2 Crónicas
5 Jich te Salomón juʼ yuʼun spasel spisil te aʼtelil ta swenta te sna te Jehová. Tey-abi la yichʼ tal spisil te biluketik te la schʼultes te David te stat sok la skʼej te plata, te oro sok spisil te biluketik ta yawil kʼulejalil ta sna te smelelil Diose. 2 Ta yorail-abi, te Salomón la stsob tal te jwolwanejetik yuʼun te Israel: spisil te jwolwanejetik yuʼun te stsʼumbal Israel sok te jolaletik yuʼun te familiaetik yuʼun te stsʼumbal Israel. Talik ta Jerusalén swenta ya yichʼik tal te skaxaul chapbilkʼop yuʼun te Jehová te ay ta Mukʼul lum yuʼun David, jaʼ te Sion. 3 Spisil te winiketik yuʼun Israel la stsob sbaik ta stojol te ajwalil ta yorail te kʼin* te ya yichʼ pasel ta sjukebal u.
4 Jich yuʼun talik spisil te jwolwanejetik yuʼun te Israel. Jich te levitaetik la skʼechik tal te skaxaul chapbilkʼop. 5 La yichʼik moel tal te skaxaul chapbilkʼop, te nailpakʼ ta swenta tsoblej sok spisil te chʼultesbil aʼtejibaletik te ayik ta nailpakʼ-ae. Jaʼ la yichʼik tal te sacerdoteetik sok te levitaetik. 6 Te ajwalil Salomón la stejkʼan sba ta stojol te skaxaul chapbilkʼop sok spisil te lum Israel te la stikun ta ikʼele. Kʼax bayal la yakʼik ta milbil majtanil tuminchijetik sok wakaxetik te ma juʼix ta ajtayele. 7 Jich yuʼun, te sacerdoteetik la yichʼik bael te skaxaul chapbilkʼop yuʼun te Jehová ta yawil, ta yutil te cuarto te ay ta mero yutil, jaʼ te Mero chʼul awilal, tey kʼot yakʼik ta yeʼtal xikʼ te querubinetike. 8 Te xikʼ te querubinetik slichʼojik ta stojol te lugar yuʼun te skaxaul chapbilkʼop te jich la yaxintesik te skaxaul chapbilkʼop sok te steʼele. 9 Kʼax najtik te steʼel te ya xchiknaj te sniʼil kʼalalto ta Chʼul Awilal te snujpʼsitayoj sba sok te Mero chʼul awilal, pero maba chikanik ta ilel ta fuera. Jaʼto ta ora ini tey ayik-a. 10 Maʼyuk bin ay ta yutil te skaxaul chapbilkʼop jaʼnax te chaʼpejch tonetik te la yakʼ tey-a te Moisés ta Horeb, jaʼ te kʼalal te Jehová la schap skʼop sok te lum Israel te kʼalal lokʼik tal ta Egipto.
11 Te kʼalal lokʼik te sacerdoteetik ta chʼul awilal (melel spisil schʼultesoj sbaik te sacerdoteetik te tey ayik-ae, manchukme yanyantik te sgrupoik), 12 spisil te levitaetik te ya xkʼayojinik te jaʼ ya xtojobtesbotik yuʼun te Asaf, Hemán, Jedutún, te snichʼnabik sok te yermanotakik slapojik lekil pakʼ sok yichʼojik sepseptakʼin te stsintsun skʼop, aʼtejibaletik te ay scuerdail sok arpaetik; tekʼajtik ta stojol slokʼib kʼajkʼal ta yelaw te skajtajib chikʼbil majtanil sok jokinbilik yuʼun 120 ta tul sacerdoteetik te yakik ta yokʼesinel trompetaetik. 13 Te machʼatik yakik ta yokʼesinel te trompetaetik sok te machʼatik yakik ta kʼayoj jun-nax yakik ta yalbeyel yutsil skʼoplal te Jehová sok ta yalbeyel wokol. Te kʼalal yakik ta yokʼesinel-a te trompetaetik, ta stijel-a te sepseptakʼin te stsintsun skʼop sok te yantikxan aʼtejibaletik yuʼun música, yakik ta yalbeyel yutsil skʼoplal te Jehová, «melel lek yoʼtan stukel; sbajtelkʼinal ay te skʼuxul yoʼtan te ma x-ijkitaywan». Ta yorail-abi noj ta tokal te nae, jaʼ te sna te Jehová. 14 Te sacerdoteetik maba juʼ jilik ta spasel te yaʼtelik tey-a ta skaj te tokale, melel te yutsilal te Jehová noj ta sna te smelelil Diose.