Khorovherai Mareferensiya Akada Kuezana

Mareferensiya akada kuezana ari mu Bhaibheri re Nyika Ipsva ye Matarhwa Macena anopangidza kuti matii e mu Bhaibheri anopindirana kudini no matii amweni. Awona, anopangidza mavhersikuro amweni no nyaya yatiri kuona uye anopanganidza zvimweni zvatinoda kuziya. Kuti mugumire referensiya yakada kuezana, cokutanga psvakai karetra kanouya mumasure me masoko manganani. Pedzepo, kudai meciseenzesa Bhaibheri rakadinhwa, psvakai karetra ikona pa kuruna inogara pakati kuti mugumire mavhersikuro anopindirana. Asi, kana meciseenzesa saiti jw.org kana kuti aprikativho yo JW Library^® bayai karetra ikona kuti mugumire mavhersikuro anopindirana.

Mareferensiya akada kutodzana angamubetserai kuti muone masoko amweni. Ngo muezaniso:

Ngano yakaezana: Referensiya inomupangidzai ngano imweyo asi mu bhuku rimweni. Ngo muezaniso, onai 2 Samueri 24:1 uye 1 Makoronika 21:1.

Sitasau: Referensiya inopangidza payakabva ndimeyo kana kuti Sokoro. Ngo muezaniso, onai Mateu 4:4 uye Dheuteronomiyo 8:3.

Uphorofita uye kudzadzika: Referensiya inopangidza uphorofita uye kudzadzika keyakaita. Ngo muezaniso, onai Mateu 21:5 uye Zakariya 9:9.