumasure mekufa ka Baba ake uye kuti no kuhamba ke nguwa, ubaba uwona waizopaswa mumbarirhwana wake.

6. Ngei Rubheni aazi kutambira zviya zvaaietsera hingana dangwe? (Genesi 49:3, 4)

⁶ Asi Rubheni aazi kutambira zviya zvaaietsera. (1 Mak. 5:1) Ngei? Ngekuti paa padarika nguwa mumasure mekufa ka Rakeri, Rubheni wakaita uhure na Bhira wekuti wainga ari museenzi wa Rakeri uye mukadzi umweni wa Djakobo. (Gen. 35:19, 22) Cinyi cakaita kuti Rubheni aite zviro zvakadaro? Iyena wainga ari mwana wa Reya hama ya Rakeri. Hino pamweni iyena wakadzipa Bhira kuitira kuti iyena asagare mwanakadzi waizodiwa maningi na Djakobo. Pamweni iyena wakarangarira kuti nge kuita kudaro, Djakobo waizonyanya kudisisa maningi mai ake Reya. Cikonzero cimweni ngecekuti Rubheni waida Bhira, uye iyena aazi kukwanisa kudzibata. Azvinei no zvikonzero zvakamuitisa kuti adaro, cishaishi icona acizi kupfadza baba ake uye Djehovha.—Erengai Genesi 49:3, 4.

7. Cinyi cakaitika kuna Rubheni ne mhuri yake? (Onai bhokisi rakazwi “Uphorofita Wakaizwa na Djakobo Paainga aa Dhuze no Kufa.”)

⁷ Djakobo wakati kuna Rubheni: “Iwewe auzogari mukuru.” Masoko awona akadzadzikadi kamare. Apana mbuto yo mu Bhaibheri yatinoerenga kuti dzinza ra Rubheni rakagara mambo, apristi kana kuti aphorofita. Asi Djakobo aazi kuphanica mwana wake. Nokuhamba ke nguwa, dzinza ra Rubheni rakagara rimwe re dzinza re Israeri. (Djs. 12:6) Rubheni wainga apangidza mawara akanaka pamugariro umweni uye zvinoita hingana kuti iyena aazi kuzomboitazve uhure.—Gen. 37:20-22; 42:37.

8. Tinofundei no zvakaitika na Rubheni?

⁸ Zvatingafunda. Tinodikana kupeta masimba kuti tigare no maonero ari pakati no pakati kuti tisaite uhure. Kana tikazwa cido cekuda kuita citema, tinodikana kutanga tarangarira kuti maitiro edu anozorhwadzisa Djehovha, mhuri yedu uye anhu amweni. Uyewo tinodikana kuedzurira kuti: “Zvinosimwa no munhu, ndizvona zvaanozokorora.” (Aga. 6:7) Nge dii rimweni, zviro zvakaitika na Rubheni zvinotiedzurira kuti Djehovha ano usisi. Izvirokwazvo kuti iyena aaiti kuti isusu tisagare no migumisiro ye zvishaishi zvedu, asi tikacinyuka uye topeta masimba kuti tiite zviro zvakanaka iyena anotirekerera uye anotikomborera.

SIMIYONI UYE REVHI

9. Ngei masoko akareketa Djakobo kuna Simiyoni na Revhi ainga ari masoko anorhwadza? (Genesi 49:5-7)

⁹ Erengai Genesi 49:5-7. Mumasure mazvo, Djakobo wakabhuya na Simiyoni uye Revhi. Iyena wakaseenzesa masoko anorhwadza kuti apangidze kuti wainga akanyangadzwa nawo. Nguwa imweni mwana wa Djakobo Dhinaa, wainga adziphwa no mwanarume umweni we ku Kanani unozwi Sikemu. Ana ese a Djakobo akanyangadzwa nge ndaa yazvo uye izvona zvinozwisisika. Asi Simiyoni uye Revhi aazi kukwanisa kuonerera shungu dzawo. Awona akacengedzera Sikemu uye anarume ake nge kubhuya kuti aizoita runyararo kana awona akaizwa ucekeri. Sikemu no anarume ake akazvitendera uye mumasure mazvo, paainga icirhwadziwa nge ndaa ye ucekeri waainga aita, Simiyoni uye Revhi ‘akabata masupada awo uye akaenda ku thaundi rawo rekuti rainga risina arindi uye akauraya anarume ese e ikona.’—Gen. 34:25-29.

10. Masoko akareketa Djakobo kuna Simiyoni uye Revhi akadzadzika nge mushombo upi? (Onai bhokisi rakazwi “Uphorofita Wakaizwa na Djakobo Paainga aa Dhuze no Kufa.”)

