Mareferensiya e Urongwa we Musangano Basa Redu uye Kurarama
© 2025 Watch Tower Bible and Tract Society of Pennsylvania
SETEMBRO 1-7
UPFUMI UNOBVA MU SOKO RA MWARI ZVIERENGO 29
Rambai Zvitenderhwa uye Tsika Dzinopesana no Zviri mu Bhaibheri
wp16.06 paji. 6, bhokisi
Zvipangidzo zve Kudenga Kunogara Zvisikwa zve Kumwiya
Mamiriyonji e anhu ari muuranda we kutenda maninji uye mwiya yakashata. Awona anoseenzesa zvithumwa, usanga kana kuti tambo no zvimweniwo zvakasiyana-siyana kuti azvidziirire. Asi imwimwi amudikani henyu kuseenzesa izvona. Djehovha Mwari we zvirokwazvo ano simba rakakura kudarika ra Sathani. Kana imwimwi mukagonda Djehovha, iyena acamudziirirai. Bhaibheri rinotigondesa kuti: “Madziso a Djehovha ari kuringira pasi pese kuti apangidze simba rake ecibetsera aya ane mwoyo wakaperera kaari.”—2 Makoronika 16:9.
Kufunda ngezve zviro zvinopfadza Djehovha uye kuzviseenzesa, zvicaita kuti iyena amudziirire. Ngo muezaniso, mu nguwa ye aphostori, Akristu e muthaundi re ku Efeso aiita zvemasarapita, akaunganidza mabhuku awo uye akaapisa pamberi pe anhu ese. (Zviito 19:19, 20) Ngo mushobo umwewo, kuti Mwari “atidziirire” tinonodikana kupsveta ciro cipi haco cinocokuita no madhimoni.
w19.04 piji. 17 ndi. 13
Dziirirai Cokwadi Ngezve Rufu
13 Kana pano tsika yekuti amuna rugondo re kuti inopfadza Djehovha here kana kuti haiwa, itai munamato kaari mecikumbira ungwaru. (Erengai Tiyago 1:5.) Mumasure mazvo, kwarakwatisai mu mabhuku edu. Kana zveciita cedzai no akuru e ungano. Awona aazomubvunzii zvisananguro zvamunodikana kuita, asi acamuedzurirai mazano anokosha e Bhaibheri, hingana zvatamboona pakutanga. Kana mukaita izvona, imwimwi mucarowedza ‘simba renyu rokuzwisisa’ uye mucakwanisa “kusiyanisa zvakanaka no zvakashata.”—Aheb. 5:14.
w18.11 paji. 11 ndi. 12
“Ndicahamba Mu Cokwadi Cenyu”
12 Maitiro uye tsika dzakashata. Zvingaita kuti e mu mhuri medu uye adoni e kubasa kana kuti e kucikora, angaedza kuita kuti tibatane nawo pa mhemberero dzisingapfadzi Mwari. Cinyi cingatibetsera kuti tisaite izvona? Nguwa dzese tinodikana kuedzurira kuti ngei Djehovha asingapfariri mhemberero idzona. Tingapsvakisisa mu mabhuku anopanganidza matangiro akaita mhemberero idzona. Kana tingaedzurira zvikonzero zvatinopaswa no Bhaibheri kuti tisabatanidzwe pa mhemberero idzona, ticagara no cokwadi cekuti tiri kuhamba mu gwanza ‘rinopfadza Tenzi.’ (Aef. 5:10) Kana tikagonda Djehovha no Soko rake, “atizothyi munhu.”—Zvie. 29:25.
Upfumi Watinogumira mu Bhaibheri
it “Kunyepera Kusimba Munhu no Cinangwa co Kuda Kumupfadza” ndi. 1
Kunyepera Kusimba Munhu no Cinangwa co Kuda Kumupfadza
Muitiro wekunyepera kusimba munhu uye kumukudza nocinangwa cekuda kumupfadza, zvinokuwadza uya ari kusimbwa. Cinomuitisa kuti adaro ngecekuda kupfarirhwa no munhu uya waanonga ecisimba kana kuti apaswe zviro zvekunyama, oita kuti uya unosimbwa aone kuti unobambidzirhwa kuti aite izvona kana kumupasa rukudzo. Kakawanda kakhona, munhu anoita izvona, unonga eciteera umweni wake murau. (Zvie 29:5) Musambo we kunyepedzera kusimba munhu, aungwarupi unobva kudenga asi unobva panyika ino; iwona unooneka no makaro, rusananguro uye ucengedzi. (Tg 3:17) Kutama kugondeka, kunyepa, kusimba kana kukudza anhu, uye kukhorovhera zviro zve amweni, izvona azvipfadzi Mwari.—2Ak 1:12; Ag 1:10; Aef 4:25; Ako 3:9; Zva 21:8.
SETEMBRO 8-14
UPFUMI UNOBVA MU SOKO RA MWARI ZVIERENGO 30
“Musandipase Urombo kana Upfumi”
w18.01 paji. 24-25 mandi. 10-12
Mushobo we Rudo Usikaunzisi Mupfaro
10 Tese isusu tinoda mare. (Mup. 7:12) Asi yakawanda kudini? Zvinobvira here kuti munhu apfare zvezvirokwazvo no mare padoko yekudziriritira nayo zuwa no zuwa? Honde zvinobvira! (Erengai Muparidzi 5:12.) Aguri, museenzi wa Djehovha we nguwa yo kare wakanamata eciti: “Musandipase urombo kana kuti upfumi. Ndipasei basi zvekurhwa zvinondikwanira.” Zviri nyore kuzwisisa kuti ngei Aguri wainga asikadi kugara murombo kamare. Hingana zvaakazoreketa, iyena wainga asikadi kugara pa muedzo we kuba, ngokuti Mwari anozonda kuba. Asi ngei iyena akaita munamato ecikumbira kuti asaite mupfumi? Iyena wakapanganidza kuti: “Kuti ndisame kuguta, pedzepo ndomurambai ndeciti, ‘Djehovha ndiani?’” (Zvie. 30:8, 9) Zvinotsukwarisa kuti anganani anoguma pakugonda upfumi waanawo uye okanganwa Djehovha.
11 Munhu unodisisa maningi mare, aakwanisi kuita kuda ka Djehovha. Djesu akati: “Apana munhu angakwanisa kuseenzera madzitenzi mairi; ngokuti anozozonda umwe, oda umweni, kana kuti anozoreremedza umwe, oshora umweni. Amukwanisi kuseenzera Mwari pamwepo no upfumi.” Asati abhuya izvona, Djesu akapasa zano rokuti: “Rekerai kuunganidza upfumi wenyu pasi pano, ngokuti unorhyiwa no citema macira no furuju, uye pano mbavha dzinophwanya nyumba dzoba. Asi, unganidzai upfumi wenyu kudenga, kusina citema macira no furuju, uye kusina mbavha dzinophwanya nyumba dzeciba.”—Mat. 6:19, 20, 24.
