‘Kuwaleta Wengi Kwenye Uadilifu’

1. Ni matukio gani yenye kusisimua yatakayotokea wakati wa Utawala wa Miaka Elfu Moja?

ITAKUWA siku yenye shangwe sana ufufuo utakapoanza hapa duniani wakati wa Utawala wa Miaka Elfu Moja wa Kristo! Wote ambao wamefiwa na wapendwa wao wanatamani sana kuwaona tena. Hivyo ndivyo Yehova anavyohisi pia. (Ayu. 14:15) Wazia jinsi watu wote watakavyokuwa na shangwe duniani wapendwa wao waliokufa watakapofufuliwa. Kama tulivyojifunza kwenye makala iliyotangulia, “waadilifu” ambao majina yao yameandikwa kwenye kitabu cha uzima, watapata “ufufuo wa uzima.” (Mdo. 24:15; Yoh. 5:29) Labda wengi kati ya wapendwa wetu watakuwa miongoni mwa wale watakaofufuliwa mapema duniani.b Isitoshe, “wasio waadilifu,” kwa mfano wale ambao hawakupata nafasi ya kutosha kumjua Yehova au kumtumikia kwa uaminifu kabla ya kufa, watafufuliwa kwenye “ufufuo wa hukumu.”

2-3. (a) Kulingana na andiko la Isaya 11:9, 10, ni kazi gani kubwa zaidi ya kutoa elimu katika historia ya wanadamu itakayofanywa? (b) Tutachunguza nini katika makala hii?

² Watu hao wote watakaofufuliwa watahitaji kufundishwa. (Isa. 26:9; 61:11) Basi, kazi kubwa zaidi ya kutoa elimu katika historia yote ya wanadamu itahitaji kufanywa. (Soma Isaya 11:9, 10.) Kwa nini? Sababu moja ni kwamba wasio waadilifu watakaofufuliwa watahitaji kujifunza kumhusu Yesu Kristo, mpango wa Ufalme, fidia, na suala la ulimwenguni pote linalohusu jina la Yehova na enzi yake kuu. Hata waadilifu watahitaji kujifunza mambo ambayo Yehova amefunua hatua kwa hatua kuhusiana na kusudi lake kwa dunia. Baadhi ya waaminifu hao walikufa muda mrefu kabla ya Biblia kukamilishwa. Wasio waadilifu na waadilifu watahitaji kujifunza mambo mengi.

³ Katika makala hii, tutachunguza maswali yafuatayo: Ni nini kitakachohusika katika kufanya kazi hiyo kubwa ya kutoa elimu? Itikio la watu kuelekea kazi hiyo ya kutoa elimu, litaamuaje ikiwa majina yao yataandikwa kwa njia ya kudumu katika kitabu cha uzima au la? Majibu ya maswali hayo ni muhimu sana kwetu leo. Kama tutakavyoona, baadhi ya unabii wenye kusisimua ulioandikwa katika kitabu cha Danieli na Ufunuo, utatusaidia kuboresha uelewaji wetu kuhusu mambo yatakayotokea wafu watakapofufuliwa. Kwanza, acheni tuchunguze matukio yenye kusisimua yaliyotabiriwa katika unabii wa Danieli 12:1, 2.

“WALE WANAOLALA USINGIZI KATIKA MAVUMBI . . . WATAAMKA”

4-5. Andiko la Danieli 12:1 linafunua nini kuhusu wakati wa mwisho?

⁴ Soma Danieli 12:1. Kitabu cha Danieli kinafunua mfuatano wa matukio yenye kusisimua yatakayotokea wakati wa mwisho. Kwa mfano, Danieli 12:1 inafunua kwamba Mikaeli, ambaye ni Yesu Kristo, ‘anasimama kwa ajili ya watu wa Mungu.’ Sehemu hiyo ya unabii ilianza kutimizwa mwaka wa 1914 Yesu alipowekwa rasmi kuwa Mfalme wa Ufalme wa mbinguni wa Mungu.

