Imani Yako Itakuwa na Nguvu Kadiri Gani?

1. Huenda tukajiuliza swali gani?

JE, NYAKATI nyingine unakuwa na wasiwasi kuhusu matukio yaliyo mbele yetu, yaani, kuharibiwa kwa dini ya uwongo, shambulizi la Gogu wa Magogu, na vita ya Har–Magedoni? Je, umewahi kujiuliza, ‘Wakati huo utakapofika, je, nitafaulu kudumisha utimilifu nitakapokabili matukio hayo yenye kuogopesha?’ Ikiwa umejiuliza swali hilo, mazungumzo haya kuhusu maneno ya Yesu yaliyo katika andiko letu la msingi yatakusaidia. Yesu aliwaambia hivi wanafunzi wake: “Mioyo yenu isitaabike. Iweni na imani.” (Yoh. 14:1) Imani yenye nguvu itatusaidia kukabili wakati ujao tukiwa na uhakika.

2. Tunaweza kuimarishaje imani yetu, na tutachunguza nini katika makala hii?

² Tunaweza kuimarisha imani yetu ili kuvumilia majaribu ya wakati ujao kwa kuchunguza jinsi tunavyokabiliana na majaribu ya imani sasa. Tunapotafakari jinsi tunavyokabiliana na majaribu ya sasa, tunaweza kutambua maeneo ambayo tunahitaji kuimarisha imani yetu. Kadiri tunavyoshinda kila jaribu, imani yetu inazidi kuimarika. Kufanya hivyo, kutatusaidia kuvumilia majaribu ya wakati ujao. Katika makala hii, tutazungumzia hali nne ambazo wanafunzi wa Yesu walipitia, zilizofunua uhitaji wao wa kuwa na imani zaidi. Kisha, tutachunguza jinsi tunavyoweza kuvumilia matatizo kama hayo leo, na jinsi yanavyoweza kututayarisha kwa ajili ya mambo yatakayotokea wakati ujao.

IMANI KWAMBA MUNGU ATATUANDALIA MAHITAJI YETU YA KIMWILI

3. Kama inavyoonyeshwa kwenye Mathayo 6:30, 33, Yesu aliweka wazi jambo gani kuhusu imani?

³ Ni jambo la asili kwa kichwa cha familia kutaka kumwandalia mke na watoto wake chakula cha kutosha, mavazi, na makao. Si rahisi kufanya hivyo sikuzote katika nyakati hizi ngumu. Katika visa fulani, waamini wenzetu wamepoteza kazi, na licha ya jitihada kubwa hawajafaulu kupata kazi nyingine. Wengine wamekataa kazi ambazo haziwafai Wakristo. Katika visa hivyo vyote, tunahitaji imani yenye nguvu kwamba kwa njia fulani, Yehova atahakikisha tunapata kile tunachohitaji kwa ajili ya familia yetu. Yesu aliweka jambo hilo wazi kwa wanafunzi wake katika Mahubiri ya Mlimani. (Soma Mathayo 6:30, 33.) Tunaposadiki kabisa kwamba Yehova hatatuacha, tutaweza kukaza fikira zetu mahali sahihi, yaani, kwenye masilahi ya Ufalme. Tunapojionea jinsi Yehova anavyotusaidia kupata mahitaji yetu ya kimwili, atakuwa halisi zaidi kwetu na imani yetu itaimarishwa.

4-5. Ni nini kilichoisaidia familia fulani kukabiliana na mahangaiko kuhusu mahitaji yao ya kimwili?

⁴ Fikiria jinsi familia moja nchini Venezuela ilivyojionea jinsi Yehova alivyoisaidia kukabiliana na mahangaiko kuhusu mahitaji yao ya kimwili. Pindi moja, familia ya Castro ilijipatia pesa za kukidhi mahitaji yao kwa kulima kwenye shamba lao. Kisha, kikundi cha wahalifu wenye silaha kiliwanyang’anya eneo lao na kuwalazimisha waondoke. Miguel Castro, ambaye ni baba wa familia hiyo anasema hivi: “Sasa tunategemea sana tunachovuna kwenye shamba dogo ambalo tumepewa tutumie kwa muda. Ninaanza kila siku kwa kumwomba Yehova atuandalie tunachohitaji siku hiyo.” Maisha ni magumu kwa familia hiyo, lakini wakiwa na imani kabisa katika uwezo wa Baba yetu mwenye upendo wa kuwaandalia mahitaji yao ya kila siku, familia ya Castro inahudhuria kwa ukawaida mikutano ya kutaniko na kushiriki katika huduma ya shambani. Wanatanguliza masilahi ya Ufalme maishani mwao, na Yehova anawaandalia wanachohitaji.