12 Anhu akawanda akaona kuti anopfara maningi kana akatora upenyu usina zvakawanda. Kusiya izvona, upenyu usina zvakawanda unotibetsera kuti tiseenzere Djehovha zvakanaka, ngokuti tinosara no nguwa yakawanda yekuita zviro zvakawanda zvekumwiya. Onai muezaniso wa Jack unogara ku Estados Unidos, iyena wakatengesa nyumba no empreza yake kuti agare mu piyonero pamwepo no mukadzi wake. Iyena unoti: “Isusu taingara pa nyumba yakarungama maningi no ruwanze rakakura. Azvizi kugara nyore kuzvitengesa. Asi ke makore akawanda, inini ndaibva kubasa ndakanyangadzwa maningi nge ndaa ye zvinetso zvakawanda. Asi mukadzi wangu wekuti wainga ari mu piyonera we nguwa dzese, waipfara nguwa dzese. Iyena waibhuya kuti: ‘Inini ndina patrau akanaka kupinda ese!’ Zvino ininiwo ndaa mu piyonero uye tese tiri airi tino Makomborero ekuseenzera Djehovha.”
w87 5/15 paji. 30 ndi. 8
Ithya Djehovha uye Ucapfara
◆ 30:15, 16—Ngacipi cinangwa ce miezaniso idzi?
Iyona inopanganidza ngezve kusama kuguta ke munhu uno makaro. Zvikonye zvinosvuta ngazi zvino zvimbirhwa nge kusvuta ngazi, Kuita hingana anhu ano makaro ekuti anoda maningi mare uye cigaro. Nge mushobo umwewo, makuwa aazomboguti asi anorumbhwa akafununguka kuti atambire anhu akafa. Cibereko cisikabari cinocemera ana. (Genesi 30:1) Nyika yakaoma inomwa mvura inonaya mumasure mwazvo inoomazve. Uye muriro wakabatidzwa kuti upise zviro ungakwanisa kupisa zviro zviri ngece padhuze. Ndizvonawo zvinoizwa no anhu ano makaro. Asi aya anotungamirirhwa no ungwaru we kumusoro-soro aatenderi kupfuridzirhwa no maitiro akadaro e makaro.
w11 6/1 paji. 10 ndi. 4
Zvamungaita kuti Murarame Maererano no Mare Yamunayo
Cengetai mare yenyu pedzepo mozotenga. Zvingaita hingana kuti ngezvekare asi kucengeta mare uye muzotenga, kunoita kuti musazobatane no cinetso cokutama mare. Ngo kuita izvona, akawanda anonzvenga magaa uye marwadzo anokonzerhwa nge ndaa ye magaa, zvakaita hingana mutengo wakakura we juru wekuti unorumbwa wecikura dakara kutopinda mare yamakatora. Bhaibheri rinobhuya ngezve usunzi reciti “wakangwara” ngokuti “unounganidza zvekurhwa mumuparo” kuitira kuti uzorhye muneramangwana.—Zvierengo 6:6-8; 30:24, 25.
Garai Arendo a Djehovha Nokusikaperi!
18 Zvakanaka maningi kuti tiongorore maonero edu panocokuita no mare. Dzibvunzisei kuti: ‘Kodi ndinogara ndecirangarira ngezve mare uye zvandaizotenga kudai ndino mare yakawanda? Kana munhu akandifiyarisi mare, ndinonoka kumuhwirinzira ndecirangarira kuti munhuwo aasati aakuida mareyo here? Kodi ndinozwa hingana kuti ndinokosha maningi kupinda amweni ngekuti ndine mare yakawanda here? Ndino cinetso cekupangidzira amweni rupo here? Kodi inini ndinoona munhu umweni hingana anodisa zviro zve kunyama ngokuti uno mare here? Inini ndinoshamwaridzana maningi no anhu akapfuma uye ndokoshesa padoko arombo here?’ Tese isusu tino makomborero akakura e kupikwa kuti tigare arendo a Djehovha. Asi kana tecida kurumbwa tiri arendo a Djehovha, tinodikana kungwarira kuti tisade maningi mare. Kana tikada maningi Djehovha kupinda mare, iyena aazombotisii!—Erengai Ahebheru 13:5.
Upfumi Watinogumira mu Bhaibheri
w09 4/15 paji. 17 mandi. 11-13
Zviro Zvakasikwa Zvinopangidza Ungwaru wa Djehovha
11 Zvimbira zvisikwa zvidoko zvingatifundisa mafundo anokosha. (Erengai Zvierengo 30:26.) Izvona zvakada kutodzana no tsuro, asi nzee dzazvo dzakadodoka uye dzakaita denderedzwa, uyewo tsoka dzazvo dzakadodokawo. Zvinyama zvidoko izvi, zvinogara mu mbuto ino mapuwe. Kukwanisa kuona zvakanaka kazvinoita, kunozvibetsera maningi. Mu muparo uye mu mapako mazvinogara, munozvidziirira kuti zvisarhyiwe no zvinyama zvimweni. Zvimbira zvakasikwa kuti zvigare zvakawanda uye izvona zvinoita kuti zvizwe zvakacengeteka uyewo kuti zvidziirhwe mu nguwa ye cando.
12 Tinofundei no zvimbira? Cokutanga, onai kuti zvinyama izvi azvigari pa mbuto iri nyore kubathwa no zvinyama zvimweni. Izvona, zvinoseenzesa kunyasa kuona kazvinoita kuti zvione zvinyama zvinonga zvicida kuzvirhya zviciri kure uye izvona zvinogara padhuze no muparo kana kuti no mapako azvo kuti zvizokwanise kutizira imona. Isusuwo tinodikana kugara no madziso e kumwiya anonyasa kuona zvakanaka kuti tikwanise kuona ngozi dziri munyika ino ya Sathani. Muphostori Pedru wakabvunza Akristu kuti: “Garai makarinda uye ngwarirai! Muzondi wenyu Dhiyabhurosi unohamba-hamba hinga mhondoro inorudza yecipsvaka wekurhya.” (1 Ped. 5:8) Paainga ari pa nyika pano, Djesu akarumbwa akarinda uye akangwarira miedzo yese ya Sathani yaida kuedza kuperera kake kuna Mwari. (Mat. 4:1-11) Iyena akasiya muezaniso wakanaka maningi ku ateeri ake!
13 Mushobo we kurumbwa takarinda, ngewe kubetsereka no cidziiriro ce kumwiya catinopaswa na Djehovha. Atidikani kusiya kufunda Soko ra Mwari uye kupinda misangano ye Cikristu. (Ruka 4:4; Aheb. 10:24, 25) Kusiya izvona, kuita hingana zvimbira zvakasikwa kuti zvigare zvakawanda, tinodikanawo kugara tiri padhuze no hama dzedu dze Cikristu, kuitira kuti “tibambisane” nadzo. (Aro. 1:12) Kana tikakhorovhera cidziiriro catinopaswa na Djehovha, tinopangidza kuti tinotenderana no masoko akatarhwa no mu pisarema Dhavhidhi okuti: “Djehovha ndiye buwe rangu no mbuto yakacengeteka uye ndiye anondinunura. Mwari wangu ndiye buwe rangu, kandinotizira.”—Pis. 18:2.
