BHIBHIRIOTEKA RE MU INTERNETI re Torre dhe Vhijiya
Torre dhe Vhijiya
BHIBHIRIOTEKA RE MU INTERNETI
Ciutee
  • BHAIBHERI
  • MABHUKU
  • MISANGANO
  • w25 Mhenza\Junyo mapaji. 14-19
  • Dzidodosei Kana Pano Zviro Zvamusikazii

Apana vhihiyo iripo pa mbuto ii

Tinourombo, ciripo cashaishika no vhidhiyo.

  • Dzidodosei Kana Pano Zviro Zvamusikazii
  • Murindiri We Kuziisa Umambo wa Djehovha (We Kufunda)—2025
  • Misoro midoko
  • Masoko Akaezana
  • ATIZVIZII KUTI MUGUMO UCAUYA RINI
  • ISUSU ATIZVIZII KUTI DJEHOVHA ACAZVIITA KUDINI
  • ISUSU ATIZII ZVICAITIKA MUNE RAMANGWANA
  • ATIKWANISI KUNYASA KUZWISISA KUTI DJEHOVHA ANOTIZIYA ZVAKADINI
  • Gumirai Mhinduro Dze Mibvunzo Idzi
    Urongwa we Gungano re Nharaunda no Muonereri we Nharaunda 2025-2026
  • Zvisananguro Zvinopangidza Rugondo kuna Djehovha
    Basa Redu uye Kurarama Kwedu ke CiKristu—Urongwa wo Musangano—2023
  • Edzurirai kuti Djeovha ndi “Mwari Mupenyu”
    Murindiri We Kuziisa Umambo wa Djehovha (We Kufunda)—2024
  • Gumirai Mhinduro dze Mibvunzo Idzi
    Gungano re Nharaunda ne Muimiriri we Bheteri 2025-2026
Ona Zvimweni
Murindiri We Kuziisa Umambo wa Djehovha (We Kufunda)—2025
w25 Mhenza\Junyo mapaji. 14-19

MUSORO WE KUFUNDA 26

NGOMA 123 Ngatizwire Djehovha ne Sangano Rake

Dzidodosei Kana Pano Zviro Zvamusikazii

“Atikwanisi kuzwisisa Wemasimba ese.”—DJOBO 37:23.

CINANGWA

Kufundira kubatana no zvinetso nge kukanda ndangariro dzedu pa zviro zvatinoziya uye kugonda Djehovha kunyazi tisingazii zviya zvicazoitika.

1. Djehovha akatipasa uzii wei uye ngei?

DJEHOVHA akatisika no uzii we kurangarira, kufundira zviro zvipsva uye kuzwisisa kuti tingazviseenzesa kudini mu upenyu wedu. Ngei iyena akatisika kudaro? Kuti “tikwanise kugumira uzii wa Mwari” uye timuseenzere no ndangariro dzedu dzese.—Zvie. 2:1-5; Aro. 12:1.

2. (a) Cinyi catinodikana kutendera? (Djobo 37:23, 24) (Onaiwo mufanikiso.) (b) Ngei izvona zvakanaka katiri?

2 Izvirokwazvo kuti Djehovha akatisika tino uzii we kufundira, asi cokwadi nge cekuti kuno zviro zvakawanda zvatisikazii. (Erengai Djobo 37:23, 24.) Rangarirai ngezve muezaniso wa Djobo. Djehovha akaita mibvunzo dzakawanda kaari, dzakasiya pamhene kuti Djobo wainga ano zviro zvakawanda zvaasikazii. Kucedzesana kaakaita, kakabetsera Djobo kuti anyase kudzidodosa uye kugadzirisa mushobo wake we kurangarira. (Djobo 42:3-6) Nge mushobo umwewo, zvakanaka katiri kugara no maonero ari pakati no pakati uye kutendera kuti azvesepi zvatinoziya. Ngekudaro, ticagonda kuti Djehovha nguwa dzese acatibvunza zviya zvatinodikana kuziya, kuti tiite zvisananguro zvakanaka.—Zvie. 2:6.