⁵ Wakati huo wote walipokuwa wakipitia hali ngumu, Miguel na Yurai, mke wake, wamekazia fikira jinsi Yehova alivyowategemeza. Nyakati nyingine, Yehova aliwatumia waamini wenzao ili kuwaandalia vitu walivyohitaji au kumsaidia Miguel kupata kazi inayofaa ya kimwili. Nyakati nyingine, Yehova amewasaidia kupata mahitaji ya muhimu kupitia jitihada za kutoa misaada za ofisi ya tawi. Yehova hajawahi kuwaacha kamwe. Matokeo ni kwamba wamejionea imani ya familia yao ikikua. Baada ya kusimulia kisa hususa ambacho Yehova aliwasaidia, Yoselin, binti yao mkubwa alisema: “Inagusa moyo kujionea mkono wa Yehova waziwazi. Ninamwona kuwa rafiki yangu ninayeweza kumtegemea maishani.” Anaongeza hivi: “Majaribu tuliyopitia tukiwa familia yametutayarisha kwa ajili ya majaribu makubwa zaidi wakati ujao.”

6. Unaweza kuimarishaje imani yako unapokabili hali ngumu za kiuchumi?

⁶ Je, unakabiliana na hali ngumu ya kiuchumi? Ikiwa ndivyo, unapitia wakati mgumu sana. Hata hivyo, licha ya changamoto unazokabili, unaweza kutumia wakati huu kuimarisha imani yako. Kwa sala, soma maneno ya Yesu kwenye Mathayo 6:25-34 na uyatafakari. Fikiria mifano ya nyakati zetu ambayo inathibitisha kwamba Yehova huwaandalia wale wanaoendelea kuwa na bidii katika utendaji wa kitheokrasi. (1 Kor. 15:58) Kufanya hivyo, kutaimarisha uhakika wako kwamba Baba yako wa mbinguni atakusaidia kama alivyowasaidia wengine waliopitia hali kama zako. Anajua unachohitaji, na anajua jinsi ya kukiandaa. Kadiri unavyojionea msaada wa Yehova maishani mwako, ndivyo imani yako itakavyoimarika zaidi, hivi kwamba utaweza kuvumilia majaribu makubwa zaidi ya wakati ujao.​—Hab. 3:17, 18.

IMANI YA KUVUMILIA “DHORUBA KUBWA”

7. Kulingana na Mathayo 8:23-26, “dhoruba kubwa” ilijaribu jinsi gani imani ya wanafunzi wa Yesu?

⁷ Yesu na wanafunzi wake walipokumbwa na dhoruba baharini, Yesu alitumia kisa hicho kuwasaidia watambue maeneo ambayo walihitaji imani kubwa zaidi. (Soma Mathayo 8:23-26.) Dhoruba ilipokuwa ikiendelea kupiga na maji kufunika mashua, Yesu alikuwa amelala kwa amani. Wanafunzi hao waliokuwa wanaogopa walipomwamsha Yesu na kumwambia awaokoe, Bwana aliwakaripia kwa upole akisema: “Kwa nini mnaogopa sana, ninyi wenye imani ndogo?” Wanafunzi hao walioogopa walipaswa kutambua kwamba Yehova alikuwa na uwezo kamili wa kumlinda Yesu na wale waliokuwa pamoja naye dhidi ya madhara. Je, unaona jinsi tunavyoweza kutumia somo hilo? Imani yenye nguvu inaweza kutusaidia kukabiliana na ‘dhoruba yoyote kubwa,’ iwe ni halisi au ya mfano.

8-9. Imani ya Anel ilijaribiwaje, na ni nini kilichomsaidia?