SETEMBRO 15-21
UPFUMI UNOBVA MU SOKO RA MWARI ZVIERENGO 31
Tinofundei no Mazano Anopasa Mai Ano Rudo ku Mwana Wawo
w11 2/1 paji. 19 mandi. 7-8
Fundisai Ana Enyu kuti Adzibate
Fundisai cokwadi cese ngezve pamaponde. Kuangwadza kunokosha. (1 Akorinti 6:18; Tiyago 1:14, 15) Ngokudaro, Bhaibheri rinobhuya kuti, kuita zvepamaponde i cipo ca Mwari haiwa murau wa Sathani. (Zvierengo 5:18, 19; Ngoma ya Soromoni 1:2) Kubhuya basi no ana enyu ngezve ngozi yekuita zvepamaponde kungaita kuti ana enyu aone nyayeyo ngo moshobo wakashata usingapindirani no Bhaibheri. Mudjaha umweni weku França unozwi Corrina unobhuya kuti: “Abereki angu ainyanya kureketa maningi zvinocokuita no uhure, izvona zvakaita kuti ndithye kuita zve pamaponde.”
Garai no cokwadi cekuti mwana wenyu unoziya cokwdi cese ngezve pamaponde. Mai amweni anozwi Nadia anogara ku Mexico anobhuya kuti “Ciro candaigara ndeciedza kubvunza ana angu, ngecekuti kuita zve pamaponde kakanaka uye kuti Djehovha akapasa anhu kuti adakadzwe ndizvo. Asi zvinodikana kuizwa no aya akacata basi. Kuita zve pamaponde kungatiunzira mupfaro kana kuti matambudziko zvecienderana no mushobo waticazviseenzesa.”
ijwhf fundo 4 mandi. 11-13
Fundisai Ana Enyu Zvinorekethwa no Bhaibheri Ngezve Doro
Tangai ndimwi kureketa ngezve nyaya iyona. Baba amweni anogara ku Grã-Bretanha anozwi Mark akati: “Nyaya inocokuita ngezve doro ingashuphira maningi ana adoko. Ndakabvunzisa mwana wangu une makore 8 kuti zvainga zvakanaka here kumwa doro kana kuti haiwa. Takareketa ngezve nyaya iyona patainga tecicedza uye izvona azvizi kumushuphira kuti arekete akasudzunuka.”
Kana imwimwi mukareketa ngezve nyaya ye doro pamugariro yakasiyana-siyana, zvicaita nyore kuti zvigare mundangariro me mwana wenyu. Azvinei no thunga raanaro, kureketa naye ngezve nyaya inocokuita ne doro kucamubetsera kuti adzidziirire pangozi yemumakwanza kana kuti yekuita zvepamaponde.
Garai muezaniso wakanaka. Ana adoko akaita hingana ciponja, awona anoona zviro zviri padhuze nawo. Apsvakisisi anobhuya kuti ana anoteedzera zvinoizwa no abereki awo. Izvona zvinoda kureya kuti kana imwimwi mukamwa doro mecida kupedza stresi, ndizvona zvicaizwawo no mwana wenyu. Ngokudaro, garai muezaniso wakanaka. Kana mecimwa doro zviitei no mushobo uri pakati no pakati.
g17.6 paji. 9 ndi. 5
Fundisai Mwana Wenyu kuti Agare Anodzidodosa
Kohomedzesai mwana wenyu kuti agare no rupo. Pangidzai mwana wenyu kuti: “Kupasa kuno mupfaro kudarika kutambira.” (Zviito 20:35) Mungazviita kudini? Mwese muri airi, tarai mundandanda we anhu anoda kubetserhwa. Anhu amweni amunoziya pamweni angada rubetso re kuenda kootengerhwa zviro, kugadzirirhwa zviro zvinonga zvagudjuka kana kuti zvimweniwo. Pamunonga mecienda koobetsera anhu, toraiwo mwana wenyu. Siyai mwana wenyu kuti aone mupfaro wenyu wekubetsera aya anoda rubetso. Ngokudaro, imwimwi mucabetsera mwana wenyu kugara anodzidodosa —nge muezaniso wenyu.—Onai zvinorekethya no Bhaibheri pana: Ruka 6:38.
Upfumi Watinogumira mu Bhaibheri
w92 11/1 paji. 11 mandi. 7-8
Fundiso ye mu Nguwa ye Bhaibheri
7 Mu Israeri, ana aifundiswa na baba kana kuti na mai kubvira aciri adoko. (Dheuteronomiyo 11:18, 19; Zvierengo 1:8; 31:26) Mu Dhisiyonario re Bhaibheri muci francês, muzii umweni we Bhaibheri unozwi E. Mangenot wakatara kuti: “Mumasure mekuti mwana waakukwanisa kureketa, iyena waifundira masoko manganani e Mutemo. Maiwo aiphinda-phinda tsamba; mumasure mekuti waakuiziya aimupasa tsambeyo. Nekuhamba ke nguwa, aikanda mu nyara dzake tsamba ye vhersikuro yakhona. Ngekudaro, aikwanisa kuziya matarhwa uye paaizokura aizorumbhwa ecitambira fundiso ye zve magereja ngekuerenga Mutemo wa Tenzi uye kunyasa kurangarira ngezvayo.”
8 Izvona zvinoda kureya kuti umwe we mushobo waaiseenzesa pakufundisa wainga uri we kufundira kubata ne musoro. Zviro zvaaifundira zvinocokuita no Mitemo ya Djehovha uye zvipikirhwa zvaakapasa anhu ake zvaidikana kugara mu mwoyo mawo. (Dheuteronomiyo 6:6, 7) Aidikana kunyasa kurangarira ngezvazvo. (Pisarema 77:11, 12) Aiseenzesa mishobo yakawanda ye kubetsera ndangariro ku madjaha uye anhu akuru kuti abate ne musoro. Izvona zvinobatanidza mabhii ekufundira kuerenga, ekuti mavhersikuro e mupisarema anotanga no mabhii akasiyana, nge mushobo we mabhii ekufundira kuerenga (kuita hingana zvinorekethwa pana Zvierengo 31:10-31); kuphindwa ke masoko (masoko anotanga no mabhii amwewo kana kuti no mushobo umwewo); uye kuseenzeswa ke ma numero ano seenzeswa mu hafu ye tsamba ya Zvierengo kapituro 30. Zvinopfadza kuziya kuti azii anganani anoona kuti karendariyo ya Gezer muezaniso mukuru we mu nguwa ye kare yecihebheru, yainga iri mushobo wakanaka we kufundira kuzvikora.
SETEMBRO 22-28
UPFUMI UNOBVA MU SOKO RA MWARI MUPARIDZI 1-2
Rumbwai Mecirowedza Amweni
w17.01 mapaji. 27-28 mandi. 3-4
“Betserai Madjaha kuti Agare no Ubaba Wakakura”
3 Akawanda edu anoda mabasa aanoita musangano ra Djehovha uye anoda kurumbwa eciriita ke upenyu wawo wese. Asi zvinotsukwarisa kuti anhu paanocembera aazokwanisi kuita zviya zvaiita kare aciri madjaha. (Muparidzi. 1:4) Izvi zvinoita kuti zvishuphire akristu akawanda e mu nguwa ino ngekuti sangano riri kubatana no cinjo dzakawanda. Ngemushobo urikukura sangano ra Djehovha tinodikana kucinja mushobo wekuita zviro zvimweni zvinobatanidza matekinorojiya mapsva. Ku hama dziya dza cembera zvinoashuphira kuhambirana no cinjo idzi. (Ruka 5:39) Kunyazi aya aciri kukwanisa kuhambirana no cinjo idzi aacina simba raainga anaro kare. (Zvie. 20:29) Ngo kudaro, hama dziya dzacembera dzinorowedza madjaha kuti agare no ubaba wakakura, izvona zvicaabetsera uye zvicabetserawo ungano.—Erengai Pisarema 71:18.