⁵ Hata hivyo, Danieli aliambiwa pia kwamba Yesu “atasimama . . . wakati wa taabu ambao haujawahi kamwe kutokea tangu kuanzishwa kwa taifa lolote mpaka wakati huo.” ‘Wakati huo wa taabu’ ni “dhiki kuu” inayotajwa kwenye Mathayo 24:21. Yesu anasimama, au anachukua hatua ili kuwatetea watu wa Mungu, mwishoni mwa kipindi hicho cha taabu, yaani, kwenye Har–Magedoni. Kitabu cha Ufunuo kinarejelea kikundi hichohicho kuwa “umati mkubwa . . . [wa] wale wanaotoka katika ile dhiki kuu.”​—Ufu. 7:9, 14.

6. Ni nini kitakachotokea baada ya umati mkubwa kuokoka dhiki kuu? Eleza. (Tazama pia katika toleo hili “Maswali Kutoka kwa Wasomaji” kuhusu ufufuo kwenye uhai hapa duniani.)

⁶ Soma Danieli 12:2. Ni nini kinachotokea baada ya umati mkubwa kuokoka kipindi cha taabu? Unabii huu hauzungumzii ufufuo wa mfano, yaani, kufanywa hai tena kiroho kwa watumishi wa Mungu kunakotokea katika siku za mwisho, kama tulivyoelewa zamani.c Badala yake, maneno haya yanarejelea ufufuo wa wafu utakaofanywa katika ulimwengu mpya unaokuja. Kwa nini tunasema hivyo? Neno “mavumbuni” linatumiwa pia kwenye Ayubu 17:16 kumaanisha “Kaburi.” Hilo linaonyesha kwamba Danieli 12:2 inazungumzia ufufuo halisi ambao utafanywa baada ya siku za mwisho kwisha na baada ya vita vya Har–Magedoni.

7. (a) Baadhi ya watu watafufuliwa na kupata “uzima wa milele” katika maana gani? (b) Kwa nini huo ni “ufufuo ulio bora”?

⁷ Hata hivyo, andiko la Danieli 12:2 linamaanisha nini linaposema kwamba baadhi ya watu watafufuliwa na kupata “uzima wa milele”? Linamaanisha kwamba wale watakaofufuliwa na kumjua, au kuendelea kumjua, na kumtii Yehova na Yesu wakati wa ile miaka 1,000, hatimaye watapata uzima wa milele. (Yoh. 17:3) Huo utakuwa “ufufuo ulio bora” kuliko ufufuo uliofanywa zamani ambapo baadhi ya wanadamu walifufuliwa. (Ebr. 11:35) Kwa nini? Kwa sababu wanadamu hao wasio wakamilifu walikufa tena.

8. Ni kwa njia gani wengine wanafufuliwa na kupata “shutuma na chuki ya milele”?

⁸ Lakini si wote ambao watafufuliwa watakubali kufundishwa na Yehova. Unabii wa Danieli unasema kwamba baadhi ya watu watafufuliwa na kupata “shutuma na chuki ya milele.” Kwa kuwa wataonyesha mtazamo wa uasi, majina yao hayataandikwa katika kitabu cha uzima na hawatapata uzima wa milele. Badala yake, watapata “chuki ya milele,” au uharibifu. Basi Danieli 12:2 inazungumza kuhusu matokeo ya mwisho kwa wote watakaofufuliwa ikitegemea mambo watakayofanya baada ya kufufuliwa.d (Ufu. 20:12) Baadhi yao watapata uzima wa milele; na wengine hawatapata.

‘KUWALETA WENGI KWENYE UADILIFU’

9-10. Ni jambo gani lingine litakalotokea baada ya dhiki kuu, na ni nani ambao “watang’aa sana kama anga la mbingu”?