⁸ Fikiria jinsi Anel, dada mseja kutoka Puerto Riko, alivyoimarisha imani yake baada ya kupitia jaribu kali. “Dhoruba kubwa” aliyokabili ilikuwa dhoruba halisi. Jaribu hilo lilianza mwaka wa 2017 Kimbunga Maria kilipoharibu nyumba yake. Kwa sababu ya kimbunga hicho alipoteza kazi yake. Anel anakiri hivi: “Wakati wa siku hizo ngumu, nilikuwa na mahangaiko, lakini nilijifunza kumtumaini Yehova kupitia sala na kutoruhusu mahangaiko yanizuie kutenda.”

⁹ Anel alitaja pia jambo lingine lililomsaidia kukabiliana na tatizo lake—utii. Anel anasema hivi: “Kufuata mwongozo wa tengenezo kulinisaidia kuwa na utulivu. Nilijionea mkono wa Yehova kupitia kitia-moyo cha kiroho nilichopata na pia msaada wa mahitaji ya kimwili uliotolewa na ndugu na dada.” Anaongezea hivi: “Yehova alinipatia zaidi ya kile ambacho ningeweza kuomba, na imani yangu iliimarishwa sana.”

10. Unaweza kufanya nini ikiwa unakabili “dhoruba kubwa”?

¹⁰ Je, unakabili “dhoruba kubwa” maishani mwako? Huenda unateseka kwa sababu ya janga la asili. Au huenda ikawa ni dhoruba ya mfano, kama vile tatizo baya sana la afya ambalo linakufanya uhisi umelemewa na hisia na hujui la kufanya. Huenda pindi fulani ukawa na mahangaiko, lakini usiruhusu mahangaiko hayo yakuzuie kumtumaini Yehova. Mkaribie kupitia sala za kutoka moyoni. Imarisha imani yako kwa kutafakari pindi zilizopita ambapo Yehova alikusaidia. (Zab. 77:11, 12) Unaweza kuwa na hakika kwamba hatakuacha kamwe—sasa, na hata wakati ujao.

11. Kwa nini tunapaswa kuazimia kuwatii wale wanaoongoza?

¹¹ Ni jambo gani lingine linaloweza kukusaidia kuvumilia majaribu? Kama Anel alivyotaja, ni utii. Jifunze kuwatumaini wale ambao Yehova na Yesu wanawatumaini. Nyakati nyingine, huenda wale waliowekwa rasmi ili kuongoza wakatoa mwongozo ambao hatuuelewi. Hata hivyo, Yehova huwabariki wale wanaotii. Tunajua kupitia Neno lake na kutokana na masimulizi ya watumishi waaminifu kwamba utii huokoa uhai. (Kut. 14:1-4; 2 Nya. 20:17) Tafakari mifano hiyo. Kufanya hivyo, kutaimarisha azimio lako la kuunga mkono mipango ya tengenezo sasa na wakati ujao. (Ebr. 13:17) Hivyo, hutakuwa na sababu ya kuogopa dhoruba kubwa zaidi itakayokuja hivi karibuni.—Met. 3:25.

IMANI YA KUKABILIANA NA UKOSEFU WA HAKI

12. Kulingana na andiko la Luka 18:1-8, kuna uhusiano gani kati ya imani na kuvumilia ukosefu wa haki?

¹² Yesu alijua kwamba ukosefu wa haki ungejaribu imani ya wanafunzi wake. Ili kuwasaidia kukabiliana na hali hiyo, alitoa mfano unaopatikana kwenye kitabu cha Luka. Yesu alizungumza kuhusu mwanamke mjane aliyeendelea kumlilia mwamuzi asiye mwadilifu ili apate haki yake. Mjane huyo alikuwa na uhakika kwamba ikiwa angeendelea kumsisitizia mwamuzi huyo, angepata haki yake. Hatimaye, mwamuzi huyo alijibu ombi lake. Somo ni nini? Yehova hana ukosefu wa haki. Hivyo, Yesu alisema hivi: “Kwa hakika, je, Mungu hatawatendea haki watu wake waliochaguliwa ambao wanamlilia mchana na usiku, huku akiwaonyesha subira?” (Soma Luka 18:1-8.) Kisha, Yesu aliongezea hivi: “Mwana wa binadamu atakapofika, je, kweli ataipata imani hii duniani?” Tunapotendewa kwa njia isiyo ya haki, tunahitaji kuthibitisha kupitia subira na ustahimilivu wetu kwamba tuna imani yenye nguvu kama ya mjane huyo. Tukiwa na imani kama hiyo, tunaweza kuwa na uhakika kwamba wakati utafika, iwe ni sasa au baadaye, ambapo Yehova atatenda kwa niaba yetu. Pia, tunahitaji kuamini kwamba sala ina nguvu. Nyakati nyingine, sala zetu zinaweza kuwa na matokeo ambayo hatukutarajia.