4 Ku aya ano ubaba wakakura mu sangano pamweni angaona kuti zvinoshupha kupasa ubaba wawo ku madjaha. Ngei? Amweni aadi kusiya basa raanopfarira maningi uye amweni anothya kuti madjaha angazosama kutungamirira zvakanaka mabasa. Asi amweni anoona kuti madjaha aazokwanisi kuita mabasa nge mushobo wakanaka hingana awona. Uyewo kuno amweni anoona hingana kuti aana nguwa yekurowedza amweni. Asiwo, madjaha anodikana kugara no mwoyo unononoka kutsamwa paanonga ecietsera kupaswa mabasa ekuita.
Upfumi Watinogumira mu Bhaibheri
it “Muparidzi” ndi. 1
Muparidzi
Zina ro Cihebheru Qo·heʹleth (rinoreya “Muunganidzi”) Rinonyasa kuimirira basa ra mambo we umambo wakagadzwa na Mwari kuitira Aisraeri. (Mup. 1:1, 12) Uya aitungamirira ndiye ainga anoubaba wekuita kuti anhu akadzipira arumbhwe akatendeka kuna Mwari wawo. (1 Mad. 8:1-5, 41-43, 66) Nge ndaa yazvo, caizopangidza kuti Mambo wakashata kana kuti wakanaka ngecekuti waizotungamirira here kana kuti haiwa anhu a Mwari kuti anamate Djehovha. (2 Mak. 16:1-4; 18:1-6) Soromoni wakaita zvakawanda kuti aunganidze Aisraeri no amweni uye no aya aigara mu Israeri ke nguwa doko kuti aungane mu Tempro. Mu bhuku iri, Iyena wakapsvaka kuunganidza anhu a Mwari kuti aaendese kure no mabasa asina basa uye asikabetseri e munyika ino uye kuita kuti aite mabasa a Mwari wawo, uya waakadzipira kaari. Zina rinoseenzeswa mu Mabhaibheri edu mu ciputukezi rakaduswa pa turikiro re soko rekuti Qo·heʹleth rakabviswa mu Septuaginta Grega, rokuti, Ek·kle·si·a·stesʹ (Muparidzi), Rinoreya “nhengo ye ungano.”
SETEMBRO 29–OTUBRO 5
UPFUMI UNOBVA MU SOKO RA MWARI MUPARIDZI 3-4
Itai kuti Mucato Wenyu Unyase Kubamba
ijwhf fundo 10 mandi. 2-8
Mungaseenzesa Kudini Terefoni Mu mucato Wenyu
● Patinokwanisa kuseenzesa ngomushobo wakanaka terefoni dzedu, izvona zvingakwanisa kubambisa mucato wedu. Ngo muezaniso, makazado manganani anotumirana mamesaji pakuswera ke zuwa. Ngekudaro, awona anokwanisa kucedza ese kunyazi ari kure ne kure.
“Patinotumira mamesaji kumudoni wedu tecibhuya kuti: ‘Ndinokuda’ kana kuti ‘ndinocisuwo’ rudo redu rinotunhudzirika.”—Jonathan.
● Kana tikaseenzesa terefoni dzedu nge mushobo wakashata, izvona zvingakwanisa kurembesa mucato wedu. Nge muezaniso, anhu akawanda anotora nguwa yakawanda eciseenzesa terefoni. Nge ndaa yazvo, mwamuna kana kuti mukadzi aacaoni nguwa yekucedza no mudoni wake.
“Ndinorangarira kuti pamweni paya mwamuna wangu unokonerhwa kureketa na inini ngekuti ndinopedza nguwa yakawanda ndeciseenzesa terefoni.”—Julissa.
● Anhu anganani anobhuya kuti anokwanisa kucedza no mwamuna wawo kana kuti mukadzi wawo zvakanaka kunyazi umwe wawo paanonga eciseenzesa terefoni kana kuti thabreti. Nge muezaniso anhu akawanda anorangarira kuti kuseenzesa zviro zvakawanda pa nguwa imweyo, zvakanaka maningi, asi andizvopi. Maererano no zvakarekethwa no mu ongorori umweni unozwi Mark, iyena wakati: “Kuzvicengedza kurangarira kuti zvinoita kuita zviro zvakawanda panguwa imweyo. Iyena unobhuyazve kuti: Patinoedza kuita zviro panguwa imweyo, izvona zvicatishuphira kuita mabasa awona.”
“Zvakanaka maningi kucedza no mwamuna wangu, asi haiwa paanonga eciita zviro zvimweni pa nguwa imweyo. Paanonga eciseenzesa terefoni pa nguwa yandinonga ndecicedza naye, zvinoita hingana unonga ecindibvunza kuti ndinoda hangu kugara ndega ndeciseenzesa terefoni.”—Sarah.
Fundo rinokosha: Mushobo watinoseenzesa terefoni dzedu ungakwanisa kubambisa kana kuti kukuwadza mucato wedu.
w23.05 mapaji. 23-24 mandi. 12-14
“Murazvi wa Djah” Ngaurumbwe Wakabaka
12 Makazado angateedzera kudini Akira na Prisira? Rangarirai ngezve mabasa akawanda amunawo ekuita. Zvinoita here kuti muite mabasa awona muri pamwepo hinga mwamuna no mukadzi? Imwimwi munoronga here kubuda pamwepo mu basa re kuparidzira? Akira na Prisira aiitawo mabasa ari pamwepo. Pamweni imwimwi amuseenzi pa basa rimwero, asi zvinoita here kuita mabasa manganani muri pamwepo akadai hingana kupukuta uye kucenesa pa nyumba? (Mup. 4:9) Kana umwe akabetsera mudoni wake pakuita mabasa, imwimwi munozwa kuti zvezvirokwazvo muri cikwata uye munoona mikana yakawanda yekucedza. Robert na Linda aano makore 50 aacata. Robert unoti: “Isusu atina nguwa yekuti tiite zviro tiri pamwepo uye timbotambe. Asi pandinonga ndecisuka maparato, mukadzi wangu unouya koondibetsera uye pandinonga ndeciita mabasa ku jardim, iyena unouyawo koondibetsera, uye inini ndinopfara maningi. Kuita zviro tiri pamwepo kunoita kuti tigare takanyasa kubatana. Uye rudo redu rinorumbwa recikura.”
13 Edzurirai kuti kugara muri pamwepo, azvirei kuti makabatana. Mwanakadzi umweni unogara ku Brasil unoti: “Nyamasi uno kuno zviro zvakawanda zvinotiwaraidza, uye zviri nyore maningi kuwira pa murau wekuti tiri kupedza nguwa tiri tese ngekuti tiri kugara pa nyumba imweyo. Inini ndakafundira kuti kugara tiri tese idii rimwe basi re zviro zvandinodikana kuita, dii rimweni ikupedza nguwa no mwamuna wangu ndecinyasa kumupurutana uye ndecipsvaka kuziya zvaanoda.” Onai zvinoizwa na Bruno no mukadzi wake Tays kuti apedze nguwa ecicedza uye ecipurutana umwe na umwe wawo. Iyena unoti: “Patinoona mukana wekugara tiri tese, isusu tinosiya terefoni dzedu kumuceto uye tonyasa kukhorovhera mukana watinawo we kugara tiri pamwepo.”
