Eaha te tiaturiraa no te feia herehia e tatou tei pohe?

“Ia pohe te taata nei, e ora faahou anei [oia]?”, ta Ioba i ani i mutaa ihora (Ioba 14:14). Peneiaˈe ua uiui aˈena outou i te hoê â uiraa. Eaha to outou huru ia haapii anaˈe outou e e nehenehe outou e ite faahou i te mau taata tei herehia e outou e e ora ˈtu i nia i te fenua i roto i te mau huru tupuraa tia roa?

Teie ta te Bibilia e tǎpǔ ra: “To oe ra mau taata pohe, e ora ïa; (...) e tia faahou ïa.” Te parau faahou ra oia e: “E parahi te feia parau-tia i nia i te fenua, e parahi tamau â ratou i reira.” — Isaia 26:19; Salamo 37:29.

No te tiaturi papu atu i taua mau parau tǎpǔ ra, e tia ia tatou ia pahono i te tahi mau uiraa faufaa roa: No te aha te taata e pohe ai? Teihea roa te feia pohe? Nafea tatou e nehenehe ai e tiaturi e e ora faahou mai ratou?

Te pohe, e te ohipa e tupu i te poheraa

Te faataa maitai ra te Bibilia e, i te omuaraa, aita te Atua i opua e ia pohe te taata. Ua poiete oia i na taata toopiti matamua, o Adamu e o Eva, ua tuu oia ia raua i roto i te hoê paradaiso i nia i te fenua nei aore ra Edene, e ua faaue atura ia raua ia fanau i te tamarii e ia faaaano i to raua nohoraa paradaiso i nia i te fenua atoa nei. E pohe te tane e te vahine mai te peu noa e eita raua e auraro i te mau faaueraa no ǒ mai i te Atua ra. — Genese 1:28; 2:15-17.

Ma te ore e faaite i te mauruuru no te maitai o te Atua, aita o Adamu e o Eva i auraro e ua faautuahia raua i te utua i faaite-atea-hia. ‘E hoˈi oe i raro i te repo’, ta te Atua i parau ia Adamu, “no reira mai hoi oe; e repo hoi oe, e e hoˈi faahou atu â oe i te repo”. (Genese 3:19.) Na mua i to ˈna poieteraahia, aita Adamu; e repo oia. E no to ˈna faatura-ore-raa aore ra hararaa, ua faautuahia oia ia hoˈi i te repo, i te hoê huru vai-ore-raa.

Te pohe, o te hoê ïa huru e aita e ora. Te haapapu ra te Bibilia i te taa-ê-raa: “E utua te pohe no te hara, area te ora mure ore ra, e mea horoa-noa-hia mai ïa e te Atua.” (Roma 6:23). Ma te faaite e, te pohe, o te hoê ïa huru ite-ore-roa-raa, te faˈi nei te Bibilia e: “Ua ite te feia e ora nei, e pohe ratou, aita râ a te feia i pohe ra e parau itea.” (Koheleta 9:5). Ia pohe anaˈe te taata, ta te Bibilia e parau ra, “te reva nei hoi to ˈna varua, te hoˈi nei oia i to ˈna ra repo; mou roa ˈtura ta ˈna i opua i taua mahana ra”. — Salamo 146:3, 4.

Teie râ, i te mea e o Adamu e o Eva anaˈe tei ore i auraro i te faaueraa i horoahia i Edene ra, no te aha tatou paatoa e pohe ai? No te mea ua fanauhia tatou paatoa i muri aˈe i te faaroo-ore-raa a Adamu; ua noaa ïa ia tatou paatoa te hara e te pohe. Teie te faataaraa ta te Bibilia e horoa maira: “No te taata [Adamu] hoê ra i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe.” — Roma 5:12; Ioba 14:4.

Teie nei râ, e parau paha te hoê taata e: ‘Aita anei to te mau taata e nephe pohe ore o te ora noa i muri aˈe i te pohe?’ Oia mau, ua parare roa taua haapiiraa ra, e te parau nei hoi vetahi e e haamatara te pohe i te hoê eˈa no te tahi atu â oraraa. Teie râ, e ere taua manaˈo ra no roto mai i te Bibilia. Te haapii nei râ te Bibilia e e nephe outou, e to outou nephe, o outou iho, e te mea ta outou e nehenehe e rave maoti to outou feruriraa e to outou tino (Genese 2:7; Ieremia 2:34; Maseli 2:10). Te parau faahou ra te Bibilia e: “O tei rave i te hara ra, o te pohe ïa.” (Ezekiela 18:4). Aita roa te Bibilia e haapii ra e e nephe pohe ore to te taata, o te ora noa i muri aˈe i te poheraa o te tino.

Nafea te taata e nehenehe ai e ora faahou mai?

I to te hara e te pohe faraa mai i roto i te ao nei, ua faaite atura te Atua i ta ˈna opuaraa e faahoˈi faahou mai i te mau taata pohe i te ora na roto i te arai o te tia-faahou-raa. No reira te Bibilia e parau ai e: “I parau hoi oia [Aberahama] e, e tiâ i te Atua ia faatia faahou mai ia ˈna [ta ˈna tamaiti o Isaaka] mai te pohe maira.” (Hebera 11:17-19). E niu papu mau to te tiaturiraa a te patereareha, no te mea te parau ra te Bibilia no nia i te Puai Hope e: “E ere hoi oia i te Atua no tei pohe, no tei ora râ, te ora anaˈe ra hoi ratou ia ˈna.” — Luka 20:37, 38.