Ciedza ciri mumakuta cakadjeka ku mberi ka Djobo Djehovha paanonga ecibhuya naye. Eriu uye shamwari nhatu dzekunyepa dzeciona zviri kuitika nge ce padhuze.

Kutendera kuti atizii zvese zvakanaka maningi katiri, hingana zvakaitika na Djobo (Onai ndima 2)


3. Ticaonei mu fundo ino?

3 Mu fundo ino, ticaona zviro zvinganani zvatisikazii uye nge kutama kuziya, izvona zvicaita kuti pamweni tibatane no zvinetso. Ticaonawo kuti ngei zvakanaka kutama kuziya zviro zvinganani. Kufunda izvona, kucabambisa rugondo redu rekuti Djehovha “uya ano uzii wakakwana” acatibvunza masoko aya basi atinodikana kuziya.—Djobo 37:16.

ATIZVIZII KUTI MUGUMO UCAUYA RINI

4. Maererano na Mateu 24:36, ciro cipi cinokosha maningi catisikazii?

4 Erengai Mateu 24:36. Isusu atizii kuti mugumo we nyika ino ya Sathani ucaguma rini. Kunyazi Djesu paainga ari pa nyika, iyena ainga asikazii ngezve “zuwa no nguwa iyona.”a Paa padarika nguwa, iyena wakapanganidzira aphostori ake kuti Djehovha muridzi we nguwa, ndiye anonyasa kuziya kuti zviro izvona zvicaitika mu nguwa ipi. (Zvii. 1:6, 7) Djehovha akasanangura kare nguwa icauya mugumo we nyika ino, asi isusu atina uzii we kunyasa kuziya kuti izvona zvicaitika rini.

5. Sezvo atizii kuti mugumo ucauya rini, izvona zvingatibata-bata kudini?

5 Maererano no zvakabhuiwa na Djesu, isusu atizii kuti ticadikana kuetsera nguwa yakadini kuti mugumo uuye. Nge ndaa yazvo, tingakwanisa kutama kugara no mwoyo unononoka kutsamwa kana kuora mwoyo, maka-maka kana taakuetsera zuwa ra Djehovha ke nguwa yakareba. Uyewo zvingatishuphira kuetsera kana anyaukama edu no amweni ecitiseka ngokuti mugumo ausati wauya. (2 Ped. 3:3, 4) Pamweni isusu tingarangarira kuti zvaizoita nyore kugara no mwoyo unononoka kutsamwa uye kushingirira kushorhwa katinoizwa no amweni kana taakuziya kuti mugumo ucaguma zuwa ripi.

6. Ngei zvakanaka kutama kuziya kuti mugumo ucauya rini?

6 Ngo kutama kutibvunza zuwa ricaguma mugumo, Djehovha ari kutipasa mukana wekupangidza kuti tinomuseenzera ngokuti tinomuda uye tinomugonda. Isusu tiri kuda kuseenzera Djehovha nokusikaperi, haiwa basi kumuseenzera dakara mugumo wauya. Zvinoita hingana kuti kutenda kedu kuno zuwa rakucazopera. Pane kukanda ndangariro dzedu pakuti “zuwa ra Djehovha” ricaguma rini, ciro cakanaka catingaita ikurangarira zvicazoitika kana zuwa irona rikaguma. Ngokudaro, ticanyasa kukwedera dhuze na Djehovha, kutunhudzira rugondo redu maari uye kuita zviri zvese kuti timupfadze.—2 Ped. 3:11, 12.