14 Asi zvakadini kana imwimwi musingapfariri kupedza nguwa muri mwese? Pamweni pamunonga muri mwese, zvinoita nyore kukasika kunyangadzirhwana nge kuti amupfariri zviro zvimwezvo. Hino zvinyi zvamungaita? Rangariraizve ngezve muezaniso we muriro. Muriro aunyasi kubaka ciriporipoco. Zvinodikana kurumbwa mecikhwindidzira murirowo ngekukanda zvihuni zvakati kurei padoko no padoko. Meciteedzera muezaniso uu, zvakadini kutanga ngekupedza nguwa doko muri mwese mazuwa ese? Edzai kuita zviro zvekuti mwese munozvipfarira, uye musaite zviro zvinoita kuti muzopedzesere maakureketedzana. (Tig. 3:18) Mecitanga padoko no padoko, imwimwi mungabatidzazve rudo renyu.
“Murazvi wa Djah” Ngaurumbwe Wakabaka
3 Kuti “murazvi wa Djah” urumbwe wakabaka, mwamuna no mukadzi anodikana kupeta masimba kuti agare no ushamwari wakabamba na Djehovha. Ngei kuita izvona zvakanakira kazadoyo? Kana mwamuna no mukadzi ecikoshesa ushamwari wawo na Djehovha, awona anoseenzesa mazano ake uye izvona zvinoabetsera kuti anzvenge uye arhwisane no zvinetso zvaizoita kuti rudo rawo ritonhore. (Erengai Muparidzi 4:12.) Munhu wakakura pakunamata unopeta masimba kuti ateedzere mawara a Djehovha akadai hingana unaki, mwoyo unononoka kutsamwa uye kurekerera. (Aef. 4:32–5:1) Kana kazado ikapangidza mawara aya, rudo riri pakati pawo ricakura. Hanzvadzi imweni inozwi Lena yakacata ke makore anodarika 25 inoti: “Zviri nyore kuda uye kureremedza munhu wakakura pakunamata.”
Upfumi Watinogumira mu Bhaibheri
it “Rudo” ndi. 7
Rudo
“Nguwa ye Kupangidza Rudo.” Rudo aridikani kupangidzwa ku aya asikadi Djehovha kana kuti aya anoita zviro zvakashata. Rudo rinopangidzwa ku anhu ase asi aridikani kupangidzirhwa kana akatanga kuzonda Mwari. Nguwa iyona kupangidza rudo kunopera. Djehovha na Djesu anoda unatsi uye anozonda zviya zvisina unatsi. (Ps 45:7; Ahe 1:9) Atidikani kupangidza rudo ku anhu aya anozonda Mwari. Ngokudaro, azvibetseri kupangidzira rudo ku anhu awona, ngokuti aya anozonda Mwari aasisiri rudo ra Mwari. (Ps 139:21, 22; Isa 26:10) Mwari anoazonda uye agadza nguwa kuti aatsakatise.—Ps 21:8, 9; Mp 3:1, 8.
OTUBRO 6-12
UPFUMI UNOBVA MU SOKO RA MWARI MUPARIDZI 5-6
Tingapangidza kudini Rureremedzo Rakakura kuna Mwari wedu Mukuru Djehovha
w08 8/15 mapaji. 15-16 mandi. 17-18
Kudzai Djehovha nge Kuita Zviro no Rureremedzo
17 Tinodikana kupangidza rureremedzo maka-maka pakunamata Djehovha. Pana Muparidzi 5:1 panoti: “Ngwarirai tsoka dzenyu, pese pamunoenda ku nyumba ya Mwari we cokwadi”. Mozesi na Djoshuwa akabvunzwa kuti aduse masandariya paya paaiguma pa mbuto yakacena. (Eki. 3:5; Djs. 5:15) Kuita izvona kainga kuri kupangidza rureremedzo rakakura. Apristi e Israeri aibambidzirhwa kupfeka mukamudura kuti “afukidze umitu wawo.” (Eki. 28:42, 43) Izvona zvaipangidza rureremedzo paaiseenza pa artari. Umwe na umwe we mhuri yo upristi waidikana kupangidza rureremedzo ra Mwari.
18 Kureremedza pakunamata kunobatanidza rukudzo no rureremedzo. Kuti tikudzwe tinodikana kuita zviro zvinoreremedza. Kureremedza ikona akudikani kugara ke kunyepedzera. Akudikani kuoneka no anhu basi asi na Mwari, zvecida kureya kuti zvinobva pa mwoyo. (1 Sam. 16:7; Zvie. 21:2) Nguwa dzese, tinodikana kuita zviro no rureremedzo pa maitiro edu, patinoshamwaridzana no amweni uye kunyazi mushobo watinodziona isusu pacedu. Ngokudaro, rureremedzo rinodikana kuonekwa pa mugariro wese uye pa zvese zvatinoita. Panocokuita no maitiro edu, mushobo watinoita zviro uye mushobo watinopfeka, unodikana kuenderana maererano no zvakabhuiwa no muphostori Pauro paakati: “Atimboiti zviro zvinokuhunyisa amweni, kuitira kuti basa redu re kuparidzira ritame kupaswa ndaa; asi mu mishobo yese tinopangidza kuti tiri aseenzi a Mwari.” (2 Ako. 6:3, 4) Isusu tinoita kuti “fundiso ye Muponesi wedu Mwari, ikudzwe.”—Tito 2:10.
w09 11/15 paji. 11 ndi. 21
Pfumisai Minamato Yenyu no Fundo ye Bhaibheri
21 Djesu aiita munamato no rureremedzo uye no kutenda kakakura. Ngo muezaniso, Djesu asati amutsa Razaro, iyena “akaringira kudenga uye akati: ‘Baba, ndinomutendai ngokuti mandizwa.’” (Juau 11:41, 42) Zvakadini no minamato yenyu, iyona inopangidza rureremedzo uye kutenda here? Ongororai rureremedzo rakapangidza Djesu pa munamato we kuezanisira uye mucaona kuti kuceneswa ke zina ra Djehovha, kuuya ke Umambo uye kuitika ke kuda ka Djehovha ndi zviro zvinokosha pa munamato uwona. (Mat. 6:9, 10) Rangarirai ngezve minamato yenyu kamare. Iyona inopangidza here kuti munokoshesa maningi Umambo wa Djehovha, kuita kuda kake uye kuceneswa ke zina Rake cena? Minamato yenyu inodikana kupangidza izvona.
w17.04 paji. 6 ndi. 12
“Dzadzisai Zvamakapikira”
12 Kubhabhatidzwa i danho rokutanga. Tinoda kuita zvatakapika, tecirarama maererano nekudzipira katakaita kuna Djehovha. Hino zvakanaka kudzibvunzisa kuti: ‘Kubvira pandaka bhabhatidzwa ushamwari wangu na Djehovha uri kurumbwa wecitunhudzirika here? Ndiciri kuseenzera Djehovha ne mwoyo wese here? (Ako. 3:23) Ndiciri kuita minamato mazuwa ese here? Ndiciri kuerenga Bhaibheri mazuwa ese here? Ndiciri kuita zviri zvese kuti ndisaruze musangano here? Ndinobuda mu basa re kuparidzira pese pazvinobvira here? Kana kuti ndirikuthurudza pa kuita mabasa ese aya?’ Kuti izvona zvisaitike nesu, tinodikana kuzwira zano ratakapaswa no muphostori Pedru rekuti: Tinodikana kutunhudzira kutenda, ruziyo, kushingirira uye kudzipira no mwoyo wese kuna Mwari.—Erengai 2 Pedru 1:5-8.