Oia mau, te vai ra i te Atua Puai Hope ra, eiaha noa te mana, te hinaaro atoa râ no te faatia faahou mai te feia ta ˈna e maiti ra. Ua faˈi o Iesu iho e: “Eiaha e maere i te reira; te fatata mai nei hoi te hora e faaroo ai te feia atoa i roto i te apoo ra i tana reo, e e haere mai i rapae.” — Ioane 5:28, 29; Ohipa 24:15.

Tau taime iti noa i muri aˈe to ˈna faahitiraa i taua mau parau ra, ua farerei atura Iesu i te hoê tiaa taata e apee ra i te hoê taata pohe, ia ˈna i haafatata ˈtu i te oire o Naina. Te taurearea pohe, o te tamaiti fanau tahi ïa a te hoê vahine ivi. Ia ˈna i ite i te oto rahi o taua vahine ra, ua aroha ˈtura ia ˈna, e, ma te parau atu i te taata pohe, ua faaue atura e: “E teie nei taata apî, a tia, te parau atu nei au ia oe.” Parahi ihora te taurearea e tuu atura Iesu ia ˈna i to ˈna metua vahine ra. — Luka 7:11-17.

Mai tei farereihia e taua vahine ivi ra, ua ite-atoa-hia te hoê oaoaraa rahi i to ˈna haereraa ˈtu i te fare o Iaeiro, tavana no te sunago ati iuda, e no pohe noa hoi ta ˈna tamahine e ahuru ma piti matahiti. Teie râ, i to Iesu taeraa mai i te fare o Iaeiro, ua haere atura oia i pihai iho i te tamahine pohe e ua na ô atura e: “E teie nei potii, a tia.” E ua tia maira oia! — Luka 8:40-56.

I muri iho, pohe aˈera Lazaro, te hoa o Iesu. I to Iesu taeraa mai i to ˈna fare, a maha atura mahana o ˈna i te poheraa. Noa ˈtu to ˈna oto rahi, ua faaite o Mareta, te tuahine a Lazaro, i to ˈna tiaturiraa ma te parau e: “Ua ite au e, e tia faahou mai â oia ia tae i te tia-faahou-raa i te mahana hopea ra.” Ua haere aˈera râ Iesu i te menema, e faaue ihora e ia huri ê i te ofai e ua pii atura e: “E Lazaro, a haere mai i rapae.” E ua haere maira Lazaro i rapae! — Ioane 11:11-44.

A feruri na tatou maa taime iti. Eaha te huru o Lazaro a vai pohe noa ˈi oia i te roaraa e maha mahana? Aita o ˈna i parau e ua ite o ˈna i te oaoa i nia i te raˈi aore ra i te mau haamauiuiraa i roto te po auahi, e faaite ïa o ˈna ahiri mai te reira iho â te tupuraa. Aita, ua vai ite ore roa o Lazaro i roto i te pohe, e e vai noa mai oia mai te reira te huru tae noa ˈtu i te “tia-faahou-raa i te mahana hopea” ahiri aita Iesu i faaora mai ia ˈna.

Parau mau, ua riro taua mau semeio ra ta Iesu i rave ei mau haamaitairaa poto noa, no te mea ua pohe faahou â te feia ta ˈna i faatia mai. Teie râ, a 1900 matahiti i teie nei, ua haapapu oia e e nehenehe te tahi mau taata e ora faahou maoti te puai a te Atua. No reira, na roto i ta ˈna mau semeio, ua faaite Iesu i nia i te hoê tuhaa haihai i te ohipa e tupu i nia i te fenua nei, i raro aˈe i te faatereraa a te Basileia o te Atua.

Ia pohe anaˈe te hoê taata herehia

Ia tairi anaˈe te enemi ra, oia hoi te pohe, e nehenehe tatou e oto rahi roa, noa ˈtu e e tiaturi tatou i te tia-faahou-raa. Ua tiaturi o Aberahama e e ora faahou ta ˈna vahine, teie râ e taio tatou e “ua haere maira hoi (...) [te patereareha] i te otoraa ia Sara e oto ia ˈna”. (Genese 23:2.) E eaha ïa no Iesu? I te poheraa o Lazaro, “uuru ihora oia e horuhoru atura tana varua”, e i muri iho “oto ihora” oia (Ioane 11:33, 35). No reira, e ere roa i te hoê tapao paruparu te otoraa no te poheraa o te hoê taata herehia.

Ua riro te poheraa o te hoê tamarii ei mauiuiraa taa ê mau no te metua vahine. No reira te parau nei te Bibilia no nia i te oto hohonu roa a te hoê metua vahine aita faahou ta ˈna tamarii (Te mau Arii 2, 4:27). Mea papu mau e e oto atoa te metua tane ia tupu anaˈe te hoê ati mai te reira te huru. “Ahiri o vau tei pohe ei mono ia oe”, to te arii ra o Davida aueraa i te poheraa o ta ˈna ra tamaiti o Abasaloma. — Samuela 2, 18:33.

Teie râ, maoti te tiaturiraa i roto i te tia-faahou-raa, e nehenehe e tamahanahana i to tatou oto. Mai ta te Bibilia e parau ra, ‘e ore outou e taiâ, mai te tahi pae aore o ratou tiairaa ra’. (Tesalonia 1, 4:13.) I te taa-ê-raa, e haafatata ˈtu tatou i te Atua na roto i te pure, e te tǎpǔ ra te Bibilia e ‘na ˈna e tauturu mai ia tatou’. — Salamo 55:22.