7. Zviro zvipi zvatinoziya?

7 Zvinokosha kukanda ndangariro dzedu pa zviya zvataakuziya, kuti mazuwa e kupedzesera akatanga muna 1914. Djehovha akatipasa uphorofita we mu Bhaibheri unopangidza gore irona kamare rakatanga mazuwa e kupedzesera. Uyewo anotipangidza kuti nyika yaizonga yakadini kubvira muna 1914. Hino, tino rugondo rekuti “zuwa guru ra Djehovha raa dhuze.” (Zef. 1:14) Uyewo tinoziya ngezve basa rinoda Djehovha kuti tiite, re kuparidzira “masoko akanaka e Umambo” ku anhu akawanda kana zvikabvira. (Mat. 24:14) Masoko awona ari kuparidzwa mu nyika dzinokwana kuita 240 uye mundima dzinoreketa mureketero dzinodarika 1000. Isusu atidikani kuziya ngezve “zuwa no nguwa iyona” kuti tiite zviri zvese mu basa irona rinokosha.

ISUSU ATIZVIZII KUTI DJEHOVHA ACAZVIITA KUDINI

8. Masoko okuti “basa ra Mwari we zvirokwazvo” anoda kureyei? (Muparidzi 11:5)

8 Ainguwapi dzese dzekuti tinoziya “basa ra Mwari we zvirokwazvo.” (Erengai Muparidzi 11:5.) Masoko awona anocokuita no zviro zvinoizwa na Djehovha uye zviro zvaanotendera kuti zviitike kuitira kuti adzadzise cinagwa cake. Isusu atizii zvikonzero zvinoita kuti Djehovha atendere kuti ciro ciitike kana kuti iyena acaitei kuitira kuti atibetsere. (Pis. 37:5) Bhaibheri rinoezanisa kutama kuziya “basa ra Mwari we zvirokwazvo,” nokutama kuzwisisa kukura kunoita mwana mudani ma mai ake. Kunyazi masiyentista aanyasi kuzwisisa kuti izvona zvinoitika kudini. Ngo mushobo umwewo, isusu atinyasi kuzwisisa kuti Djehovha anoita kudini zviro.

9. Ngo kutama kuziya mushobo ucatibetsera Djehovha, zvinyi zvingaitika?

9 Ngo kutama kuziya kuti Djehovha acatibetsera kudini, tingatanga kukana-kana. Pamweni tingathya kudzipira kuti tinyase kuseenzera Djehovha. Ngo muezaniso, kurerusa upenyu wedu kana kuti kuenda ku mbuto inodiwa aparidzi akawanda. Pamweni tingatanga kurangarira kuti Djehovha aaripi kutikomborera ngokuti tiri kuita zvakawanda mu basa ra Djehovha, asi atiripi kukwanisa kudzadzisa zvinangwa zvedu uyewo ngokuti atiripi kukwanisa kubudirira mu basa re kuparidzira nge mushobo wataida, kana kuti tiri kubatana ne zvinetso mu projeto ye sangano yatirikubetsera.

10. Mawara api anokosha atingasakurira nge kutama kuziya mushobo waticabetserhwa na Djehovha?

10 Kutama kuziya kuti Djehovha acatibetsera kudini, zvezvirokwazvo kunotibetsera kuti tisakurire mawara ekudzidodosa uye kugara no maonero ari pakati no pakati. Tinokwanisa kuona kuti Djehovha nguwa dzese anoziya kuti ndizvipi zvakanaka. (Isa. 55:8, 9) Uyewo tinotunhudzira rugondo redu kuna Djehovha uye kufundira kuda basi rubetso rake kuti tinyase kubudirira mu upenyu. Kana tikanyasa kubudirira mu basa re kuparidzira kana kuti mu projeto yatiri kuita musangano, tinopasa rukudzo rese ku uya unosisira, Djehovha. (Pis. 127:1; 1 Ako. 3:7) Uye zviro pazvinotama kubudirira nge mushobo wataietsera, tinodikana kuedzurira kuti kunyazi zvakadaro Djehovha ari kuonerera zvese. (Isa. 26:12) Isusu tinoita dii redu uye tinogonda kuti Djehovha acaita dii rake, tino rugondo kuti iyena acatitungamirira kunyazi asingaiti nge mushobo unoshamisa hingana zvaaiita kare.—Zvii. 16:6-10.