Upfumi Watinogumira mu Bhaibheri
Mibvunzo Inobva Ku Aerengi
Vhersikuro ii inoti: “Kana ukaona murombo ecidzvinyirirhwa pa zviro zvine unatsi usashamiswe. Ngekuti uya ari pamusoro pe amweni unotongwawo nge uri pamusoro pake.”—Mup. 5:8.
Mu kuona ke anhu, tsamba ii inopanganidza zvakanaka anarume ano masimba mu utongi. Asi tsamba iyona, ino cokwadi cinonyaradza nge zva Djehovha.
Muparidzi 5:8 inoreketa nge zve mutongi unodzvinyirira arombo uye aabati no unatsi. Mutongi uu unodikana kuona kuti pamweni uri kurindwa nge umweni uri pamusoro pake, kana kuti uno masimba akakura maningi kudarika ayena. Zvinotsukwarisa kuti, utongi we anhu, utongi wese unodyekerana uye anhu ndiwona anoshuphika.
Asi kunyazi zviro zvingaita hingana zvisina kariro, pano ciro cinotinyaradza. Edzurirai kuti Djehovha anoona ‘anhu aya ano masimba’ mu utongi we anhu. Tingatizira kuna Mwari uye tokhandira mitoro yedu kaari. (Pis. 55:22; Afi. 4:6, 7) Tinoziya kuti “madziso a Djehovha anoringisa pasi rese, kuti apangidze simba rake ku aya ano mwoyo wakaperera kaari.”—2 Mak. 16:9.
Mukugurisira, tsamba ya Muparidzi 5:8 inopanganidza mugariro kamare we anhu mu utongi —aripo ano masimba kutodarika anhu aya. Cinotonyanya kukosha mu vhersikuro ii, nge cekuti Djehovha ndiye ano masimba ese. Zvirokwazvo ndiye Cangamire Asikaezaniswi. Zvino ayena ari kutonga eciseenzesa Mwana wake Djesu Kristu, Mambo we Umambo. We Masimba Ese, anoona zvese, ano unatsi, uye Mwana wake ano unatsiwo.
OTUBRO 13-19
UPFUMI UNOBVA MU SOKO RA MWARI MUPARIDZI 7-8
“Endai Kaitika Rufu”
it “Kutsukwara” ndi. 9
Kutsukwara
Nguwa yo Kutsukwara. Muparidzi 3:1, 4 inobhuya kuti: “Pano nguwa yo kucema no nguwa yo kuseka; nguwa yo kutsukwara no nguwa yo kutamba.” Sezvo tese tinofa, zvinobhuiwa kuti anhu ano ungwaru anoenda “kaitika rufu,” pane kuenda ku mabiko. (Mp 7:2, 4; ezanisai na Zvie 14:13.) Ngokudaro, munhu uno ungwaro unokhorovhera mukana uwona kuti aanyaradze, pane kutama kuenda nge kuita zviro zve kunyama. Izvona zvinobetsera kurangarira mugariro wake we kufa uye kukanda mu mwoyo make maitiro akanaka kuno Musiki wake.
w19.06 paji. 23 ndi. 15
Betserai Amweni kuti Arhwisane no Kudzirhya Mwoyo
15 William, wakafirhwa no mukadzi wake makore manganani adarika unoti: “Inini ndinopfara maningi amweni paanobhuya zviro zvaaiita pamwepo no mukadzi wangu. Izvona zvinondipasa rugondo rokuti iyena waidiwa uye waireremedzwa. Izvona zvinondibetsera maningi. Inini ndinozwa kurerukirhwa ngekuti mukadzi wangu wainga wakanaka maningi kandiri uye waikosha maningi mu upenyu wangu.” Mufirhwakadzi umweni unozwi Bianca unoti: “Ciro cinondinyaradza ndi paya pekuti anhu anoita munamato na inini uye anondierengera tsamba imwe kana mbiri dze Bhaibheri. Inini ndinozwa zvakanaka paanobhuya ngezve mwamuna wangu uye paanondipurutana ndecibhuya nge zvake.”
w17.07 paji. 16 ndi. 16
“Cemai no Ano Cema”
16 Mushobo wakanaka we kunyaradza munhu unonga wafirhwa, ngewe kuita munamato pamwepo naye. Pamweni imwimwi mungazwa zvecishupha kuita munamato pa migariro iyona. Pamweni imwimwi mungacema uye izwi renyu rotama kubuda. Asi musakanganwe kuti: Munamato unoizwa wecibva pasi pe mwoyo teciitira uya unonga wafirhwa ungabetsera maningi. Dalene unoti: “Nguwa dzimweni, hanzvadzi dzimweni pa dzaiuya koozondinyaradza, inini ndaidzikumbira kuti dziite munamato. Kakawanda kakhona awona aicema asi aiita zviri zvese kuti akwanise kureketa uye aiita munamato waibva pasi pe mwoyo. Rudo, kundibata zvakanaka uye kutenda kakabamba kainga kuno hanzvadzi idzi kakandibetsera maningi.”
w17.07 paji. 16 mandi. 17-19
“Rumbwai Mecinyaradza Amweni”
17 Munhu umwe na umwe uno nguwa yake yo kudjairana no mugariro mupsva mumasure me kufirhwa. Anganani angatodzipira kuti abetsere uya unonga ecibatana no mugariro unoshupha. Kunyazi zvakadaro, awona acadikana kuhwirira kooita zviro zvawo. Bhaibheri rinoti pana Zvierengo 17:17: “Shamwari yezvirokwazvo ino rudo nguwa dzese, uye i hama inobetsera pa nguwa yematambudziko.” Azvinei no nguwa inotora munhu kuti akwanisane no kurhwadziwa ngo kufirhwa no munhu waanoda, tinodikana kugara takagadzirira kupasa rubetso rinodikanwa kuti tinyaradze mudoni wedu.—Erengai 1 Atesaronika 3:7.
18 Nguwa dzimweni, uya wafirhwa ungasuwa zviya zvaaita pa mazuwa anokosha. Pamweni ngoma, foto, Munuhwi uye zviya zvanoona, zvingaita kuti aedzurire zviya zvaaiita, uye izvona zvingaita kuti iyena atsukware maningi. Uyewo, zvingamushuphira kuti aende ku magungano kana kucirangaridzo, eciziya kuti mwamuna wake kana kuti mukadzi wake unonga asiripopi pa dii rake. Hama imweni yakafirhwa yakati: “Inini ndaizviziya kuti zvaizorhwadza maningi kupinda zuwa ratakawakana ndisina mukadzi wangu. Asi zuwa irona parakaguma, hama dzakagadzirira kacifesta uye dzakadainza shamwari dzangu dzo padhuze. Awona ainga asikadi kuti ndipinde zuwa irona ndiri ndega.”