⁹ Soma Danieli 12:3. Ni nini kingine kitakachotokea baada ya ‘kipindi kinachokuja cha taabu’? Kama Danieli sura ya 12 mstari wa 2, mstari wa 3 pia unarejelea jambo litakalotokea baada ya dhiki kuu.

¹⁰ Ni nani ambao “watang’aa sana kama anga la mbingu”? Maneno ya Yesu kwenye Mathayo 13:43 yanatusaidia kuelewa: “Wakati huo waadilifu watang’aa kwa uangavu kama jua katika Ufalme wa Baba yao.” Katika muktadha wa maneno hayo, Yesu alikuwa akizungumza kuhusu “wana wa Ufalme,” ndugu zake watiwa-mafuta ambao watatumikia pamoja naye kwenye Ufalme wa mbinguni. (Mt. 13:38) Basi, lazima iwe kwamba Danieli 12:3 inarejelea watiwa-mafuta na kazi watakayofanya wakati wa Utawala wa Miaka Elfu Moja.

11-12. Ni kazi gani ambayo wale 144,000 watafanya wakati wa ile miaka 1,000?

¹¹ Watiwa-mafuta watawaleta “wengi kwenye uadilifu” jinsi gani? Watiwa-mafuta watashirikiana kwa ukaribu na Yesu Kristo ili kuelekeza kazi ya kutoa elimu ambayo itafanywa hapa duniani wakati wa ile miaka 1,000. Wale 144,000 hawatatawala tu wakiwa wafalme, bali pia watatumikia wakiwa makuhani. (Ufu. 1:6; 5:10; 20:6) Basi, watasaidia “kuponya mataifa”​—na hatua kwa hatua watawarudisha wanadamu kwenye hali ya ukamilifu. (Ufu. 22:1, 2; Eze. 47:12) Hilo litawaletea watiwa-mafuta shangwe kubwa!

¹² Ni nani ambao watakuwa kati ya “wengi” watakaoletwa kwenye uadilifu? Watatia ndani wale watakaofufuliwa na pia wale ambao wataokoka Har–Magedoni, pamoja na watoto ambao watazaliwa katika ulimwengu mpya. Mwishoni mwa ile miaka 1,000, wote wanaoishi duniani watakuwa wakamilifu. Basi, ni wakati gani ambapo majina yao yataandikwa kwa njia ya kudumu, kana kwamba kwa wino na si kwa penseli katika kitabu cha uzima?

JARIBU LA MWISHO

13-14. Watu wote wakamilifu duniani watahitaji kuonyesha nini kabla ya kupata uzima wa milele?

¹³ Tunapaswa kukumbuka kwamba kuwa mkamilifu hakumaanishi mtu atapata uzima wa milele moja kwa moja. Wafikirie Adamu na Hawa. Walikuwa wakamilifu, lakini walihitaji kuonyesha kwamba wanamtii Yehova Mungu kabla ya kupata uzima wa milele. Inasikitisha kwamba walikosa kumtii.​—Rom. 5:12.

¹⁴ Mwishoni mwa ile miaka 1,000 hali itakuwaje kwa wale walio duniani? Wote watakuwa wamefikia ukamilifu. Je, watu hao wote wakamilifu wataunga mkono kabisa utawala wa Yehova milele? Au je, baadhi yao watakuwa kama Adamu na Hawa ambao ingawa walikuwa wakamilifu hawakuendelea kuwa waaminifu? Maswali hayo yatahitaji kujibiwa, lakini jinsi gani?

15-16. (a) Ni wakati gani ambao wanadamu wote watapata nafasi ya kuonyesha ushikamanifu wao kwa Yehova? (b) Matokeo ya mwisho ya jaribu hilo yatakuwaje?