11. Zviro zvipi zvinokosha zvatinoziya ngezva Djehovha?

11 Isusu tinoziya kuti Djehovha nguwa dzese ano rudo, unatsi uye ungwaru. Ciro cimweni catinoziya nge cekuti Djehovha nguwa dzese anokoshesa zviya zvatinomuitira uye zvatinoitira hama dzedu mu kutenda. Uye tino rugondo rekuti Djehovha nguwa dzese, anokomborera aya akagondeka kaari.—Aheb. 11:6.

ISUSU ATIZII ZVICAITIKA MUNE RAMANGWANA

12. Tinofundei pana Tiyago 4:13, 14?

12 Erengai Tiyago 4:13, 14. Tino rugondo rekuti atizii zvicaitika mune mangwana. Mu nyika ino yatiri kurarama tinobatana no ‘zviro pa nguwa yatisikakariri.’ (Mup. 9:11) Ndiyo ndaa, atikwanisi kuziya kuti zvinangwa zvedu zvicadzadzika here kana kuti haiwa uye kuti tinonga ticirarama here kuti tikwanise kuzvidzadzisa.

13. Zviro zvinoitika mu upenyu zvatisikazwisisi zvingatibata-bata kudini?

13 Pamweni zvingatishuphira kuti tishingirire, ngokuti atizii zvicaitika mune ramangwana. Kuita kudini? Pamweni tinganetseka maningi nge zviro zvicaitika mune ramangwana zvekuti tingaruza mupfaro wedu. Upenyu wedu ungacinja ciriporipoco. Izvona, zvingaita kuti tirhwadziwe uye tinetseke. Kana zviro zvingatama kuitika nge mushobo wataietsera, zvingaita kuti tiore mwoyo uye tinyangadzwe.—Zvie. 13:12.

14. Mupfaro wedu unotsamira pa cinyi? (Onaiwo mafoto.)

14 Patinobatana no zvinetso, tino mukana we kupangidza kuti pasinei no zvingaitika, tinoseenzera Djehovha ngokuti tinomuda haiwa nge zviro zvaanotipasa. Bhaibheri rinopangidza kuti atidikani kuetsera kuti Djehovha atidziirire pa zvinetso zvese uye kuti iyena aarongi zvicaitika mu upenyu wedu. Djehovha anoziya kuti mupfaro wedu autsamiri pakuziya zvese zvicaitika mune ramangwana. Zvezvirokwazvo, mupfaro wedu unobva pakuziya nhungamiriro dza Djehovha uye kudzizwira. (Djer. 10:23) Kana tikapsvaka rubetso kuna Djehovha kuti tiite zvisananguro, atizodzirhyi mwoyo maningi nge kurangarira zviro zvicaitika. Zvinoita hingana tiri kubhuya kuti: “Kana Djehovha akada, ticararama uye ticaita ici kana ico.”—Tig. 4:15.

Mafoto: 1. Baba no mwana wawo ecirongedza pasta ye emerjensiya. Ecikanda Bhaibheri mu pastemo pamwepo no zvekurhya. 2. Mhuri iri mu tenda uku mvura yecinaya. Awona eciseenzesa zviya zvaakakanda mu pasta yawo ye emerjensiya.