19 Izvirokwazvo kuti uya wafirhwa aadikani kunyaradzwa basi pa mazuwa anokosha. Junia unobhuya kuti: “Zvinobetsera maningi kuziya kuti uno hama dzicakubetsera, kanyazi pasikabatanidzwi mazuwa anokosha. Kugara no shamwari yezvirokwazvo zvinobetsera pa mugariro upi hawo.” Izvorokwazvo kuti atingakwanisi kutsiya mbuto ye uya unonga wafa, kana kubvisa kurhwadziwa ke uya unonga wafirhwa. Asi tinodikana kuita zvese zvatinokwanisa kuti tinyaradze munhuwo. (1 Juau 3:18) Gaby wamborekethwa nge zvake, unoti: “Ndinotenda maningi Djehovha ngokukanda mu upenyu wangu akuru ano rudo, ekuti akagara ku dii rangu nguwa dzese. Ndakazwa hinga kuti nyara dza Djehovha dzakanditenderedza.”
Upfumi Watinogumira mu Bhaibheri
“Ngekudaro Anhu Ese Acaziya kuti Muri Afundi Angu”
18 Nguwa dzimweni, tinozwa tecida kucedza no hama yedu inonga yakatishaishira kuti tigadzirise nyaya yakhona. Asi zvakanaka kutanga tadzibvunzisa kuti: ‘Inini ndinonyasa kuziya zvese zvakaitika here?’ (Zvie. 18:13) ‘Kodi iyena wakaita izvona ngekuda kake here?’ (Mup. 7:20) ‘Kodi inini ndakamboita cishaishi hingana icona?’ (Mup. 7:21, 22) ‘Kana inini ndikacedza naye, nyaya yandiri kuda kuedza kugadzirisa ingabambirira here?’ (Erengai Zvierengo 26:20.) Kana tikatora nguwa kuti tirangarire ngezve mibvunzo idzi, tinoguma pakuziya kuti cinonyanya kukosha kupangidza rudo uye kusiya nyaya yakhona yakadaro.
OTUBRO 20-26
UPFUMI UNOBVA MU SOKO RA MWARI MUPARIDZI 9-10
Onai Matambudziko Amuri Kubatana Nawo nge Mushobo Wakanaka
w13 8/15 paji. 14 mandi. 20-21
“Musambotsamwire Djehovha”
20 Ziyai wekupasa ndaa. Ngei tecidikana kuita izvona? Ngekuti matambudziko amweni tisu tinoaitisa, ndiyo ndaa tinodikana kuzvitendera. (Aga. 6:7) Musaedze kupasa Djehovha ndaa ye matambudziko amuri kubatana nawo. Ngei izvona zvisikazi kunaka? Onai muezaniso unoteera: Karu yakagadzirhwa yecikwanisa kugogoma maningi. Ngatimboti mutekenyi we karu unoigogomesa maningi kudarika zvinotenderhwa no mutemo paanonga ecidarika pa mbuto yakaita khona uye oita tsawana. Tingabhuya kuti wakagadzira karuyo ndiyena uno ndaa here? Izvirokwazvo kuti haiwa! Nge mushobo umwewo, Djehovha akatisika tino rusudzunuko re kusanangura zviya zvatinoda. Asi akatipasa nhungamiriro dzekuti tingaita kudini zvisananguro zvakanaka no ungwaru. Nge kudaro, ngei tingapasa Musiki wedu ndaa nge zvishaishi zvedu?
21 Izvirokwazvo kuti matambudziko amweni atinobatana nawo atisupi tinoaitisa. Amweni anokonzerhwa no “nguwa uye zviitiko zvatisingakariri.” (Mup. 9:11) Kupinda izvona, atidikani kukanganwa kuti Sathani ndiena unonyanya kuitisa zviro zvakashata. (1 Juau 5:19; Zvak. 12:9) Iyena ndiena muzondi—haiwa Djehovha!—1 Ped. 5:8.
w19.09 paji. 5 ndi. 10
Anhu Anodzidodosa Anokosha kuna Djehovha
10 Kudzidodosa kunoita kuti tishingirire matambudziko atinobatana nawo muupenyu. Nguwa dzimweni, tingaona migariro imweni hingana isikazi kunaka. Soromoni Mambo ano ungwaru wakati: “Ndakaona aseenzi ecihamba no kavharo asi ana a mambo ecihamba no tsoka hingana aseenzi.” (Mup. 10:7) Nguwa dzimweni anhu ano uzii wakawanda wekuita zviro aasimbwi, asi aya asina uzii wakawanda ndiona anosimbwa maningi. Kunyazi zvakadaro, Soromoni wakaona kuti zvakanaka maningi kutenda upenyu watinawo totama kukanda ndagariro dzedu pa zviro zvatisina. (Mup. 6:9) Kana tikagara anhu anodzidodosa, zvicatiitira nyore kutenda upenyu hingana zvauri kamare—haiwa hingana mushobo watinorangarira kuti ndiwo waunodikana kugara.
w11 10/15 paji. 8 mandi. 1-2
Zvamunowaraidzwa Nazvo Zvinobetsera Here?
MU BHAIBHERI rese, tinoona masoko anopangidza kuti Djehovha anoda kuti tirarame uye tidakadzwe no upenyu. Ngo muezaniso, Pisarema 104:14, 15 inobhuuya kuti Djehova anotipasa “zvekurhya pa nyika, vhinyu inoita kuti mwoyo we munhu upfare, mafuta anoita kuti ku hope ke munhu kunyetukire uye no zvekurhya zvinoita kuti munhu agare no simba.” Zvezvirokwazvo, Djehovha anoita kuti zvirimwa zvikure, toona zvekurhya, mafuta no vhinyu zvinoita kuti tirarame. Vhinyu inoita kuti ‘mwoyo we munhu upfare.’ Hino, azvireyi kuti kana tikatama kuimwa atirarami, asi inoita kuti mupfaro wedu utunhudzire. (Mup. 9:7; 10:19) Honde, Djehovha anoda kuti tidakadzwe, mwoyo yedu idzare “no mupfaro.”—Zviito 14:16, 17.
2 Hino, atidikani hedu kunetseka kana tecigara no nguwa ye kunyasa kuringira “shiri dze kudenga” uye no “maruwa e mushango”, kana kumboitawo zviro zvimweni zvinoita kuti tizorodzwe uye tidakadzwe no upenyu. (Mat. 6:26, 28; Pis. 8:3, 4) Upenyu wakanaka i “cipo ca Mwari.” (Mup. 3:12, 13) Kuona nguwa ye kumbodziwaraidza hinga mukana we cipo icona, kunoita kuti tiseenzese upenyu wedu ngo mushobo unopfadza uya akatipasa cipo icona.
Upfumi Watinogumira mu Bhaibheri
it “Mapsveda” ndi. 2
Mapsveda, Kureya
Mapsveda angagumisira nokureya, zvoguma pa kukuwadza uya anonga ecireya. Izvona zvinogara pamhene pa masoko e ungwaru ari pana Muparidzi 10:12-14 anoti: “Benzi rinoparadzwa ngo ndaa ye masoko anobuda pa muromo paro. Masoko anotanga kubuda pamuromo paro ngee upenzi, uye masoko arinopedzesera kureketa ngee kupenga kunoparadza. Asi benzi rinorumbwa recireketa.”
