Éxodo

23 »Mame xa apuk ta alel te bin ma smeleliluk, mame xkʼoat ta testigo yuʼun ya akoltay te machʼa chopol yoʼtane.* 2 Mame xa atʼun te bintik chopol* ya spas te bayal ants winiketik, mame xa awal lotil testigo kʼop te ya skontrain te bin toj ta pasel ta skajnax yuʼun te ya akoltay te bayal ta tul ants winiketike. 3 Mame jaʼuk lek ya awil te pobre te kʼalal ya yichʼ ichʼel ta kʼop.

4 »Teme ya atabey te storo o te sburro te akontra te chʼayem yuʼun-ae, yame skʼan ya asujtesbey. 5 Teme ya awil te netʼot yuʼun yijkats te sburro te machʼa ya spʼajate, mame teyuk ya awijkitay-a, yame skʼan ya akoltay ta sjachel te sburroe.

6 »Mame xa ajel te bin ya yichʼ tael ta nopel ta swenta te bin ya yichʼ chajpanel ta stojol te pobre te ay ta awolilike.

7 »Mame xa achʼik aba te kʼalal ay machʼatik yakik ta le mulile, mame xa awakʼ te ya yichʼ milel te machʼa maʼyuk smul sok te machʼa toj yoʼtan, melel maba ya kal te maʼyuk smul te machʼa chopol yoʼtane.*

8 »Mame xa atsak majtanil te kʼalal ay bin ya yichʼ chajpanele, melel ya yakʼ xchʼay spʼijil te jchajpanwanejetik sok ya yakʼ xjowij skʼop te machʼatik toj yoʼtanike.

9 »Mame xa awutsʼin* te jyanlum. Anaʼojik te bin yilel skuxlejal te jyanlum, melel jyanlum kʼoex ta skʼinal Egipto.

10 »Yame stsʼunbajat sok ya atsobey sit te lumkʼinal awuʼun ta wakeb jaʼbil. 11 Pero, ta sjukebal jaʼbil maba ya stsʼunbajat ta lumkʼinal awuʼun, yame awakʼbey skux yoʼtan. Te pobreetik te ayik ta alumal jaʼme ya sweʼik te bin stukel ya xchʼi tal ta lumkʼinal, te bin ya xjil yuʼunik jaʼme ya sweʼik te jtiʼawal chambalametik. Jaʼnixme jich ya skʼan ya apasik sok te tsʼusubiltik sok te olivoetik awuʼun.

12 »Wakebme kʼajkʼal ya x-aʼtejat, pero ta sjukebal kʼajkʼal maba ya x-aʼtejat swenta ya skux yoʼtan te atoro sok te aburro, yuʼunme jich ya schaʼyichʼ yip-a te yal te acriada sok te jyanlum.

13 »Ilaikme ta lek te yakuk achʼuunik spasel spisil te bin la kalbeyexe. Mame xa awalbeyik sbiil yantik diosetik; mame xlokʼ ta aweʼik te sbiilike.

14 »Ta jujun jaʼbil yame apas oxeb kʼinetik ta jtojol. 15 Yame apas te Kʼin yuʼun pan te maba yichʼoj levadura. Jich te bitʼil la kalbat ta mantale, jukebme kʼajkʼal ya aweʼ te panetik te maba yichʼoj levadura jaʼ te bin kʼajkʼalil albil skʼoplal ta u yuʼun abib,* melel jaʼ yorail te lokʼat tal ta Egipto. Mame ayuk machʼa jochol skʼab ya xtal ta jtojol. 16 Jaʼnix jich yame skʼan ya apas te Kʼin yuʼun sba sit awal tsʼunubil* te kʼalal ya atsobey sit te lumkʼinal awuʼun. Soknix yame apas te Kʼin yuʼun stsobeyel sit awal tsʼunubil* ta slajibal jaʼbil te kʼalal ya atsobey sit te awaʼtele. 17 Spisil te winiketik ya skʼan ya stejkʼan sbaik oxeb buelta ta jun jaʼbil ta stojol te Kajwaltik Jehová.

