Eclesiastés

10 Jich te bin-utʼil te lajem usetik ya yakʼ te ya xtuub te aceite te yichʼoj perfume, jaʼnix jich jtebuk te bol-oʼtanil ya xjuʼ ya sjin te pʼijil oʼtanil sok te utsilale.

2 Te yoʼtan te machʼa ay spʼijil ya x-ikʼot bael ta lekil be,* yan stukel te yoʼtan te machʼa maʼyuk spʼijil ya x-ikʼot bael ta chopol be.* 3 Chikan bin beil ya stʼun te machʼa ma snaʼ kʼinal, ya yakʼ ta ilel te maʼyuk spʼijil yoʼtan sok ya yakʼbey snaʼ te yantik te yuʼun-nix ma snaʼ kʼinal-ae.

4 Teme ya xjajch yilinba jtul ajwalil ta atojol, mame xlokʼat bael, melel te lamal oʼtanil ya skom tulan muliletik.

5 Ay bin kiloj ta balumilal te mel-oʼtantik sba, jaʼ te bin ma lek ya spasik te machʼatik yichʼoj mukʼ yaʼtelik: 6 te machʼatik ma snaʼik kʼinal ya yichʼik akʼbeyel mukʼ yaʼtelik, yan stukel te machʼatik chapalik ta spasel aʼtelil yakiknanix ta spasel aʼteliletik te pekʼel skʼoplale.

7 Ay kiloj mosoetik te kajajtik ta caballo sok ay kiloj te machʼatik yichʼoj mukʼ yaʼtelik te yakik ta beel jich bin-utʼil mosoetik.

8 Te machʼa ya sjokʼ chʼen ya xjuʼ ya xyal koel tey-a, te machʼa ya sjut pajkʼ te pasbil ta ton ya xjuʼ ya yichʼ tiʼel yuʼun jkojt chan.

9 Te machʼa ya slokʼes tonetik ya xjuʼ ya yejchentes sba sok, te machʼa ya xotʼ balal teʼetik ya xjuʼ ya sta swokol yuʼun.*

10 Teme maʼyukix ye te echej sok teme maʼyuk machʼa ya sjux, ya skʼan te tulanxan ya yichʼ jimel te kʼalal ya yichʼ tuuntesel. Pero, te pʼijil oʼtanil ya xkoltaywan yuʼun lek ya xlokʼ te bin ya yichʼ pasel.

11 Teme nail ya xtiʼawan te chan te kʼalal mato monbil-ae, tojolnax te bin ya spas te machʼa ya xmonawane.

12 Te machʼa pʼij yoʼtan lek ya yichʼ ilel ta swenta te kʼop te ya xlokʼ ta ye; yan te machʼa maʼyuk spʼijil yoʼtan jaʼnix ya xjinot yuʼun ta swenta te bin ya yal: 13 ma xtuun te sbabial kʼopetik te ya xlokʼ ta ye; te slajibal kʼopetik yuʼune mero jkʼaxel maʼyuk swentail. 14 Te machʼa ma snaʼ kʼinal ma skom sba ta kʼop.

Te winik ma snaʼ te bin ya xkʼot ta pasel; ¿machʼa ya xjuʼ ya yalbey te bin ya xkʼot ta pasel te kʼalal lajemix-ae?

15 Te machʼa maʼyuk spʼijil yoʼtan jaʼ ya xlujb yuʼun te yaʼtel sok maba ya snaʼ te bitʼil ya xkʼot ta mukʼul lum.

16 ¡Mero kʼax oʼbol sba te jpam lum kʼalal keremto te ajwalil yuʼune sok te sabto ya xjajchik ta weʼel te machʼatik yichʼoj mukʼ yaʼtelik! 17 ¡Bayal yutsil te jpam lum kʼalal te ajwalil jaʼ snichʼan te machʼatik mukʼ skʼoplalik sok te yorail ya xweʼik te machʼatik yichʼoj mukʼ yaʼtelik yuʼun ya staxan yipik, ma jaʼuk te ya x-ochik ta yakubel!

18 Teme ay machʼa mero chʼaj, ya xyal te stsʼamteʼal sna; ta skaj te spetojnax te skʼab, ya x-och jaʼ ta sna.

19 Ya yichʼ pasel te pan yuʼun ya yakʼ stseʼelil koʼtantik, sok te vino ya yakʼ te ya jmulantik te jkuxlejaltik, pero te takʼin ya xtuun swenta ya jmantik spisil te bin ya xtuun kuʼuntike.

20 Mame xa achopolkʼoptay te ajwalil ni jaʼuk ta awoʼtan* sok mame xa achopolkʼoptay te jkʼulej ta wayibal na awuʼun, melel jkojt jaʼmal mut ya xjuʼ ya yichʼ bael te akʼop o jkojt chʼin jaʼmal mut ya xjuʼ ya yal te bin la awale.