13. Sala iliisaidiaje familia moja iliyokuwa ikitendewa isivyo haki?

¹³ Fikiria kisa cha Vero, dada anayeishi katika Jamhuri ya Kidemokrasia ya Kongo. Yeye, mume wake asiye mwamini, na binti yao mwenye umri wa miaka 15, walihitaji kukimbia kijiji chao kiliposhambuliwa na kikundi cha wanajeshi. Wakiwa njiani, familia hiyo ilifika kwenye kizuizi cha barabarani ambako walisimamishwa na wanajeshi ambao walitishia kuwaua. Vero alipoanza kulia, binti yake alijaribu kumtuliza kwa kusali kwa sauti na kurudia tena na tena jina la Yehova katika sala yake. Alipomaliza kusali, kamanda wa kikundi hicho cha wanajeshi alimuuliza hivi: “Msichana mdogo, ni nani aliyekufundisha kusali?” Alijibu hivi: “Mama yangu alinifundisha, akitumia kielelezo kinachopatikana kwenye Mathayo 6:9-13.” Kamanda huyo akasema: “Msichana mdogo, nenda kwa amani pamoja na wazazi wako, na Yehova Mungu wenu awalinde!”

14. Ni jambo gani linaloweza kujaribu imani yetu, na ni nini kitakachotusaidia kuvumilia?

¹⁴ Visa kama hivyo, vinatufundisha kwamba hatupaswi kamwe kupuuza umuhimu wa sala. Lakini vipi ikiwa sala zetu hazijibiwi papo hapo au kwa njia inayoonekana wazi na ya pekee? Kama yule mjane kwenye mfano wa Yesu, endelea kusali ukiwa na uhakika kwamba Mungu wetu hatakuacha, baada ya muda na kwa njia fulani atajibu sala yako. Endelea kumwomba Yehova roho yake takatifu. (Flp. 4:13) Kumbuka kwamba hivi karibuni Yehova atakubariki sana hivi kwamba utasahau maumivu yoyote ya wakati uliopita. Unapovumilia majaribu kwa uaminifu na kwa msaada wa Yehova, utaimarishwa kwa ajili ya siku zijazo.​—1 Pet. 1:6, 7.

IMANI YA KUSHINDA VIKWAZO

15. Kama inavyoonyeshwa kwenye Mathayo 17:19, 20, wanafunzi wa Yesu walikabili changamoto gani?

¹⁵ Yesu aliwafundisha wanafunzi wake kwamba imani ingewasaidia kushinda vikwazo mbalimbali. (Soma Mathayo 17:19, 20.) Pindi moja, wanafunzi wa Yesu hawakuweza kufukuza roho waovu, hata ingawa walikuwa wamefaulu kufanya hivyo nyakati nyingine. Tatizo lilikuwa nini? Yesu alifafanua kwamba walihitaji imani zaidi. Aliwaambia kwamba ikiwa wangekuwa na imani ya kutosha wangeweza kuondoa vikwazo vilivyo kama mlima! Leo, sisi pia tunaweza kukabili changamoto ambazo huenda zikaonekana kana kwamba hatuwezi kuzishinda.