18 »Mame xa awakʼbon te chʼichʼ yuʼun milbil majtanil te kapal sok te bintik yichʼoj levadura. Mame xa akʼej ta yan kʼajkʼal te sjujpʼel* te milbil majtanil te ya awakʼbon ta kʼin kuʼun.

19 »Yame awichʼ tal ta sna Jehová te Dios awuʼun te sba sit te awal tsʼunubil awuʼun te lekikxane.

»Mame xa apay te alal tentsun ta yaʼlel schuʼ te smeʼe.

20 »Ya jtikun tal jtul chʼul-abat te ya xnailaj ta atojol swenta ya skanantayat ta be sok ya yikʼat bael ta lugar te chajpanbil kuʼune. 21 Chʼama awaʼiy ta lek sok chʼuunbeya te skʼope. Mame xa atoy aba ta stojol, melel maba ya spasbat perdón yuʼun te amul ta skaj te jaʼ yichʼojbon te jbiile. 22 Pero, teme ya achʼuun ta lek te skʼop sok tsʼakal ya apas te bin ya kalbat, yame jkontrain te machʼatik ya skontrainat sok yame jsitintay jba sok te machʼatik ya sitintayat. 23 Melel te chʼul-abat kuʼun yame xnailaj ta atojol sok yame yikʼat bael te banti ay te amorreoetik, hititaetik, perizitaetik, cananeoetik, heveoetik sok te jebuseoetik, yame jlajinlan ta spisilik. 24 Mame xa akejan aba ta stojol te diosetik yuʼunik, mame xjajch awichʼ ta mukʼ sok mame xa atʼun te bintik ya spasike. Te bin ya skʼan ya apase, jaʼ te ya awuytiklan te lokʼombaetik yuʼunik sok te ya alajinlan te balal tonetik te ya yichʼik ta mukʼe. 25 Yame skʼan ya awakʼ abaik ta abatinel ta stojol te Jehová te Dios awuʼunik, yuʼun jich ya yakʼbeyex bendición ta swenta te aweʼelik sok te jaʼ ya awuchʼike. Yame jkʼej ta atojolik spisil ta chajp chamel. 26 Te antsetik ta alumal maba ya xkʼax yalik sok mame jaʼuk te ma x-alajike. Yame kakʼ xnajtub akuxlejal.

27 »Te kʼalal mato xkʼoat-a te banti ay te ants winiketik, ya xjajchik ta xiwel ta swenta te ya yaʼiybonik jkʼoplale. Yame kakʼbey xjowij sjolik spisil te lumetik te ya atae sok ya kakʼ te ya xlokʼik bael ta anel ta atojol te akontratake. 28 Te kʼalal mato xkʼoat ta stojol te heveoetik, cananeoetik sok te hititaetik, yame kakʼ ya xchebaj yoʼtan* ta atojol, jichme ya jtentiklan lokʼel. 29 Maba ya jten lokʼel ta jun-nax jaʼbil swenta maba jochol ya xjil te lumkʼinal sok yuʼun maba ya spʼol sbaik-a te jtiʼawal chambalametik te jich ya xjuʼ ya yutsʼinex.* 30 Kʼunkʼun ya jtentiklan lokʼel ta atojol jaʼto te kʼalal kʼax bayal ya xkʼoex te jich ya awuʼuninik te kʼinale.

31 »Ya kakʼ ya xmukʼub te stiʼil te akʼinal, ya xjajch tal ta mar Rojo kʼalalto ta mar yuʼun te filisteoetik soknix ya xjajch tal ta jochol takin kʼinal kʼalalto ta mukʼul jaʼ Éufrates. Melel yame kakʼbeyex ta akʼabik te yajwalul te lume, jaʼme ya atenik lokʼel ta atojolik. 32 Mame xa apas chapbilkʼop sok te ants winiketik-abi ni jaʼuk sok te diosetik yuʼunike. 33 Mame xa awakʼ xnainik ta lumkʼinal awuʼunik swenta maba ya yakʼ ata amulik ta jtojol. Teme ya awichʼ ta mukʼ te diosetik yuʼunik, jichme ya xkʼot te bin-utʼil pejtsʼ ta atojolik.