¹⁵ Shetani atafungwa kwa miaka 1,000. Katika kipindi hicho, hataweza kumpotosha mtu yeyote. Hata hivyo, baada ya miaka 1,000, Shetani ataachiliwa huru. Kisha atajaribu kuwapotosha wanadamu wakamilifu. Wakati wa jaribu hilo, wanadamu wote wakamilifu duniani watakuwa na nafasi ya kuonyesha waziwazi msimamo wao kuhusu suala la jina la Mungu na enzi yake kuu. (Ufu. 20:7-10) Jinsi watakavyotenda wakati wa jaribu hilo la mwisho, ndilo jambo litakaloamua ikiwa majina yao yanapaswa kuandikwa kwa njia ya kudumu katika kitabu cha uzima.

¹⁶ Idadi fulani ambayo haijatajwa ya watu, watathibitika kuwa kama Adamu na Hawa, watakataa utawala wa Yehova. Ni nini kitakachowapata? Andiko la Ufunuo 20:15 linasema hivi: “Yeyote ambaye hakupatikana ameandikwa katika kile kitabu cha uzima alitupwa ndani ya lile ziwa la moto.” Naam, waasi hao wataangamizwa milele. Lakini idadi kubwa ya wanadamu wakamilifu watashinda jaribu hilo la mwisho. Kisha majina yao yataandikwa kwa njia ya kudumu katika kitabu cha uzima.

KATIKA “WAKATI WA MWISHO”

17. Ni jambo gani ambalo Danieli aliambiwa lingetokea wakati wetu? (Danieli 12:4, 8-10)

¹⁷ Inasisimua sana kufikiria kuhusu matukio hayo ya wakati ujao! Hata hivyo, Danieli pia alipokea kutoka kwa malaika habari fulani muhimu kuhusu nyakati zetu, yaani, “wakati wa mwisho.” (Soma Danieli 12:4, 8-10; 2 Tim. 3:1-5) Malaika alimwambia Danieli hivi: “Ujuzi wa kweli utakuwa mwingi.” Naam, watu wa Mungu wangeelewa kikamili zaidi unabii ulio katika kitabu hicho. Malaika aliongezea kwamba katika wakati huo, ‘waovu wangetenda uovu, na hakuna mwovu yeyote ambaye angeelewa.’

18. Hivi karibuni, ni nini kitakachowapata waovu?

¹⁸ Leo, huenda ikaonekana kwamba waovu wanatenda uovu bila kuadhibiwa. (Mal. 3:14, 15) Lakini hivi karibuni, Yesu atawahukumu wale walio kama mbuzi na kuwatenganisha kutoka kwa wale walio kama kondoo. (Mt. 25:31-33) Waovu hao hawataokoka dhiki kuu, wala hawatafufuliwa ili waishi katika ulimwengu mpya. Majina yao hayatakuwa katika “kitabu cha kumbukumbu” kinachotajwa kwenye Malaki 3:16.

19. Tunapaswa kufanya nini sasa, na kwa nini? (Malaki 3:16-18)

¹⁹ Sasa ndio wakati wa kuthibitisha kwamba hatuko miongoni mwa waovu. (Soma Malaki 3:16-18.) Yehova anawakusanya wale anaowaona kuwa “mali ya pekee,” au mali yenye thamani. Bila shaka, tungependa kuwa miongoni mwao.

20. Ni ahadi gani ya mwisho ambayo Danieli alipewa, na kwa nini unatazamia kwa hamu kutimizwa kwa ahadi hiyo?

²⁰ Kwa kweli, tunaishi katika kipindi chenye kusisimua. Lakini hivi karibuni mambo yenye kustaajabisha zaidi yatatokea. Hivi karibuni, tutaona uovu wote ukiondolewa. Baada ya hapo, tutaona ahadi hii ambayo Yehova alimpa Danieli ikitimizwa: “Utasimama kwa ajili ya fungu lako mwishoni mwa zile siku.” (Dan. 12:13) Je, unatarajia kwa hamu siku ambayo Danieli, pamoja na wapendwa wako ‘watasimama’ tena? Ikiwa ndivyo, jitahidi kabisa kuwa mwaminifu, na hivyo uwe na uhakika kwamba jina lako litabaki likiwa limeandikwa katika kitabu cha Yehova cha uzima.