16. Imani imemsaidiaje Geydi kukabiliana na msiba na huzuni kubwa?

¹⁶ Fikiria mfano wa Geydi, dada kutoka nchini Guatemala. Edi, mume wake, aliuawa walipokuwa wakirudi nyumbani baada ya mikutano ya kutaniko. Imani ya Geydi imemsaidiaje kukabiliana na huzuni yake kubwa? Anasema hivi: “Sala hunisaidia kumtupia Yehova mzigo wangu, jambo linalonifanya nihisi nina amani. Ninaona jinsi Yehova anavyonitunza kupitia familia yangu na marafiki wangu kutanikoni. Kuwa na mengi ya kufanya katika utumishi wa Yehova, hupunguza maumivu yangu na kunisaidia kushughulika na siku moja baada ya nyingine, bila kuwa na wasiwasi sana kuhusu kesho. Baada ya kupitia hali hiyo, nimejifunza kwamba haidhuru nitakabili jaribu gani wakati ujao, nitaweza kulikabili kwa msaada wa Yehova, Yesu, na tengenezo letu.”

17. Tunaweza kufanya nini tunapokabili kikwazo kilicho kama mlima?

¹⁷ Je, unaomboleza kifo cha mpendwa wako? Tumia wakati kuimarisha imani yako katika tumaini la ufufuo kwa kusoma masimulizi ya Biblia ya watu waliofufuliwa. Je, unahuzunika kwa sababu mtu wa familia alitengwa na ushirika? Jifunze ili ujisadikishe mwenyewe kwamba njia ya Mungu ya kutoa nidhamu sikuzote ni bora. Tumia tatizo lolote unalokabili kama fursa ya kuimarisha imani yako. Mmiminie moyo wako Yehova. Usijitenge, badala yake endelea kukaa karibu na ndugu na dada zako. (Met. 18:1) Shiriki katika utendaji ambao utakusaidia kuvumilia, hata ikiwa bado unatokwa na machozi unapokumbuka mambo uliyopitia. (Zab. 126:5, 6) Dumisha ratiba yako ya kuhudhuria mikutano, utumishi wa shambani, na usomaji wa Biblia. Na endelea kukazia fikira baraka nzuri sana za wakati ujao ambazo Yehova amekuandalia. Kadiri unavyoona jinsi Yehova anavyokusaidia, imani yako kwake itaimarika hata zaidi.

“TUSAIDIE TUWE NA IMANI ZAIDI”

18. Ikiwa unagundua udhaifu fulani katika imani yako, unaweza kufanya nini?

¹⁸ Ikiwa majaribu uliyopitia, wakati uliopita au sasa, yamefunua udhaifu fulani katika imani yako, usivunjike moyo. Ione hiyo kuwa fursa ya kuimarisha imani yako. Toa ombi kama la mitume wa Yesu waliosema hivi: “Tusaidie tuwe na imani zaidi.” (Luka 17:5) Pia, tafakari mifano ambayo tumezungumzia katika makala hii. Kama Miguel na Yurai, kumbuka nyakati zote ambazo Yehova alikusaidia. Kama binti ya Vero na Anel, sali kwa bidii kwa Yehova, hasa unapokabili changamoto kubwa. Na kama Geydi, tambua kwamba huenda Yehova akakupatia msaada unaohitaji kupitia watu wa familia au marafiki. Unapomruhusu Yehova akusaidie kuvumilia majaribu unayopitia sasa, utakuwa na uhakika zaidi kwamba atakusaidia uvumilie majaribu yoyote ambayo huenda ukakabili wakati ujao.

19. Yesu alikuwa na uhakika gani, nawe unaweza kuwa na uhakika gani?

¹⁹ Yesu alifunua maeneo ambayo wanafunzi wake walikosa imani, lakini kamwe hakutilia shaka kwamba kwa msaada wa Yehova wangeweza kukabili majaribu ya wakati ujao kwa mafanikio. (Yoh. 14:1; 16:33) Alikuwa na uhakika kwamba imani yenye nguvu ingewezesha umati mkubwa kuokoka dhiki kuu inayokuja. (Ufu. 7:9, 14) Je, wewe utakuwa miongoni mwao? Kupitia fadhili zisizostahiliwa, utakuwa miongoni mwao ikiwa unatumia kila fursa sasa, kusitawisha na kuimarisha imani yako!​—Ebr. 10:39.