Mapsveda nguwa dzimweni aakuwadzi (kunyazi zvingazoguma pa kureya munhu), asi kureya nguwa dzese kakashata, kunoita kuti tirhwadzise amweni uye paoneke kusama kupindirana. Tingakwanisa kutanga kureya amweni tisina cinangwa cakashata. Azvinei kuti cinangwa cedu ngacipi, uya unoreya amweni aapfadzi Mwari. ‘Kuita kuti hama dzitame kupindirana,’ i ciro cinozondwa na Mwari. (Zvie 6:16-19) Mu Cigrego soko rekuti “murei” kana kuti “mupumhi” rinozwi di·aʹbo·los. Soko iri rinoseenzeswawo mu Bhaibheri hinga zina ra Sathani, rekuti “Dhiyabhurosi,” murei mukuru wa Mwari. (Ju 8:44; Zva 12:9, 10; Ge 3:2-5) Izvi zvinopangidza kuti ndiyani wakatanga kureya amweni.
OTUBRO 27–NOVEMBRO 2
UPFUMI UNOBVA MU SOKO RA MWARI MUPARIDZI 11-12
Garai no Upenyu Unopfadza uye no Uthongo Wakanaka
g 3/15 paji. 13 mandi. 6-7
Zuwa uye Kupepererhwa no Mhepo—Zvinobetsera Here mu “Mwiri?”
Ciedza ce zuwa cinosimba re kuuraya mabhakiteriya. Phepha rinozwi Journal of Hospital Infection rinopanganidza kuti: “Zvikonye zvakawanda zvinotiitisa kuti tirhware, zvinobarariswa no mhepo. Asi izvona, azvikwanisi kushingirira ciedza co zuwa.”
Imwimwi mungabetsereka kudini no ciedza co zuwa? Zvakadini kumbogara kunza kuti mumbopondwe no zuwa uye kupepererhwa padoko no mhepo? Izvona zvicabetsera uthongo wenyu.
Koshesai Cipo ca Mwari ce Upenyu
6 Bhaibheri aibhukupi rino zvimitemo zvinobhuya ngezve uthongo wedu uye zvatinodikana kurhya, asi irona rinobhuya ngezve maonero a Djehovha ngezve nyaya iyona. Ngo muezaniso, Djehovha anotibvunza kuti tisaseenzese “zviro zvinokuwadza” uthongo wedu uye mwiri wedu. (Mup. 11:10) Bhaibheri rinotibvunza kuti atidikani kuita zviro zvimweni zvinokanda upenyu wedu pa ngozi, zvakaita hingana kurhya maningi, uye kumwisa doro. (Zvie. 23:20) Djehovha anoetsera ku munhu umwe na umwe kuti agare no maonero ari pakati no pakati pa zviro zvaacarhya uye zvaacamwa.—1 Ako. 6:12; 9:25.
7 Tingakwanisa kuita zvisananguro zvakanaka zvinopangidza kuti tinokoshesa upenyu, kana tikanyasa kuseenzesa ndangariro dzedu. (Pis. 119:99, 100; erengai Zvierengo 2:11.) Ngo muezaniso, ticanyasa kurangarira ngezve zviro zvaticada kurhya. Kana isusu tecipfarira zvekurhya zvimweni teciziya kuti azvipindirani no mwiri wedu, zviri nani kutama kuzvirhya. Isusu tinopangidzawo kuti tino uzii ngekunyasa kuwata nguwa inodiikanwa, ngekugara teciita maezersisiyo, nge kudzicenesa isusu pacedu, uye nge kugara no nyumba yakacena.
“Garai Anhu Anoita Zvinorekethwa no Soko”
2 Isusu hinga aseenzi a Djehovha, tiri anhu anopfara maningi. Ngei? Zvezvirokwazvo tino zvikonzero zvakawanda, asi cikonzero cimwe cinokosha maningi nge cekuti isusu tinoerenga Soko ra Mwari nguwa dzese, uye tinoita zviri zvese kuti tiseenzese zviya zvatinofunda.—Erengai Tiyago 1:22-25.
3 Pano makomborero akawanda nge “kugara anhu anoita zvinorekethwa no soko.” Pakutanga, isusu tinozviziya kuti izvona zvinokosha kuti tipfadze Djehovha. Kuziya izvona zvinoita kuti tipfare. (Mup. 12:13) Patinorarama maererano no zvinorekethwa no Soko rakafemerhwa ra Mwari, upenyu wedu mu mhuri unogara uri nani uye tinogara no ushamwari wakabamba no hama dzedu. Pamweni izvi zvakatomboitika mu upenyu wenyu kamare. Kusiya izvona, isusu tinonzvenga matambudziko akawanda anosongana no anhu asikaseenzeri Djehovha. Zvezvirokwazvo, isusu tinotenderanawo no masoko a Mambo Dhavhidhi, wekuti mumasure me kuemba ngezve mutemo, mipango uye kutonga ka Djehovha, iyena wakati: “Kuno mubairo wakakura nge kuzvicengeta.”—Pis. 19:7-11.
Upfumi Watinogumira mu Bhaibheri
it “Kufemerhwa” ndi. 6
Kufemerhwa
Zvipangidzo zvinopangidza kuti anarume akaseenzeswa na Mwari kuti atare Matarhwa, aizviita akasudzunuka haiwa hingana makina, unondoita basi zvaunonga warongerhwa, ngokuti mukusiyana no makina, awona ainga asikatari zviya basi zvaibvunzwa. Muphostori Juau wakapangidzwa na Mwari peciseenzeswa ngirozi uye iyona yaiseenzesa “zvipangidzo” hino Juau “wakapupurira soko rakabva kuna Mwari uye no upupuri waakapaswa na Djesu Kristu, honde, we zviro zvese zvaakaona.” (Zva 1:1, 2) Juau ‘wakagara mu zuwa ra Tenzi ngo kufemerhwa’ uye wakabvunzwa kuti: “Tara mu mupumburu zviro zvauri kuona.” (Zva 1:10, 11) Ngokudaro, zvinopangidza kuti Mwari akaona kuti zvainga zvakanaka kusiya kuti anhu aseenzese ndangariro dzawo, kuti asanangure masoko aaipfarira kuti atare ngezve zviya zvaaioneswa (Ahe 2:2), Kunyazi zvakadaro, iyena airumbwa eciaonerena uye eciapasa nhungamiriro, zveciita kuti zvaaitara zvirumbwe zvakagondeka uye zviri zvezvirokwazvo, uyewo zvecienderanawo no cinangwa ca Djehovha. (Zvie 30:5, 6) Zvaibatanidzwa pa kupeta masimba ke mutari umwe na umwe zvinonyasa kuoneka pana Muparidzi 12:9, 10, atari akanyasa kurangarira, kupsvakisisa uye kunyasa kuronga, kuitira kuti paoneke “masoko anopfadza uye kuti atare masoko akanaka ezvirokwazvo.”—Ezanisai na Ru 1:1-4.