¹⁰ Djakobo wakanyangadzwa maningi no muitiro we cisimba we ana airi ake aya. Iyena wakaphorofita kuti Simiyoni uye Revhi aizobarariswa mu Israeri mwese. Uphorofita uwona wakadzadzika mumasure me makore anodarika 200 dzinza re Israeri parakapinda mu Nyika Yakapikirhwa. Dzinza ra Simiyoni rakatambira nhaka mu mbuto yakasiyana-siyana mukati me dzinza ra Djudha. (Djs. 19:1) Uye Revhi wakatambira mathaundi anokwana kuita 48 akaparadzana mu Israeri mwese.—Djs. 21:41.

11. Zviro zvipi zvakanaka zvakaizwa no dzinza ra Simiyoni uye ra Revhi?

¹¹ Abarirhwana a Simiyoni uye a Revhi aazi kuita zvishaishi zvimwezvo hingi zvakaizwa no anarume aya. Dzinza ra Revhi rakapangidza pamhene kuti rainga rakagondeka pa kunamata kakacena. Aisraeri akawanda paakabatanidzwa pakunamata ke n’mbe ye oro, Arevhi akagara kudii ra Mozesi uye akamubetsera pakutsakatisa ese aya aibatanidzwa pakunamathwa ke zvidhori. (Eki. 32:26-29) Kusiya izvona, Djehovha akasanangura anarume o dzinza ra Revhi kuti aite basa rinokosha maningi rekuseenza hingana apristi. (Eki. 40:12-15; Num. 3:11, 12) Hino zvakadini no dzinza ra Simiyoni? Anarume e dzinza iri, akaita maererano no kuda ka Djehovha uye akarhwisa no ushingi pamwepo no dzinza ro Adjudha paainga oopinda mu Nyika Yakapikirhwa.—Ato. 1:3, 17.

12. Tinofundei ngezva Simiyoni uye Revhi?

¹² Zvatingafunda Isusu tinodikana kuonerera shungu dzedu. Kana munhu akaita kuti imwimwi kana kuti munhu wamunoda atambudzike, zviri nyore kugara no shungu. (Pis. 4:4) Asi tinodikana kuedzurira kuti Djehovha aadi kuti tirekete uye tiite zviro no shungu. (Tig. 1:20) Kana tikabathwa zvisina unatsi mukati me ungano kana kuti kunza, tinodikana kuteerera zvokwadi zvisikacinji zve Bhaibheri. Ngokudaro, ticaita zviro tisikatungamirirhwi no shungu. (Aro. 12:17, 19; 1 Ped. 3:9) Kusiya izvona, pamweni abereki enyu aaiti zviya zvinopfadza Djehovha. Edzurirai kuti imwimwi amubambidzirhwi kuti muteerere muezaniso wawo. Musarangarire kuti amucakoshi uye kuti Djehovha aacamukomboreri. Zvezvirokwazvo Djehovha acakomborera kupeta masimba kamuri kuita kuti murumbwe meciita zviro zvakanaka.

DJUDHA

13. Ngei Djudha wakathya payakaguma nguwa yake ye kuzwa masoko a baba ake Djakobo?

¹³ Pedzepo, yakaguma nguwa ya Djudha. Mumasure mekuzwa zvese zvakabhuya baba akhona ku hama dzake, pamweni Djudha wakathya maningi ngokuti iyena wainga aitawo zvitema zvakakura. Iyena wakabetsera pakuba zviro zve anhu a Sikemu. (Gen. 34:27) Djudha pamwepo no hama dzake akatengesa Zuzee hingana muranda uye akanyepera Baba akhona ngezvazvo. (Gen. 37:31-33) Mumasure mazvo, iyena wakaita uhure no muroora wake Tamari, ecirangarira kuti wainga ari hure.—Gen. 38:15-18.

14. Zviro zvipi zvakanaka zvakaizwa ndi Djudha? (Genesi 49:8, 9)

¹⁴ Kunyazi no zvese izvi, Djehovha akafemera Djakobo kuti asimbe Djudha uye amugondese makomborero kaari uye ku mhuri yake. (Erengai Genesi 49:8, 9.) Djudha wainga apangidza kuti waikoshesa maningi mazwiro a baba ake. Iyena wakazwirawo usisi hama yake yekupedzesera Bhenjamini uye wakaedza kumubetsera.—Gen. 44:18, 30-34.