Patinopsvaka nhungamiriro dza Djehovha uye tomuzwira, tinocengeteka (Onai mandima 14-15)b


15. Zvinyi zvatinoziya ngezve ramangwana?

15 Izvirokwazvo kuti atizvizii zvicaitika mune ramangwana, asi tinoziya kuti Djehovha akatigondesa upenyu usikaperi. Anhu anganani acararama upenyu uu kudenga uye anhu amweni acararana pa nyika pano. Tinozviziya kuti Djehovha aanganyepi uye kuti apana ciro cingamupingaidza kuti adzadzise zvipikirhwa zvake. (Tito 1:2) Iyena ndiye ega anokwanisa kubhuya “zvicaitika pakupedzesera, uye kubvira kare-kare zviro zvisati zvaitika.” Zvese zvakabhuiwa na Djehovha kare kuti zvaizoitika, zvakaitikadi kamare. Uye zvese zvaanobhuya kuti zvicaitika mune ramangwana, zvicadzadzika. (Isa. 46:10) Uye isusu tino rugondo rokuti apana ciro cingapingaidza Djehovha kuti atide. (Aro. 8:35-39) Azvinei no zvicazoitika mu upenyu wedu, iyena acatipasa ungwaru, acatinyaradza uye acatipasa simba kuti tikwanise kushingirira. Apana mubvunzo kuti Djehovha acatibetsera uye acatikomborera.—Djer. 17:7, 8.

ATIKWANISI KUNYASA KUZWISISA KUTI DJEHOVHA ANOTIZIYA ZVAKADINI

16. Hingana zvinopangidzwa pana Pisarema 139:1-6, zviro zvipi zvinoziya Djehovha nge zvedu zvekuti atinyasi kuzvizwisisa?

16 Erengai Pisarema 139:1-6. Musiki wedu anonyasa kutiziya, iyena anoziya mushobo wakaita mwiri wedu, mazwiro edu uye ndangariro dzedu. Iyena anonyasa kutiona nguwa dzese. Pane kuzwa basi zviya zvatinoreketa, iyena anokwanisa kuziya zviya zvataida kureketa. Djehovha anoona zvese zvatinoita uye anoziya zvikonzero zvatiitisa kuti tiite zviro nge mushobo watazviita. Mambo Dhavhidhi akapangidza kuti Djehovha nguwa dzese ari kuona zvese zvatinoita kuti atibetsere pa mugariro upi hawo. Imwimwi munozwa kudini nge kuziya kuti, Cangamire Tenzi we zviro zvese, Musiki we denga no nyika unonyasa kuona umwe na umwe wedu ngo mushobo wakadaro? Azvishamisi here? Zvinoita hingana zvakabhuya Dhavhidhi kuti: “Ruziyo rakadaro andikwanisi kurizwisisa. Rakakura maningi zvekuti andigumi pakugara naro.”—Pis. 139:6.

17. Ngei zvingatishuphira kutendera kuti Djehovha anonyasa kutiziya?

17 Nge ndaa ye mushobo watakarerhwa, tsika yedu kana kuti zviya zvataitenda tisati taziya cokwadi, zvingatishuphira kuona Djehovha hingana Baba ano rudo uye anotida maningi. Kana kuti tingarangarira kuti zvishaishi zvedu zvatakaita kare zvakashata maningi, zvekuti Djehovha aazombodi kugara shamwari yedu uye kuti ari kure nesu. Kunyazi Dhavhidhi nguwa dzimweni wakatombozwawo kudaro. (Pis. 38:18, 21) Pamweni munhu uri kupeta masimba kuti apfadze Djehovha, ungadzibvunzisa kuti: ‘Kana Djehovha ecindiziyadi kamare, ngei ecida kuti ndisiye mararamiro andinoona kuti akanaka kandiri?’

18. Ngei zvakanaka kutendera kuti Djehovha anonyasa kutiziya kudarika mushobo watinodziziya? (Onaiwo mafoto.)

18 Zvinokosha maningi kutendera kuti Djehovha anonyasa kutiziya kupinda isusu kamare uye iyena anoona zviro zvakanaka katiri kupinda zviya zvatinoona. Kunyazi eciona zvishaishi zvedu, Djehovha anoziya kuti tiri kupeta masimba kuti tigare munhu wakadini uye iyena anotida maningi. (Aro. 7:15) Kana tikaziya kuti Djehovha anoona zviro zvakanaka katiri, zvicaita kuti tipete masimba kuti timuseenzere takagondeka uye tecipfara.