15. Dzinza ra Djudha rakakomborerhwa nge mushobo upi?

¹⁵ Djakobo wakabhuya kuti Djudha waizotonga pakati pe hama dzake. Izvirokwazvo kuti uphorofita uwona uu wakatora makore anokwana kuita 200 kuti utange kudzadzika, asi dzinza ra Djudha rakakomborerhwa. Aisraeri paakabuda ku Edjipitu uye paakapinda ku renje ecienda ku Nyika Yakapikirhwa, dzinza ra Djudha rainga riri mberi ke dzinza rese re Israeri. (Num. 10:14) Paapadarika nguwa, Djehovha akagadza dzinza ra Djudha kuti ritange kurhwisana no Akanani uye kupinda mu Nyika Yakapikirhwa. (Ato. 1:1, 2) Uye Dhavhidhi mumbarirhwana wa Djudha wakagara mambo wekutanga we madzimambo akawanda e dzinza irona. Asi kudzadzika ke uphorofita uwona, akuzi kuima ipona.

16. Uphorofita uri pana Genesi 49:10 wakadzadzika kudini? (Onai bhokisi rakazwi “Uphorofita Wakaizwa na Djakobo Paainga aa Dhuze no Kufa.”)

¹⁶ Djakobo wakabhuya kuti mubarirhwana wa Djudha waizogara mambo we anhu nokusikaperi. (Erengai Genesi 49:10 uye masoko e pasi.) Mambo iyena, wekuti wakadainzwa kuti Siro na Djakobo, ndi Djesu Kristu. Ngirozi imweni yakabhuya ngezva Djesu kuti: “Djehovha Mwari acamupasa cigaro ce umambo ca Dhavhidhi baba ake.” (Ruka 1:32, 33) Uye Djesu anodainzwa kuti “Mhondoro ye dzinza ra Djudha.”—Zvak. 5:5.

17. Tingateedzera kudini Djehovha pa mushobo watinoona amweni?

¹⁷ Zvatingafunda. Djudha wakaita zvishaishi zvakakura, asi Djehovha akagondesa kumukomborera. Kodi hama dza Djudha dzakagara dzecidzibvunzisa kuti Djehovha akaona zviro zvakanaka kaari? Atizvizii, asi catinoziya nge cekuti Djehovha akaona mawara akanaka kuna Djudha uye akamukomborera ngezvazvo. Tingateedzera kudini muezaniso wa Djehovha? Pamweni hama yecikristu yatambira ubaba unokosha maningi uye isusu tiri kukanda ndangariro dzedu pazviro zvakashata kaari, asi ciro cakanaka catingaita i kuedzurira kuti Djehovha anoona uye anokoshesa mawara akanaka e hama iyona. Djehovha anopsvaka zviya zvakanaka katiri. Tinoda kupeta masimba kuti tiitewo zvimwezvo.

18. Ngei tinodikana kugara no mwoyo unononoka kutsamwa?

¹⁸ Ciro cimweni catingafunda pazvakaitika na Djudha, i kukosha ke kupangidza mwoyo unononoka kutsamwa. Djehovha nguwa dzese anodzadzisa zvese zvaanopika, asi anguwapi yese yekuti iyena anozviita panguwa uye nge mushobo watinoetsera. Atongi ekutanga e dzinza re Israeri, ainga asiripi e dzinza ra Djudha, asi nhengo dze dzinza irona, ainga akagondeka uye akatsigira aya ainga asanangurhwa na Djehovha kuti atonge anhu. Hingana Mozesi wekuti wainga ari murevhi, Djoshuwa wekuti wainga ari we dzinza ra Efraimu, uye Mambo Sauro we dzinza ra Bhenjamini. Nyamasi uno isusuwo tinodikana kutsigira munhu upi hake unonga asanangurhwa na Djehovha kuti atungamirire pakati pedu.—Aheb. 6:12.

19. Uphorofita wakaizwa na Djakobo paainga oda kufa unotifundisei ngezva Djehovha?

¹⁹ Zvinyi zvatafunda no masoko okupedzesera a Djakobo ku ana ake ekutanga arongomuna? Zvagara pamhene kuti “maonero anoita Mwari andiopi maonero anoita munhu.” (1 Sam. 16:7) Djehovha ano mwoyo unononoka kutsamwa uye anorekerera. I zvirokwazvo kuti iyena aatenderi muitiro wakashata asi iyenawo aaetseri kuti anamati ake agare anhu akakwana. Iyena angatokomborera kunyazi aya e kuti akamboita zvishaishi zvakakura kare asi pari zvino akacinyuka no mwoyo wese uye aakuita zviro zvakanaka. Mu fundo inoteera, ticaongorora kuti Djakobo wakabhuyei ku ana ake amweni.