Mafoto: 1. Hama yakaora mwoyo yeciringira no pa janera kunza kakasvipa uye mvura yecinaya. 2. Mu Paraiso, hama yecihamba mu ngwanza pamwepo no shamwari dzayo paanonga eciona mbuto yakarungama.

Patinobatana no zvinetso zvatisikakariri, Djehovha anotibetsera kuti tishingirire nge kubambisa kutenda kedu ku zvipikirhwa zvaakatipikira mune ramangwana (Onai mandima 18-19)c


19. Tinoziyei ngezva Djehovha?

19 Tinoziya kuti Djehovha i rudo. Apana mubvunzo pa nyaya ii. (1 Juau 4:8) Tinoziya kuti zvese zvaanotikumbira, anozviita ngokuti anotida uye anoda zviro zvakatinakira nguwa dzese. Tinoziyawo kuti Djehovha anoda kuti isusu tione upenyu usikaperi. Ndiyo ndaa, kuti izvona zviitike iyena akatipasa rusudzunuro. Cipo icona cinotipasa rugondo rekuti, kunyazi nokusama kukwana kedu tinokwanisa kupfadza Djehovha. (Aro. 7:24, 25) Uye tinoziyawo kuti “Mwari mukuru kudarika mwoyo wedu uye anoziya zviro zvese.” (1 Juau 3:19, 20) Djehovha anoziya zvese ngezvedu uye iyena ano rugondo rokuti tinokwanisa kuita zvese zvaanotikumbira.

20. Ngei atidikani kunetseka maningi no zviro zvatisikazii?

20 Djehovha anotibvudza zvese zvatinodikana kuziya. Patinogara no maonero ari pakati no pakati uye totendera izvona, atizogari tecinetseka no zviro zvatisikazii. Pane kudaro, tingakwanisa kukanda ndangariro dzedu pa zviro zvinokosha. Ngokudaro, tinopangidza kuti tinodzidodosa uye tinonyasa kugonda Djehovha, “uwo ano ruziyo rakakwana.” (Djobo 36:4) Izvirokwazvo kuti atinganyasi kuzwisisa zviro zvese pa nguwa ino, asi tinoziya kuti Djehovha acarumbwa ecitifundisa nguwa dzese uye izvona zvakanaka maningi ngokuti ticarumbwa tecifunda zviro zvipsva ngezva Mwari wedu anoshamisa Djehovha.—Mup. 3:11.

NGEI ZVAKANAKA KUTENDERA KUTI ATIZII KUTI . . .

  • Mugumo ucauya rini?

  • Cinyi cicaitika mune ramangwana?

  • Djehovha anotiziya zvakadini?

NGOMA 104 Cipo ca Mwari ce Mwiya Mucena

a Djesu acatungamirira pa katsakatiswa ke nyika ino ya Sathani yakashata. Hino tingatobhuya hedu kuti pari zvino iyena aakuziya zuwa ricaitika Amagedhoni uye ‘paacadzadzisa kuwina kake.’—Zvak. 6:2, 19:11-16.

b KUPANGANIDZWA KE MIFANIKISO PA: Baba no mwana wawo ecigadzirira kacipasta ko emerjensiya kuitira kuti mhuri igare yakagadzirira kana pakaitika ciro cisikakarirhwi.

c KUPANGANIDZWA KE MIFANIKISO: Hama iri kubatana no zvinetso iri kunyasa kurangarira mupfaro waicazwa mu nyika ipsva.

    Mabhuku mu Ciutee (2013-2025)
    Kubuda
    Kupinda
    • Ciutee
    • Kupasana
    • Zvamunoda
    • Copyright © 2025 Watch Tower Bible and Tract Society of Pennsylvania
    • Mitemo ye Kuseenzesa
    • Mutemo we Macengeterwe e Masoko e Muridzi
    • Privacy Settings
    • JW.ORG
    • Kupinda
    Kupasana